କେସିଙ୍ଗା,୨।୮: କଳାହାଣ୍ଡି ଜିଲ୍ଲା କେସିଙ୍ଗା ବ୍ଲକ ଓଡିଶା ସ୍କୁଲ୍ କଲେଜ ଶିକ୍ଷକ ଓ କର୍ମଚାରୀ ସମନ୍ବୟ ସମିତି ପକ୍ଷରୁ ୬ ଦଫା ଦାବି ନେଇ ଗୋଷ୍ଠୀ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟକୁ ଘେରାଉ କରିବା ସହ ଧାରଣା ଦେଇଛନ୍ତି। ବିଇଓଙ୍କ ଜରିଆରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ସ୍ମାରକ ପତ୍ର ପ୍ରଦାନ କରିଥିଲେ ।
ଅନୁଦାନ, ଚାକିରି ସର୍ତ୍ତାବଳୀ,ପେନସନ ଓ ଅନ୍ୟାନ୍ୟ କେତେକ ଉତ୍କଟ ସମସ୍ୟାରେ ଜର୍ଜରିତ ହେଉଛନ୍ତି ବୋଲି ସ୍କୁଲ୍ ,କଲେଜ ଶିକ୍ଷକ ଓ କର୍ମଚାରୀ ମିଳିତ ମଞ୍ଚ ଅଭିଯୋଗ କରିଛି । ଓଡ଼ିଶା ମାଧ୍ୟମିକ ସ୍କୁଲ ଶିକ୍ଷକ ସଂଘ (ଓଷ୍ଟା) ତଥା ଓଡ଼ିଶା ସ୍କୁଲ କଲେଜ ଶିକ୍ଷକ ଓ କର୍ମଚାରୀ ସମନ୍ବୟ ସମିତି ପକ୍ଷରୁ ମନ୍ତ୍ରୀ, ବିଧାୟକ ଏବଂ ବିଭାଗୀୟ ଅଧିକାରୀଙ୍କ ସହିତ ବିଭିନ୍ନ ଦାବି ଉପରେ ବାରମ୍ବାର ଆଲୋଚନା କରିଥିଲେ ସୁଦ୍ଧା କୌଣସି ସୁଫଳ ମିଳି ନାହିଁ। ଓଡ଼ିଶାର ଶିକ୍ଷକ ଓ ଶିକ୍ଷା କର୍ମଚାରୀମାନେ ହତାଶା ହୋଇ ନିରାଶା ମଧ୍ୟରେ କାଳାତିପାତ କରୁଥିବା ନେଇ ମଞ୍ଚ ପକ୍ଷରୁ କୁହାଯାଇଛି । ଶେଷରେ ମଞ୍ଚର ସଦସ୍ୟଗଣ ଙ୍କ ପକ୍ଷରୁ ଆନ୍ଦୋଳନାତ୍ମକ ପନ୍ଥା ଗ୍ରହଣ କରାଯାଇଛି ।
ଆସନ୍ତା ୧୬ ତାରିଖରେ ଭୁବନେଶ୍ଵର ସ୍ଥିତ ପିଏମଜି ଛକ ଠାରେ ଦାବି ଦିବସ ପାଳନ କରାଯିବାକୁ ନେଇ ସ୍ଥିର କରାଯାଇଛି ବୋଲି କଳାହାଣ୍ଡି ଜିଲ୍ଲା ଓଷ୍ଟା ସଂଘର ସଭାପତି ସନ୍ତୋଷ କୁମାର ରଥ ପ୍ରକାଶ କରିଛନ୍ତି ।
