ନୂଆଦିଲ୍ଲୀ: ୟୁକ୍ରେନ ଉପରେ ଭୟଙ୍କର ଆକ୍ରମଣ କରିଛି ରୁଷ୍ । ଏହି ଆକ୍ରମଣରେ ରୁଷ ବହୁଳ ଆକାରରେ କ୍ରୁଜ୍ କ୍ଷେପଣାସ୍ତ୍ର ଏବଂ ଡ୍ରୋନ୍ ବ୍ୟବହାର କରିଛି। ରୁଷ୍ ସେନା ୟୁକ୍ରେନର ସାମରିକ ଶକ୍ତି ସ୍ଥାପନକୁ ଟାର୍ଗେଟ କରିଛି। ୟୁକ୍ରେନର ଶକ୍ତି ମନ୍ତ୍ରୀ ହରମାନ ହେଲୁଏସେଙ୍କୋ ତାଙ୍କ ଫେସବୁକ ପେଜରେ ଏହି ସୂଚନା ଦେଇଛନ୍ତି। ସେ କହିଛନ୍ତି, “ଶତ୍ରୁ ଆତଙ୍କ ଜାରି ରହିଛି । ୟୁକ୍ରେନ ବାୟୁସେନା କହିଛି ଯେ ଗତକାଲି ରାତିରେ ୟୁକ୍ରେନ ଉପରେ ଅନେକ ଡ୍ରୋନ୍ ଆକ୍ରମଣ କରାଯାଇଛି ଏବଂ ପରେ କ୍ରୁଜ୍ କ୍ଷେପଣାସ୍ତ୍ର ମଧ୍ୟ ଦେଶର ଆକାଶ ମାର୍ଗରେ ନିକ୍ଷେପ କରାଯାଇଛି। ବାୟୁସେନା କହିଛି ଯେ ରୁଷ ମଧ୍ୟ ୟୁକ୍ରେନର ପଶ୍ଚିମ ଅଞ୍ଚଳ ବିରୁଦ୍ଧରେ 'କିଞ୍ଜାଲ' ବାଲିଷ୍ଟିକ୍ କ୍ଷେପଣାସ୍ତ୍ର ବ୍ୟବହାର କରିଛି। ଏହି ଆକ୍ରମଣ ପରେ, ଆଶଙ୍କା ବଢି ଚାଲିଛି ଯେ ଶୀତଦିନରେ ୟୁକ୍ରେନର ଶକ୍ତି ଉତ୍ପାଦନ କ୍ଷମତାକୁ ନଷ୍ଟ କରିବାକୁ ରୁଷ ଲକ୍ଷ୍ୟ ରଖିଛି।
ତେବେ ରୁଷ ଏବଂ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ମଧ୍ୟରେ ୟୁକ୍ରେନର ବରିଷ୍ଠ ସୈନ୍ୟ କମାଣ୍ଡର କହିଛନ୍ତି ଯେ, ରୁଷର କ୍ରମାଗତ ଆକ୍ରମଣ ପରେ ପୂର୍ବ ୟୁକ୍ରେନର ପ୍ରମୁଖ ସହର ପୋକ୍ରୋଭସ୍କ ଆଖପାଖରେ ଯୁଦ୍ଧ ଆହୁରି ତୀବ୍ର ହୋଇଛି। ରୁଷ ସୈନ୍ୟମାନେ ବର୍ତ୍ତମାନ ସହର ଠାରୁ କିଛି କିଲୋମିଟର ଦୂରରେ ଅଛନ୍ତି। ସୂଚନାଥାଉକି ୟୁକ୍ରେନ ପାଇଁ ପୋକ୍ରୋଭସ୍କ ସହର ଅତ୍ୟନ୍ତ ଗୁରୁତ୍ୱପୂର୍ଣ୍ଣ।
ନିକଟରେ ୟୁକ୍ରେନ ସେନା ମୁଖ୍ୟ ଜେନେରାଲ ଅଲେକ୍ସଜାଣ୍ଡାର ସିରସ୍କି ଫେସବୁକରେ ଏକ ପୋଷ୍ଟରେ କହିଛନ୍ତି ଯେ, ରୁଷ ସେନା ମାନେ ଅଧିକ ବିସ୍ତାର କରିବା ପାଇଁ ସମସ୍ତ କୌଶଳ ଉପଯୋଗ କରୁଛନ୍ତି ଏବଂ ଆମର ସୈନ୍ୟ ବାହିନୀର ପ୍ରତିରକ୍ଷାକୁ ଭାଙ୍ଗିବାକୁ ଚେଷ୍ଟା କରୁଛନ୍ତି।
