ନୟାଗଡ,୦୩/୧୦: ସାକେଣି କେନ୍ଦୁପତ୍ର ଫଡି ଘରୁ ଲୁଟ୍ । ବିଳମ୍ୱିତ ରାତିରେ ଲକ୍ଷାଧିକ ଟଙ୍କାର କେନ୍ଦୁପତ୍ର ସହ ଟଙ୍କା ଏବଂ ମୋବାଇଲ୍ ଲୁଟି ନେଲେ ୫ରୁ ଅଧିକ ଦୁର୍ବୃତ୍ତ । ନୟାଗଡ ଜିଲ୍ଲା ଦଶପଲ୍ଲା କେନ୍ଦୁପତ୍ର ବନାଞ୍ଚଳ ସାକେଣି ଫଡି ଘରୁ ଏହି ଲୁଟ୍ ହୋଇଛି ।
ସୂଚନା ମୁତାବକ, ବୁଧବାର ବିଳମ୍ୱିତ ରାତିରେ ଫଡି ଘରେ ସମସ୍ତେ ଶୋଇଥିଲେ । ଏହି ସମୟରେ ୫ରୁ ଅଧିକ ଦୁର୍ବୃତ୍ତ ଜୋର ଜବରଦସ୍ତ ଆସି ଫଡି ଘରେ ପଶିଥିଲେ । ସେଠାରେ ଥିବା ଲୋକଙ୍କୁ ବନ୍ଧୁକ ଦେଖାଇ ଲକ୍ଷାଧିକ ଟଙ୍କାର କେନ୍ଦୁପତ୍ର, ନଗଦ ଟଙ୍କା ଏବଂ ମୋବାଇଲ୍ ଲୁଟି ନେଇ ଘଟଣାସ୍ଥଳରୁ ଫୋରାର ହୋଇଥିଲେ ଦୁର୍ବୃତ୍ତ । ପରେ ଏହି ଘଟଣା ସମ୍ପର୍କରେ ପୋଲିସକୁ ଖବର ଦେଇଥିଲେ ଫଡ଼ି ଘରେ କାମ କରୁଥିବା ଲୋକେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ଘଟଣାର ତଦନ୍ତ ଚଳାଇଛି ।
