ନୟାଗଡ, ୮।୯ : ଇଟାମାଟି ନିକଟରେ ରାସ୍ତାକଡରେ ଛିଡା ହୋଇଥିବା ବେଳେ ଟ୍ରକ ଧକ୍କାରେ ସ୍ତ୍ରୀର ମୃତ୍ୟୁ ଘଟିଥିବା ବେଳେ ସ୍ବାମୀ ଗୁରୁତର ହୋଇଛି। ମୃତକ ହେଲେ ନୂଆଘଡୁଆଳ ଗାଁର ଜୟନ୍ତୀ ପାଳ ।କ୍ଷତିପୂରଣ ଦାବିରେ ଉତ୍ତ୍ଯକ୍ତ ଲୋକ ଖୋର୍ଦ୍ଧା ବଲାଙ୍ଗୀର ଜାତୀୟରାଜପଥ ଅବରୋଧ କରିଛନ୍ତି।
ଜୟନ୍ତୀ ଏବଂ ତାଙ୍କ ସ୍ବାମୀ ପ୍ରଫୁଲ୍ଲ ପାଳ କଳାମାଟିଆରୁ ନିଜ ଗାଁକୁ ସ୍କୁଟିରେ ଫେରୁଥିଲେ। ଇଟାମାଟି ନିକଟରେ ରାସ୍ତାକଡରେ ଛିଡା ହୋଇ ପରିସ୍ରା କରୁଥିଲେ । ସେହି ସମୟରେ ନୟାଗଡ ପଟୁ ଦ୍ରୁତଗତିରେ ଯାଉଥିବା ଏକ ଟ୍ରକ୍ ଉଭୟଙ୍କୁ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ହିଁ ଜୟନ୍ତୀଙ୍କ ମୃତ୍ଯୁ ହୋଇଥିବାବେଳେ ପ୍ରଫୁଲ୍ଲ ଗୁରୁତର ହୋଇଥିଲେ। ଗୁରୁତର ଅବସ୍ଥାରେ ପ୍ରଫୁଲ୍ଲଙ୍କୁ ଆମ୍ବୁଲାନ୍ସରେ ନୟାଗଡ ମେଡିକାଲକୁ ପଠାଯାଇଛି । ଦୁର୍ଘଟଣା ପରେ ଡ୍ରାଇଭର ଟ୍ରକ୍ ଛାଡି ଘଟଣାସ୍ଥଳରୁ ଫେରାର୍ ହୋଇଯାଇଛି । ଏହା ପରେ ଘଟଣାସ୍ଥଳରେ ଉତ୍ତେଜନା ଦେଖା ଦେଇଛି। ସେପଟେ ୫୦ଲକ୍ଷ ଟଙ୍କା କ୍ଷତିପୂରଣ ଦାବିରେ ଉତ୍ତ୍ଯକ୍ତ ଲୋକମାନେ ଖୋର୍ଦ୍ଧା ବଲାଙ୍ଗୀର ଜାତୀୟ ରାଜପଥକୁ ଅବରୋଧ କରିଛନ୍ତି । ଫଳରେ ରାସ୍ତାର ଉଭୟପଟରେ ବହୁ ସଂଖ୍ଯାରେ ଗାଡିମଟର ଅଟକି ରହିଛି । ଇଟାମାଟି ପୋଲିସ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରୁଛି।