ଯୋଡ଼ା,୦୬/୦୭: କେନ୍ଦୁଝର ଜିଲ୍ଲା ଯୋଡ଼ା ବ୍ଲକ୍ ଅନ୍ତର୍ଗତ ବଡ଼କାଳିମାଟି ପଞ୍ଚାୟତର ଦବୁନାରେ ବାହୁଡା ଯାତ୍ରା ବେଳେ ଅଘଟଣ ଘଟିଛି । ରାସ୍ତାରେ ଖାଲ ଯୋଗୁ ରଥ ଚକା ଭାଙ୍ଗିଯାଇଛି । ଫଳରେ ବଡଦେଉଳକୁ ନଫେରି ଅଟକି ରହିଥିଲେ ତିନି ଠାକୁର । ଏଭଳି ପରିସ୍ଥିତିରେ ଭକ୍ତ ନିଜ କାନ୍ଧରେ ଦାରୁଦିଆଁକୁ କାନ୍ଧରେ ବସାଇ ସହ ଘଣ୍ଟ ଘଣ୍ଟା ବଜାଇ ବଜାଇ ମନ୍ଦିର ପର୍ଯ୍ୟନ୍ତ ନେଇଛନ୍ତି । ଏହି ଭାବ ବିହ୍ବଳ ଦୃଶ୍ୟ ଭାଇରାଲ ହେବାରେ ଲାଗିଛି। 
ଶନିବାର ଅପରାହ୍ନ ୪ଟାରେ ରୀତିନୀତି ଅନୁଯାୟୀ ପୂଜାର୍ଚ୍ଚନା ପରେ ମହାପ୍ରଭୁଙ୍କ ବାହୁଡା ଯାତ୍ରା ଆରମ୍ଭ ହୋଇଥିଲା । ଶହ ଶହ ସଂଖ୍ୟାରେ ଭକ୍ତମାନେ ଖୁବ୍ ଆନନ୍ଦରେ ରଥ ଟାଣିବା ଆରମ୍ଭ କରିଥିଲେ । ମାଉସୀ ମା’ ମନ୍ଦିରରୁ ୪୦୦ ମିଟର ଦୂର ଯିବା ପରେ ରାସ୍ତାରେ ହୋଇଥିବା ଖାଲରେ ରଥ ଚକା ପଶିଯାଇ ଭାଙ୍ଗି ଯାଇଥିଲା । ଫଳରେ ରଥ ଆଉ ଆଗକୁ ନଗଡି ଅଟକି ରହିଥିଲା। ଶେଷ କିଛି ଉପାୟ ନମିଳିବାରୁ ଭାବ ବିହ୍ବଳ ହୋଇ ଚତୁର୍ଦ୍ଧାମୂର୍ତ୍ତିଙ୍କୁ ନିଜ କାନ୍ଧରେ ବୋହି ବର୍ଷାରେ ଭିଜି ଭିଜି ମନ୍ଦିର ପର୍ଯ୍ୟନ୍ତ ନେଇଥିଲେ ଭକ୍ତ । ଏହି ଘଟଣା ପରେ ଭକ୍ତଙ୍କ ମନରେ ଗଭୀର ଆଘାତ ଲାଗିଛି ।
ସୂଚନା ଅନୁଯାୟୀ, ଏହି ରାସ୍ତାରେ ପାଞ୍ଚ ଫୁଟିଆ ଖାଲ ରହିଛି । ଲଗାଣ ବର୍ଷା ଯୋଗୁଁ ଖାଲ ରାସ୍ତାରେ ପାଣି ଜମି ଅତ୍ୟନ୍ତ ବିପଦପୂର୍ଣ୍ଣ ହୋଇ ପଡିଛି । ରଥଯାତ୍ରା ସମୟରେ ବି ଏହି ସ୍ଥାନରେ ରଥ ଦୁଇଟି ଚକା ଭାଙ୍ଗିଥିଲା । ବହୁ କଷ୍ଟରେ ଭକ୍ତ ମାନେ ରଥକୁ ଖାଲରୁ ବାହାର କରି ମାଉସୀ ମା’ ମନ୍ଦିରକୁ ନେଇଥିଲେ । ଶନିବାର ରଥର ଆଉ ଦୁଇ ଟି ଚକା ଖାଲରେ ପଡି ଭାଙ୍ଗି ଯାଇଛି । ରଥର ଛଅ ଚକାରୁ ୪ ଟି ଭାଙ୍ଗି ଯିବାରୁ ରଥ ଚକ ଆଗକୁ ଗଡୁ ନାହିଁ । ମହାପ୍ରଭୁଙ୍କ ବାହୁଡା ଯାତ୍ରା ସମ୍ପୂର୍ଣ୍ଣ ହୋଇ ପାରିନାହିଁ ।
