ଅନୁଗୁଳ/ବନ୍ତଳା ୦୬/୦୭: ପୁରୁଣା କଟକ-ସମ୍ବଲପୁର ରାସ୍ତାର ବନ୍ତଳା ଥାନା ଇଲାକା ଚମ୍ପତ୍ତିମୁଣ୍ଡାଠାରେ ଶନିବାର ଅପରାହ୍ଣରେ ବାଇକ୍ ଦୁର୍ଘଟଣାଗ୍ରସ୍ତ ହେବାରୁ ଦୁଇ ଆରୋହୀଙ୍କ ଶୋଚନୀୟ ମୃତ୍ୟୁ ଘଟିଛି । ଭାରସାମ୍ୟ ହରାଇ ବାଇକ୍ଟି ରାସ୍ତା ପାଶ୍ୱର୍ ଗଛରେ ପିଟି ହୋଇଥିଲା । ମୃତକ ଦ୍ୱୟ ହେଲେ, କଟକ ଜିଲ୍ଲା ତିଗିରିଆ ଶୁଣ୍ଢିପାଳ ଗ୍ରାମର ଅଭୟ ରାଉତ ଓ ଅମର ରାଉତ ।
ପୁଲିସ୍ ସୂଚନା ମୁତାବକ, ଉଭୟ ଝାରସୁଗୁଡ଼ାର ଏକ ଘରୋଇ କମ୍ପାନୀରେ କାମ କରନ୍ତି । ଦୁହେଁ ଶନିବାର ଏକ ବୁଲେଟ୍ ମଟର ସାଇକେଲ୍ରେ ଘରକୁ ଫେରୁଥିଲେ । ଚମ୍ପତ୍ତିମୁଣ୍ଡା ନବୋଦୟ ସ୍କୁଲ ଫାଟକ ନିକଟ ବୁଲାଣିଠାରେ ଭାରସାମ୍ୟ ହରାଇବାରୁ ରାସ୍ତାପାଶ୍ୱର୍ ଗଛରେ ପିଟି ହୋଇଥିଲେ । ଦୁର୍ଘଟଣାରେ ଘଟଣା ସ୍ଥଳରେ ଉଭୟଙ୍କ ପ୍ରାଣବାୟୁ ଉଡିଯାଇଥିଲା । ବନ୍ତଳା ଥାନା ପୁଲିସ୍ ପହଞ୍ଚି ମୃତଦେହ ଜବତ କରି ଜିଲ୍ଲା ମୁଖ୍ୟ ଚିକିତ୍ସାଳୟକୁ ବ୍ୟବଚ୍ଛେଦ ପାଇଁ ପଠାଇଛି । ବାଇକ୍ ଜବତ କରି ପୁଲିସ୍ ତଦନ୍ତ ଚଳାଇଛି ।
ସେହିପରି ଜରପଡ଼ା ଥାନା ଇଲାକା ଓଗୀ ଗ୍ରାମ ନିକଟରେ ଶନିବାର ଅପରାହ୍ଣ ୪ଟା ସମୟରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି । ରାସ୍ତା ପାଶ୍ୱର୍ ଏକ ଗଛରେ ପିଟି ହେବାରୁ ବାଇକ୍ ଆରୋହୀଙ୍କ ଜୀବନ ଯାଇଛି । ମୃତକ ହେଲେ, ସେହି ଥାନା ଅନ୍ତର୍ଗତ କଞ୍ଜରା ଗ୍ରାମର ଲକ୍ଷ୍ମଣ ସାହୁ(୨୫) ।
ସୂଚନା ମୁତାବକ, ଲକ୍ଷ୍ମଣ କୌଣସି କାମରେ ଅନ୍ତୁଳିଆ ଅଞ୍ଚଳକୁ ଯାଇଥିଲେ । ଅପରାହ୍ଣରେ ସେ ବାଇକ୍ରେ ଘରକୁ ଫେରୁଥିବା ବେଳେ ଓଗୀ ପାଞ୍ଚଗୋଛିଆ ଉଠା ନିକଟରେ ଦୁର୍ଘଟଣାର ସମ୍ମୁଖୀନ ହୋଇଥିଲେ । ଏକ ଅଜଣା ଗାଡ଼ି ଧକ୍କା ଦେବା ଫଳରେ ସେ ଭାରସାମ୍ୟ ହରାଇ ରାସ୍ତା ପାଶ୍ୱର୍ ଗଛରେ ପିଟି ହୋଇଥିଲେ । ଘଟଣାସ୍ଥଳରେ ହିଁ ତାଙ୍କ ପ୍ରାଣବାୟୁ ଉଡିଯାଇଥିଲା । ଜରପଡା ଥାନା ପୁଲିସ୍ ମୃତଦେହ ଜବତ କରିବା ସହିତ ବ୍ୟବଚ୍ଛେଦ ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଛି ।
