ବୁଲନ୍ଦଶହର: ଉତ୍ତର ପ୍ରଦେଶର ବୁଲନ୍ଦଶହର ଜିଲ୍ଲାରେ ଏକ ଅଭୂତପୂର୍ବ ଗର୍ଭାବସ୍ଥା ଘଟଣା ଡାକ୍ତରମାନଙ୍କୁ ଆଶ୍ଚର୍ଯ୍ୟ କରିଛି। ଜଣେ ୩୦ ବର୍ଷୀୟ ମହିଳା, ଯିଏ ଦୁଇ ସନ୍ତାନର ମା’ ଏବଂ ଗୃହିଣୀ, ଦୀର୍ଘ ଦିନ ଧରି ପେଟରେ ଯନ୍ତ୍ରଣା ଓ ବାନ୍ତି ଅନୁଭବ କରୁଥିଲେ। ଅନେକ ଡାକ୍ତରଙ୍କୁ ଦେଖାଇବା ଓ ଚିକିତ୍ସା କରାଇବା ପରେ ମଧ୍ୟ ତାଙ୍କୁ ଆରାମ ମିଳିନଥିଲା। ଶେଷରେ, ଏକ ଘରୋଇ ଇମେଜିଂ ସେଂଟରରେ କରାଯାଇଥିବା MRI ସ୍କାନରୁ ଏକ ଆଶ୍ଚର୍ଯ୍ୟଜନକ ତଥ୍ୟ ସାମ୍ନାକୁ ଆସିଛି। ତାଙ୍କର ୧୨ ସପ୍ତାହର ଗର୍ଭାବସ୍ଥା ଗର୍ଭାଶୟରେ ନୁହେଁ, ବରଂ ଯକୃତ (ଲିଭର)ରେ ହିଁ ରହିଛି।

ଏହି ଅସ୍ୱାଭାବିକ ଗର୍ଭାବସ୍ଥା ତାଙ୍କ ଯକୃତର ଡାହାଣ ଲୋବରେ ଥିବା ନିଶ୍ଚିତ ହୋଇଥିଲା। ରେଡିଓଲୋଜିଷ୍ଟ ଡା. କେକେ ଗୁପ୍ତା, ଗତ ଜୁଲାଇ ୨୨ ତାରିଖରେ ଉକ୍ତ ମହିଳାଙ୍କର MRI କରିଥିଲେ। ସ୍କାନ ସମୟରେ ଭ୍ରୁଣର ହୃଦସ୍ପନ୍ଦନ ମଧ୍ୟ ଚିହ୍ନଟ କରିଥିଲେ। ଡା. ଗୁପ୍ତାଙ୍କ ଅନୁସାରେ, ଏହା ଏକ ଅତ୍ୟନ୍ତ ଦୁର୍ଲଭ ଘଟଣା। ଯାହାର କେବଳ ୧୮ଟି କେସ ବିଶ୍ୱରେ ଏପର୍ଯ୍ୟନ୍ତ ଯାଏଁ ରିପୋର୍ଟ ହୋଇଛି। ଭାରତରେ ଏଭଳି ଘଟଣା ପୂର୍ବରୁ କେବେ ବି ରିପୋର୍ଟ ହୋଇନାହିଁ।

ଡା. ଗୁପ୍ତା ଆହୁରି ମଧ୍ୟ କହିଛନ୍ତି ଯେ ଏଭଳି ଗର୍ଭାବସ୍ଥା ୧୪ ସପ୍ତାହରୁ ଅଧିକ ସମୟ ଧରି ରଖିବା ମା’ଙ୍କ ଜୀବନ ପାଇଁ ଅତ୍ୟନ୍ତ ବିପଜ୍ଜନକ। ଏହାକୁ ଅସ୍ତ୍ରୋପଚାର ମାଧ୍ୟମରେ କାଢିବାର ଆବଶ୍ୟକତା ରହିଛି। ନଚେତ୍ ସ୍ୱାସ୍ଥ୍ୟରେ ଗୁରୁତର ଜଟିଳତା ଦେଖାଦେଇପାରେ। ଏହି ଅସାଧାରଣ ରୋଗ ନିର୍ଣ୍ଣୟ ପରେ, ମହିଳାଙ୍କୁ ଉନ୍ନତ ଚିକିତ୍ସା ଓ ଯତ୍ନ ପାଇଁ ଦିଲ୍ଲୀର ଅଖିଳ ଭାରତୀୟ ଆୟୁର୍ବିଜ୍ଞାନ ସଂସ୍ଥାନ (AIIMS)କୁ ସ୍ଥାନାନ୍ତର କରାଯାଇଛି।

ସୂଚନା ମୁତାବକ ମହିଳାଙ୍କ ସ୍ୱାମୀ ଏକ ଘରୋଇ କମ୍ପାନୀରେ କାର୍ଯ୍ୟ କରନ୍ତି। ମହିଳା ଜଣଙ୍କ ଦୀର୍ଘ ଦୁଇ ମାସ ହେବ ଅଜଣା ପେଟ ଯନ୍ତ୍ରଣା ଓ ବାନ୍ତିରେ ପୀଡ଼ିତ ଥିଲେ। କିନ୍ତୁ ସ୍ଥାନୀୟ ଚିକିତ୍ସାରୁ କୌଣସି ଆରାମ ମିଳିନଥିଲା। MRI ସ୍କାନ ପରେ ହିଁ ତାଙ୍କ ଅସୁବିଧାର ପ୍ରକୃତ କାରଣ ଜଣାପଡ଼ିଥିଲା।