ନୂଆଦିଲ୍ଲୀ: ଆଇପିଏଲ୍ର ୨୦୨୫ରେ ପ୍ରଥମ ଦୁଇଟି ମ୍ୟାଚ୍ ହାରିବା ପରେ ତୃତୀୟ ମ୍ୟାଚ୍ରେ ବିଜୟୀ ହୋଇଛି ରାଜସ୍ଥାନ ରୟାଲ୍ସ ।କାର୍ଯ୍ୟକାରୀ ଅଧିନାୟକ ରିୟାନ ପରାଗଙ୍କ ନେତୃତ୍ବରେ ଦଳ ବିଜୟୀ ହୋଇଛି । ହେଲେ ଏବେ ରାଜସ୍ଥାନ ଟିମ୍ ନିଜର ଅଧିନାୟକଙ୍କୁ ପରିବର୍ତ୍ତନ କରିବାକୁ ଯାଉଛି । ଦଳର ପ୍ରକୃତ ଅଧିନାୟକ ସଞ୍ଜୁ ସାମସନ ଫିଟ୍ ହୋଇଥିବା ନେଇ ବିସିସିଆଇ ଘୋଷଣା କରିଛି । ଫଳରେ ସଞ୍ଜୁ ସାମସନ୍ ଓ୍ବିକେଟ କିପିଂ ଲାଗି ମଧ୍ୟ ପ୍ରସ୍ତୁତ ଥିବା କୁହାଯାଉଛି । ପରବର୍ତ୍ତୀ ମ୍ୟାଚ୍ରେ ଦଳର ଅଧିନାୟକ ହୋଇପାରନ୍ତି ସଞ୍ଜୁ ସାମସନ୍ ।
କ୍ରିକବଜର ଏକ ରିପୋର୍ଟରୁ ଜଣାପଡ଼ିଛି ଯେ, ବିସିସିଆଇର ସେଣ୍ଟର ଅଫ୍ ଏକ୍ସଲେନ୍ସ (ସିଓଇ)ର ଡାକ୍ତରୀ ଦଳ ସଞ୍ଜୁ ସାମସନଙ୍କୁ ସମ୍ପୂର୍ଣ୍ଣ ଫିଟ୍ ଘୋଷଣା କରିଛି । ରାଜସ୍ଥାନ ରୟାଲ୍ସର ତୃତୀୟ ମ୍ୟାଚ୍ ପରେ ସାମସନ୍ ତାଙ୍କ ଫିଟନେସ୍ ସ୍ଥିତି ଯାଞ୍ଚ କରିବା ପାଇଁ ବେଙ୍ଗାଲୁରୁସ୍ଥିତ ସିଓଇରେ ପହଞ୍ଚିଥିଲେ। ତାଙ୍କୁ ଭଲ ଭାବରେ ପରୀକ୍ଷା କରିବା ପରେ, କେନ୍ଦ୍ରର ଡାକ୍ତରୀ ଦଳ ତାଙ୍କୁ ୱିକେଟକିପିଂ କରିବାକୁ ମଧ୍ୟ ଅନୁମତି ଦେଇଛନ୍ତି । ଏହା ପୂର୍ବରୁ ସଞ୍ଜୁଙ୍କୁ କେବଳ ବ୍ୟାଟିଂ କରିବାକୁ ଅନୁମତି ଦିଆଯାଇଥିଲା।
ଜାନୁଆରୀରେ ଇଂଲଣ୍ଡ ବିପକ୍ଷ ଟି-୨୦ ସିରିଜ୍ ସମୟରେ ସଞ୍ଜୁ ସାମସନଙ୍କ ଆଙ୍ଗୁଠିରେ ଆଘାତ ଲାଗିଥିଲା। ଯଦିଓ ତାଙ୍କୁ IPL ଆରମ୍ଭରେ ବ୍ୟାଟିଂ କରିବାକୁ ଅନୁମତି ଦିଆଯାଇଥିଲା, କିନ୍ତୁ ତାଙ୍କ ଆଙ୍ଗୁଠିର ଅବସ୍ଥା ଯୋଗୁଁ ସେଣ୍ଟର ଅଫ୍ ଏକ୍ସଲେନ୍ସର ଡାକ୍ତରୀ ଦଳ ତାଙ୍କୁ ୱିକେଟକିପିଂ କିମ୍ବା ଫିଲ୍ଡିଂ କରିବାକୁ ବାରଣ କରିଥିଲେ। ଏପରି ପରିସ୍ଥିତିରେ, ରାଜସ୍ଥାନ ରୟାଲ୍ସ ଏହି ସିଜିନର ପ୍ରଥମ ୩ଟି ମ୍ୟାଚ୍ରେ ସାମସନଙ୍କୁ କେବଳ ପ୍ରଭାବଶାଳୀ ଖେଳାଳି ବା ଇମ୍ପାକ୍ଟ ପ୍ଲେୟାର ଭାବରେ ଖେଳାଉଥିଲା । ସାମସନ୍ କେବଳ ବ୍ୟାଟିଂ କରୁଥିଲେ ।
ସଞ୍ଜୁ ସାମସନଙ୍କ ସ୍ଥାନରେ ରିୟାନ ପରାଗ ଦଳର ନେତୃତ୍ବ ନେଉଥିଲେ । ରିୟାନ ପରାଗଙ୍କ ନେତୃତ୍ବରେ ଦଳ ପ୍ରଥମ ଦୁଇଟି ମ୍ୟାଚ୍ରେ ପରାସ୍ତ ହୋଇଥିଲା । ତୃତୀୟ ମ୍ୟାଚ୍ରେ ରାଜସ୍ଥାନକୁ ବିଜୟ ମିଳିଥିଲା । ଚେନ୍ନାଇ ସୁପର କିଙ୍ଗସ୍କୁ ହରାଇ ଚଳିତ ଆଇପିଏଲ୍ ସିଜିନ୍ର ପ୍ରଥମ ବିଜୟ ହାସଲ କରିଥିଲା ରାଜସ୍ଥାନ ରୟାଲ୍ସ ।ସେପଟେ ସାମସନ ଏବେ ସଂପୂର୍ଣ୍ଣ ସୁସ୍ଥ ହୋଇଥିବାରୁ ସେ ହିଁ ଦଳର ନେତୃତ୍ବ ନେବେ । ସାମସନ ଦଳର ଅଧିନାୟକ ହେବା ପରେ ଆରଆରକୁ ଆହୁରି ସଫଳତା ମିଳିପାରେ ବୋଲି କୁହାଯାଉଛି ।
