କୋଲକାତା,୦୩/୦୪: ଗତ ସିଜନରେ ଫାଇନାଲ୍ ଖେଳିଥିବା ଦୁଇ ଦଳ ଆଜି ସାମ୍ନା ସାମ୍ନି ହେବେ । ଚଳିତ ଆଇପିଏଲ୍ର ୧୫ତମ ଲିଗ୍ ମୁକାବିଲାରେ ଡିଫେଣ୍ଡିଂ ଚାମ୍ପିଅନ୍ କୋଲକାତା ନାଇଟ ରାଇଡର୍ସ ଘରୋଇ ଗ୍ରାଉଣ୍ଡ୍ରେ ସନରାଇଜର୍ସ ହାଇଦ୍ରାବାଦକୁ ଭେଟିବ । ଘରୋଇ ସମର୍ଥନ ମଧ୍ୟରେ ନାଇଟ ରାଇଡର୍ସ ପୁନର୍ବାର ବିଜୟ ଧାରାକୁ ଫେରିବାକୁ ଲକ୍ଷ୍ୟ ରଖିଛି । ସେହିପରି ସନରାଇଜର୍ସ ଗତ ବର୍ଷର ପରାଜୟର ପ୍ରତିଶୋଧ ନେବାକୁ ପ୍ରୟାସ କରିବ ।
ଗତ ବର୍ଷ ଉଭୟ ଦଳ ପରସ୍ପରକୁ ୩ଥର ଭେଟିଥିଲେ । ସମସ୍ତ ମ୍ୟାଚ୍ ଜିତିଥିଲା ନାଇଟ ରାଇଡର୍ସ । ଫାଇନାଲ୍ରେ ସନରାଇଜର୍ସକୁ ୪ ରନ୍ରେ ହରାଇ ନାଇଟ ରାଇଡର୍ସ ତୃତୀୟ ଟାଇଟଲ ହାସଲ କରିଥିଲା । ପୂର୍ବ ରେକର୍ଡ ମଧ୍ୟ ନାଇଟ୍ ରାଇଡର୍ସ ପକ୍ଷରେ ରହିଛି । ଉଭୟ ଦଳ ପରସ୍ପରକୁ ୨୮ଥର ଭେଟିଛନ୍ତି । ଏଥିରୁ ସନରାଇଜର୍ସ ମାତ୍ର ୯ଟି ମ୍ୟାଚ ଜିତିଛି ଓ ୧୯ଟି ମ୍ୟାଚ୍ରେ ପରାଜିତ ହୋଇଛି ।
ନୂଆ ସିଜନରେ ଉଭୟ ଦଳ ଇତି ମଧ୍ୟରେ ୩ଟି ଲେଖାଏଁ ମ୍ୟାଚ୍ ଖେଳି ସାରିଛନ୍ତି । ନାଇଟ୍ ରାଇଡର୍ସ ପ୍ରଥମ ମ୍ୟାଚ୍ରେ ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଠାରୁ ପରାଜିତ ହୋଇଥିଲା । ଏହାପରେ ଦଳ ରାଜସ୍ଥାନ ରୟାଲ୍ସକୁ ହରାଇ ପଏଣ୍ଟ ଖାତା ଖୋଲିଥିଲା । ମାତ୍ର ତୃତୀୟ ମ୍ୟାଚ୍ରେ ମୁମ୍ବାଇ ଇଣ୍ଡିଆନ୍ସ ଠାରୁ ପରାଜିତ ହୋଇଛି । ସେହିପରି ସନରାଇଜର୍ସ ପ୍ରଥମ ମ୍ୟାଚ୍ରେ ରାଜସ୍ଥାନ ରୟାଲ୍ସ ହରାଇଥିଲେ ହେଁ ପରବର୍ତ୍ତୀ ମ୍ୟାଚ୍ରେ ଲକ୍ଷ୍ନୌ ସୁପରଜାଏଣ୍ଟ୍ସ ଓ ଦିଲ୍ଲୀ କ୍ୟାପିଟାଲ୍ସ ଠାରୁ ପରାଜୟର ସାମ୍ନା କରିଛି ।
ଉଭୟ ଦଳର ବ୍ୟାଟିଂ ବିଭାଗ ସେମାନଙ୍କ ପରାଜୟର ମୁଖ୍ୟ କାରଣ ସାଜିଛି । ଗତ ସିଜନରେ ବିସ୍ପୋରକ ବ୍ୟାଟିଂ କରି ଚର୍ଚ୍ଚାର କେନ୍ଦ୍ରବିନ୍ଦୁ ସାଜିଥିବା ସନରାଇଜର୍ସ ଏଥର ୩୦୦ ରନ୍ ଆଶାରେ ଲାଇନ ଚ୍ୟୁତ ହୋଇଛି । ପ୍ରଥମ ମ୍ୟାଚ୍ରେ ଇଶାନ କିଷନଙ୍କ ଶତକ ସମେତ ଟ୍ରେଭିସ୍ ହେଡ୍ ଓ ଅଭିଷେକ ଶର୍ମା ମଧ୍ୟ ଧୂଆଁଧାର ବ୍ୟାଟିଂ କରିଥିଲେ । ମାତ୍ର ଏହାପରେ କେବଳ ହେଡ୍ଙ୍କୁ ଛାଡ଼ି ଦେଲେ ବାକି ସବୁ ବ୍ୟାଟର ବିଫଳ ହୋଇଛନ୍ତି । ଅବଶ୍ୟ ମଧ୍ୟ କ୍ରମ ବ୍ୟାଟର ଅନିକେତ ବର୍ମା ନୂଆ ତାରକା ଭାବେ ଉଭା ହୋଇଛନ୍ତି । ନାଇଟ ରାଇଡର୍ସକୁ ହରାଇବାକୁ ହେଲେ ସନରାଇଜର୍ସକୁ ଦାୟିତ୍ୱପୂର୍ଣ୍ଣ ବ୍ୟାଟିଂ କରିବାକୁ ହେବ ।
ସର୍ବଦା ନାଇଟ୍ ରାଇଡର୍ସକୁ ଜିତାଇଥିବା ମଧ୍ୟକ୍ରମ ଓ ନିମ୍ନ କ୍ରମ ବ୍ୟାଟରମାନେ ଏଥର ବିଫଳ ହେଉଛନ୍ତି । ଆନ୍ଦ୍ରେ ରସେଲ, ରିଙ୍କୁ ସିଂହ, ଭେଙ୍କଟେଶ ଆୟର, ଅଜିଙ୍କ୍ୟ ରାହାଣେ, ମୋଇନ ଅଲି ପ୍ରମୁଖ ଅଭିଜ୍ଞ ବ୍ୟାଟରଙ୍କୁ ଏଣିକି ଦକ୍ଷତା ମୁତାବକ ପ୍ରଦର୍ଶନ କରିବାକୁ ହେବ । ଉଭୟ ଦଳର ବୋଲିଂ ବିଭାଗ ଶୃଙ୍ଖଳିତ ପ୍ରଦର୍ଶନ କରୁଛନ୍ତି । ସନରାଇଜର୍ସର ପେସ୍ ବୋଲିଂ ବିଭାଗ ଓ ନାଇଟ୍ ରାଇଡର୍ସ ସ୍ପିନ୍ ବିଭାଗ ଉପରେ ନିର୍ଭର କରୁଛନ୍ତି । ଇଡେନ ଗାର୍ଡେନ୍ସ ପିଚ୍ ଉଭୟ ପେସ ଓ ସ୍ପିନ ବୋଲିଂକୁ ସୁହାଇବ । ତେଣୁ ଆଜି ବୋଲରମାନେ ଦଳର ଭାଗ୍ୟ ନିର୍ଦ୍ଧାରଣ କରିବେ ।
ନାଇଟ୍ ରାଇଡର୍ସ ପକ୍ଷରୁ ବରୁଣ ଚକ୍ରବର୍ତ୍ତୀଙ୍କ ଉପରେ ନଜର ରହିବ । ସେ ଗତ ଆଇସିସି ଚାମ୍ପିଅନ୍ସ ଟ୍ରଫିରେ ଭାରତକୁ ଜିତାଇବାରେ ପ୍ରମୁଖ ଭୂମିକା ଗ୍ରହଣ କରିଥିବା ବରୁଣ ଏପର୍ଯ୍ୟନ୍ତ ଦକ୍ଷତା ଦେଖାଇ ନାହାନ୍ତି । ଆଜି ସେ ସନରାଇଜର୍ସର ବିସ୍ଫୋରକ ବ୍ୟାଟରଙ୍କୁ ବାନ୍ଧି ରଖିବେ ବୋଲି ସମର୍ଥକ ଆଶା ବାନ୍ଧିଛନ୍ତି । ନୂଆ ଷ୍ଟାର୍ ରୂପେ ଉଭା ହୋଇଥିବା ଅନିକେତଙ୍କ ବ୍ୟାଟ୍ରୁ ଦର୍ଶନୀୟ ଛକା ଦେଖିବାକୁ ସନରାଇଜର୍ସ ସମର୍ଥକ ଅପେକ୍ଷା କରିଛନ୍ତି ।
ପିଚ୍କୁ ନେଇ ଇଡେନ ଗାର୍ଡେନ୍ସ ଆଲୋଚନାରେ ରହିଥିଲା। ପ୍ରଥମ ମ୍ୟାଚ୍ରେ ରୟାଲ୍ ଚ୍ୟାଲେଞ୍ଜର୍ସ ଠାରୁ ପରାଜିତ ହେବା ପରେ ନାଇଟ୍ ରାଇଡର୍ସ କୋଚ୍ ପିଚ୍ କ୍ୟୁରେଟରଙ୍କୁ ସମାଲୋଚନା କରିଥିଲେ । ଏଥର ଘରୋଇ ଦଳକୁ ସହାୟତା କରିବା ଭଳି ପିଚ ପ୍ରସ୍ତୁତ କରାଯାଇଛି। ତେଣୁ ସ୍ପିନରମାନେ ପିଚ୍ରୁ ଭରପୁର ଫାଇଦା ଉଠାଇବାର ସମ୍ଭାବନା ରହିଛି । ରାତ୍ରିରେ ମ୍ୟାଚ୍ ଖେଳାଯାଉଥିବାରୁ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
ସମ୍ଭାବ୍ୟ ଦ୍ବାଦଶ
ନାଇଟ ରାଇଡର୍ସ: କ୍ୱିଣ୍ଟନ ଡି କକ୍, ସୁନୀଲ ନାରାଏନ, ଅଜିଙ୍କ୍ୟ ରାହାଣେ(ଅଧିନାୟକ), ଅଙ୍ଗକ୍ରୀଶ ରଘୁବଂଶୀ, ଭେଙ୍କଟେଶ ଆୟର, ରିଙ୍କୁ ସିଂହ, ମନୀଷ ପାଣ୍ଡେ, ଆନ୍ଦ୍ରେ ରସେଲ, ରମଣଦୀପ ସିଂହ, ହର୍ଷିତ ରାଣା, ସ୍ପେନସର ଜନସନ, ବରୁଣ ଚକ୍ରବର୍ତ୍ତୀ ।
ସନରାଇଜର୍ସ: ଅଭିଷେକ ଶର୍ମା, ଟ୍ରେଭିସ ହେଡ୍, ଇଶାନ କିଷନ, ନୀତିଶ କୁମାର ରେଡ୍ଡୀ, ଅନିକେତ ବର୍ମା, ହେନରିକ କ୍ଲାସେନ, ଅଭିନବ ମନୋହର, ପ୍ୟାଟ୍ କମିନ୍ସ(ଅଧିନାୟକ), ୱିଆନ ମୋଲ୍ଡର, ହର୍ଷଲ ପଟେଲ, ମହମ୍ମଦ ସାମି, ଜିସନ ଅନସାରୀ ।
IPL 2025: ବଟଲରଙ୍କ ଧୂଆଁଧାର ବ୍ୟାଟିଂ, ଆରସିବିକୁ ୮ ଓ୍ବିକେଟରେ ପରାସ୍ତ କଲା ଗୁଜରାଟ ଟାଇଟନ୍ସ
