ନୂଆଦିଲ୍ଲୀ,୦୨/୦୪: ଆଇପିଏଲ୍ ୨୦୨୫ର ୧୪ତମ ମ୍ୟାଚ୍ରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ପ୍ରଥମେ ବ୍ୟାଟିଂ କୀି ୧୬୯ ରନ୍ ସଂଗ୍ରହ କରିଛି। ନିଜ ଘରୋଇ ଗ୍ରାଉଣ୍ଡରେ ଆରସିବି ବ୍ୟାଟରମାନେ ଆରମ୍ଭରୁ ସଂଘର୍ଷ କରିଥିବା ଦେଖିବାକୁ ମିଳିଥିଲା। ବିରାଟ କୋହଲି ଏବଂ ଅଧିନାୟକ ରଜତ ପାଟିଦାରଙ୍କ ସମେତ ଅନେକ ବଡ଼ ବ୍ୟାଟର ଫ୍ଲପ୍ ହୋଇଥିଲେ। ତିନିଜଣ ବେଙ୍ଗାଲୁରୁ ବ୍ୟାଟର୍ ମହମ୍ମଦ ସିରାଜଙ୍କ ମାରାତ୍ମକ ବୋଲିଂର ଶିକାର ହୋଇଥିଲେ। ଆରସିବି ପକ୍ଷରୁ ସର୍ବାଧିକ ରନ୍ ସ୍କୋରର ଥିଲେ ଲିଆମ୍ ଲିଭିଙ୍ଗଷ୍ଟୋନ୍। ସେ ୫୪ ରନ୍ର ଅର୍ଦ୍ଧଶତକୀୟ ପାଳି ଖେଳିଥିଲେ।
ଏମ. ଚିନ୍ନାସ୍ୱାମୀ ଷ୍ଟାଡିୟମରେ ଖେଳାଯାଉଥିବା ଏହି ମ୍ୟାଚରେ ଗୁଜୁରାଟ ଟାଇଟାନ୍ସ ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା। ୪ ଜଣ ଦ୍ରୁତ ବୋଲର ଗୁଜୁରାଟର ରଣନୀତିକୁ ପୁଣି ଥରେ ପ୍ରଭାବଶାଳୀ ପ୍ରମାଣିତ କରିଥିଲେ। ପ୍ରାରମ୍ଭିକ ଓଭରରେ ଅର୍ଶଦ ଖାନ ଏବଂ ମହମ୍ମଦ ସିରାଜ ଆରସିବି ବ୍ୟାଟିଂ ଲାଇନ୍କୁ ଅପ୍ ଧ୍ୱଂସ କରିଥିଲେ। ବିରାଟ କୋହଲି ପ୍ରଥମେ ୭ ରନ କରିଥିବା ବେଳେ ଦେବଦତ୍ତ ପାଦିକଲ ମଧ୍ୟ ୪ ରନ୍ ସ୍କୋର କରି ଆଉଟ୍ ହୋଇଥିଲେ। ଫିଲିପ୍ ସଲ୍ଟ ଏବଂ ଅଧିନାୟକ ରଜତ ପାଟିଦାର କିଛି ସମୟ ପାଇଁ କ୍ରିଜରେ ରହିଥିଲେ ମଧ୍ୟ ସେମାନେ ଯଥାକ୍ରମେ ୧୪ ଏବଂ ୧୨ ରନ୍ କରି ଆଉଟ୍ ହୋଇଥିଲେ।
ବିଦେଶୀ ବଞ୍ଚାଇଲେ ଆରସିବି ସମ୍ମାନ:
ଆରସିବିର ଅବସ୍ଥା ଏତେ ଖରାପ ଥିଲା ଯେ ଦଳର ପ୍ରଥମ ଚାରିଜଣ ବ୍ୟାଟର ୪୨ ରନ୍ ଭିତରେ ଆଉଟ୍ ହୋଇଥିଲେ। ବିରାଟ କୋହଲି, ରଜତ ପାଟିଦାରଙ୍କ ସମେତ ସମସ୍ତ ପ୍ରସିଦ୍ଧ ଖେଳାଳି ଫ୍ଲପ୍ ହୋଇଥିଲେ। ଏହି ସମୟରେ ଲିଆମ୍ ଲିଭିଙ୍ଗଷ୍ଟୋନ୍ ସଂକଟମୋଚକ ସାଜିଥିଲେ, ଯିଏକି ଜିତେଶ ଶର୍ମାଙ୍କ ସହ ୫୨ ରନର ଏକ ଗୁରୁତ୍ୱପୂର୍ଣ୍ଣ ଭାଗିଦାରୀ କରିଥିଲେ। ଜିତେଶ ୩୩ ରନର ଏକ ଇନିଂସ ଖେଳିଥିଲେ। ଗୋଟିଏ ପଟେ ଲିଭିଙ୍ଗଷ୍ଟୋନ୍ ୫୪ ରନ୍ର ଇନିଂସ ସମୟରେ ଗୋଟିଏ ଚୌକା ଏବଂ ୫ଟି ଛକା ମାରିଥିଲେ। ଅନ୍ୟପକ୍ଷରେ, ଟିମ୍ ଡେଭିଡ୍ ଶେଷ ଓଭର ପର୍ଯ୍ୟନ୍ତ କ୍ରିଜରେ ରହି ୧୮ ବଲରେ ୩୨ ରନ୍ର ଚମତ୍କାର ଇନିଂସ ଖେଳିଥିଲେ।
ଡରାଇଦେଲେ ସିରାଜ:
ପୂର୍ବତନ ଆରସିବି ଖେଳାଳି ତଥା ବର୍ତ୍ତମାନ ଗୁଜୁରାଟ ଟାଇଟାନ୍ସ ପାଇଁ ଖେଳୁଥିବା ମହମ୍ମଦ ସିରାଜ ବୋଲିଂରେ ହଇଚଇ ସୃଷ୍ଟି କରିଛନ୍ତି। ସେ ୪ ଓଭରରେ ମାତ୍ର ୧୯ ରନ୍ ଦେଇ ୩ ୱିକେଟ୍ ନେଇଥିଲେ। ସାଇ କିଶୋର ଗୁଜୁରାଟର ଦ୍ୱିତୀୟ ସଫଳ ବୋଲର ଥିଲେ, ଯିଏକି ଆରସିବିର ୨ ବ୍ୟାଟରଙ୍କୁ ପାଭିଲିୟନକୁ ପଠାଇଥିଲେ। ତାଙ୍କ ବ୍ୟତୀତ ଅର୍ଶଦ ଖାନ, ପ୍ରସିଦ୍ଧ କୃଷ୍ଣ ଏବଂ ଇଶାନ୍ତ ଶର୍ମା ମଧ୍ୟ ଗୋଟିଏ ଲେଖାଏଁ ୱିକେଟ୍ ନେଇଥିଲେ।
