ମୁମ୍ବାଇ: ପୁଅ ଅମିତ ଠାକରେଙ୍କ ଲାଗି ମହାରାଷ୍ଟ୍ର ନବନିର୍ମାଣ ସେନା (ଏମଏନଏସ୍‌) ମୁଖ୍ୟ ରାଜ ଠାକରେ ବିଜେପିର ପ୍ରଶଂସା କରୁଛନ୍ତି ବୋଲି ଶିବସେନା (ୟୁବିଟି) ନେତା ସଂଜୟ ରାଉତ କହିଛନ୍ତି । ନଭେମ୍ବର ୨୦ରେ ହେବାକୁ ଥିବା ମହାରାଷ୍ଟ୍ର ବିଧାନସଭା ନିର୍ବାଚନରେ ଅମିତ ଠାକରେ ଏମଏନଏସ୍‌ ଟିକେଟରୁ ଭୋଟ ରାଜନୀତିରେ ଡେବ୍ୟୁ କରିବାକୁ ଯାଉଛନ୍ତି । ସେ ମୁମ୍ବାଇର ମହିମ ଆସନରୁ ପ୍ରାର୍ଥୀ ହୋଇଛନ୍ତି । ବୁଧବାର ରାଜ ଠାକରେ କହିଥିଲେ ଯେ, ଏମଏନଏସ୍‌ ଓ ବିଜେପି ନିର୍ବାଚନ ପରେ ମେଣ୍ଟ କରିପାରିବେ ଏବଂ ମୁଖ୍ୟମନ୍ତ୍ରୀ ବିଜେପିରୁ ହିଁ ହେବେ ।  

ଏହାକୁ ନେଇ ସଞ୍ଜୟ ରାଉତ କହିଛନ୍ତି, ‘ଯାହାଙ୍କ ପୁଅ ନିର୍ବାଚନ ଲଢ଼ୁଛନ୍ତି ତାଙ୍କର କଥା କହିବାର ଶୈଳୀ ଦେଖନ୍ତୁ । ଦିନେ ବିଜେପି ଓ ଅମିତ ଶାହଙ୍କୁ ମହାରାଷ୍ଟ୍ରରୁ ବାହାର କରିବାକୁ ଯିଏ କହୁଥିଲେ ସେ ଏବେ ବିଜେପିର ଗୁଣଗାନ କରୁଛନ୍ତି । ମହାରାଷ୍ଟ୍ରରେ ପରବର୍ତ୍ତୀ ମୁଖ୍ୟମନ୍ତ୍ରୀ ମହାବିକାଶ ଅଘାଡ଼ିରୁ ହେବେ ବୋଲି ସଞ୍ଜୟ ରାଉତ ଦାବି କରିଛନ୍ତି ।’ 

ସୂଚନାଯୋଗ୍ୟ, ରାଜ ଠାକରେ ୨୦୧୯ ଲୋକସଭା  ନିର୍ବାଚନରେ ବିଜେପି ବିରୋଧରେ ପ୍ରଚାର କରିଥିଲେ ।  ପରେ ସେ ତାଙ୍କର ପକ୍ଷ ବଦଳାଇଥିଲେ ।  ସେପଟେ ବିଜେପି ଅମିତ ଠାକରେଙ୍କୁ ସମର୍ଥନ ଦେଇଛି । ଫଳରେ ମହିମ ଆସନରେ ତ୍ରିମୁଖୀ ଲଢ଼େଇ ହେବ । ଏହି ଆସନରେ ବିଜେପିର ସହଯୋଗୀ ଶିବସେନାର ସଦାନନ୍ଦ ଶର୍ବଣକର ଏବଂ ବିରୋଧୀ ଶିବସେନା (ୟୁବିଟି)ରୁ ପ୍ରାର୍ଥୀ ହୋଇଛନ୍ତି ମହେଶ ସାଓ୍ବନ୍ତ । 

ଏକାନାଥ ସିନ୍ଦେଙ୍କ ଶିବସେନାର ପ୍ରାର୍ଥୀ ଶର୍ବଣକର ସେହି ଆସନରୁ ହିଁ ନିର୍ବାଚନ ଲଢ଼ିବେ ବୋଲି କହିଛନ୍ତି । ନଭେମ୍ବର ୪ରେ ପ୍ରାର୍ଥୀପତ୍ର ପ୍ରତ୍ୟାହାରର ଶେଷ ଦିନ ଥିବାରୁ ପ୍ରାର୍ଥୀଙ୍କ ମନୋଭାବ ପରିବର୍ତ୍ତନ ହୋଇପାରେ । ବିଜେପି, ନରେନ୍ଦ୍ର ମୋଦୀ ଏବଂ ଅମିତ ଶାହଙ୍କୁ ରାଜ ଠାକରେ ପ୍ରଶଂସା କରିବାକୁ ନେଇ ସଂଜୟ ରାଉତ ତାଙ୍କୁ ଖୁବ ସମାଲୋଚନା କରିଛନ୍ତି । କେବଳ ପୁଅର ରାଜନୈତିକ ସଫଳତା ଲାଗି ରାଜ ଠାକରେ ବିଜେପିକୁ ପ୍ରଶଂସା କରୁଛନ୍ତି ବୋଲି ସଂଜୟ ରାଉତ ଦାବି କରିଛନ୍ତି ।