ନୂଆପଡ଼ା, ୦୬/୦୯ : ନୂଆପଡ଼ା ତରବୋଡ଼ ନବୋଦୟ ବିଦ୍ୟାଳୟରେ ରାଗିଙ୍ଗ୍ ଅଭିଯୋଗ। ସିନିଅର ଛାତ୍ରଙ୍କ ମାଡ଼ରେ ୨୨ ଜଣ ଜୁନିଅର ଛାତ୍ର ଗୁରୁତର। ସମସ୍ତ ଗୁରୁତର ଛାତ୍ରଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ମାଡ଼ ମାରିଥିବା ଯୁକ୍ତ ୨ ଛାତ୍ରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବିରେ ଦଶମ ଶ୍ରେଣୀ ଛାତ୍ରଛାତ୍ରୀ ଧାରଣା ଦେଇଛନ୍ତି।
ସୂଚନାନୁଯାୟୀ, ତରବୋଡ଼ ନବୋଦୟ ବିଦ୍ୟାଳୟରେ ଗୁରୁବାର ରାତି ପ୍ରାୟ ୧୨ଟା ବେଳେ ଯୁକ୍ତ ଦୁଇର ୭ ଜଣ ଛାତ୍ର ଦଶମ ଶ୍ରେଣୀର ସିନିଆର ହାଉସ ଆରାବଲୀରେ ପଶିଥିଲେ। ଏହାପରେ ୨୨ ଜଣ ଛାତ୍ରଙ୍କୁ ଜଣଙ୍କ ପରେ ଜଣଙ୍କୁ ଡାକି କବାଟ ବନ୍ଦ କରି ବାଡି, ଲୁହା ଛଡ, ଓ ଟାଙ୍ଗିଆରେ ମାଡ଼ ମାରିଥିଲେ। ସିନିଅର ଛାତ୍ରଙ୍କ ମାଡ଼ରେ ୨୨ ଜଣ ଦଶମ ଛାତ୍ର ଗୁରୁତର ହୋଇଥିଲେ। ସମସ୍ତ ଗୁରୁତର ଛାତ୍ରଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ଗୁରୁତର ଛାତ୍ରଙ୍କ ମୁଣ୍ଡଠୁ ଗୋଡ଼ ପର୍ଯ୍ୟନ୍ତ ରୋଳା ପଡିଥିବା ଦେଖିବାକୁ ମିଳିଛି। ଜଣେ ଛାତ୍ରୀଙ୍କୁ କମେଣ୍ଟ ମରାକୁ ନେଇ ଏଭଳି ଅଭାବନୀୟ ଘଟଣା ଘଟିଥିବା ସୂଚନା ମିଳିଛି।
ଖବର ପାଇ ଅଭିଭାବକମାନେ ନବୋଦୟ ବିଦ୍ୟାଳୟରେ ପହଞ୍ଚିଥିବା ବେଳେ ଶାନ୍ତି ଶୃଙ୍ଖଳା ରକ୍ଷା ପାଇଁ ଘଟଣାସ୍ଥଳରେ ତରବୋଡ଼ ପୋଲିସ ପହଞ୍ଚିଛି। ସେପଟେ ମାଡ଼ ମାରିଥିବା ଛାତ୍ରଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଦାବିରେ ଦଶମ ଶ୍ରେଣୀ ଛାତ୍ରଛାତ୍ରୀ ଧାରଣା ଦେଇଛନ୍ତି। ଉକ୍ତ ଛାତ୍ରଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ବୋଲି ନୂଆପଡ଼ା ଜିଲ୍ଲାପାଳ ମଧୁସୂଦନ ଦାସ କହିଛନ୍ତି। ଏହି ଘଟଣା ପରେ ନବୋଦୟ ବିଦ୍ୟାଳୟର ୱାଡେନଙ୍କ ଭୂମିକାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।