କେନ୍ଦୁଝର ସଦର, ୨୨।୯: କେନ୍ଦୁଝର ଜିଲ୍ଲା ସଦର ବ୍ଲକ ଅନ୍ତର୍ଗତ ରଘୁନାଥପୁର ଜଜପଶି ଗ୍ରାମରେ ଭାଲୁ ଆତଙ୍କ । ରତ୍ନାକର ମୁଦି ଦିନ ୧୧ଟା ସମୟରେ ଚାଷ ଜମିକୁ ଧାନ ଦେଖିବା ଲାଗି ଯାଇଥିଲେ । ଠିକ୍ ସେତିକି ବେଳେ ନିକଟସ୍ଥ ଜଙ୍ଗଲରୁ ଦୁଇଟି ଭାଲୁ ଆସି ରତ୍ନାକରଙ୍କ ଉପରକୁ ଆକ୍ରମଣ କରିବା ସହ କାମୁଡ଼ିବାକୁ ଲାଗିଲେ । ଭାଲୁ ସହିତ ଦୀର୍ଘ ୧୫ ମିନିଟ୍ ଧରି ରତ୍ନା ସଂଘର୍ଷ କରିବା ପରେ ଭାଲୁକୁ ଏକ ପଥର ମାରିଥିଲେ । ପରେ ସୁଯୋଗ ଦେଖି ରତ୍ନା ସେଠାରୁ ଖସି ଆସିଥିଲେ । ରକ୍ତ ଜୁଡ଼ବୁଡ଼ୁ ଅବସ୍ଥାରେ ନିଜ ଜୀବନ ବଞ୍ଚାଇ ଘରକୁ ଧାଇଁ ଆସିଥିଲେ । ରତ୍ନାଙ୍କ ବାମ ହାତ ବାହୁରେ ଗଭୀର କ୍ଷତ ସୃଷ୍ଟି ହୋଇଥିବା ବେଳେ କପାଳରେ ମଧ୍ୟ ଆଘାତ ଲାଗିଛି । ସ୍ଥାନୀୟ ଲୋକେ ରତ୍ନାଙ୍କୁ ଆମ୍ବୁଲାନ୍ସ ଯୋଗେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଛନ୍ତି ।