ପୁରୀ,୧୯।୪ : ଜାତୀୟ ବକ୍ସିଂ ପ୍ରତିଯୋଗିତାରେ ଓଡ଼ିଶାକୁ ପ୍ରତିନିଧିତ୍ଵ କରୁଥିବା ଚନ୍ଦନ ଥାପାଙ୍କ ସ୍ବପ୍ନ ପୁରୁଣ କରିବାରେ ସହାୟକ ହୋଇଛନ୍ତି ସାଂସଦ ସମ୍ବିତ ପାତ୍ର। ଠିକ ସମୟରେ ଷ୍ଟେସନରେ ପହଞ୍ଚି ନ ପାରିବାରୁ ଟ୍ରେନ ଛାଡି ଚାଲି ଯାଇଥିଲା। ତେବେ ପ୍ରତିଯୋଗିତାରେ ଯୋଗ ଦେବା ପାଇଁ ଚନ୍ଦନଙ୍କୁ ସାଂସଦ ଉଡାଜାହାଜର ଟିକେଟ ପ୍ରଦାନ କରିଥିଲେ। ଫଳରେ ଚନ୍ଦନଙ୍କ ପ୍ରତିଯୋଗିତାରେ ଯୋଗ ଦେବାର ଆଶା ପୂରଣ ହୋଇ ପାରିଛି।
ଜାତୀୟ ବକ୍ସିଂ ପ୍ରତିଯୋଗିତା ଉତ୍ତରପ୍ରଦେଶର ଗ୍ରେଟର ନୋଇଡା ଠାରେ ଅନୁଷ୍ଠିତ ହେବ। ଏଥିପାଇଁ ଟ୍ରେନ ଯୋଗେ ଚନ୍ଦନ ଉତ୍ତରପ୍ରଦେଶ ଯିବାର ଥିଲା। ତେବେ ଶୁକ୍ରବାର ପ୍ରବଳ ବର୍ଷା ହେବା କାରଣରୁ ଚନ୍ଦନ ଷ୍ଟେସନରେ ଠିକ୍ ସମୟରେ ପହଞ୍ଚି ପାରି ନଥିଲେ। ରବିବାର ସକାଳେ ପ୍ରତିଯୋଗୀତା ହେବାକୁ ଥିବାରୁ ଉଡାଜାହାଜରେ ଯିବା ତାଙ୍କର ଏକମାତ୍ର ବିକଳ୍ପ ଥିଲା। ହେଲେ ଚନ୍ଦନଙ୍କ ବାପା ଏକ ବିଦ୍ୟାଳୟରେ ପିଅନ ଭାବେ କାମ କରୁଥିବା ବେଳେ ମା’ ଦିନ ମଜୁରିଆ ଭାବେ କାର୍ଯ୍ୟ କରନ୍ତି। ଏଣୁ ଉଡାଜାହାଜ ଟିକେଟ କାଟି ଯାତ୍ରା କରିବା ତାଙ୍କ ପକ୍ଷେ ଅସମ୍ଭବ ଥିଲା। ଚନ୍ଦନ ଜାତୀୟ ପ୍ରତଯୋଗୀତାରେ ଭାଗ ନେଇ ଓଡ଼ିଶା ତଥା ପୁରୀର ନାଁ ରଖିବାକୁ ଦେଖିଥିବା ସ୍ୱପ୍ନ ପୂରା କରି ପାରିବେନି ବୋଲି ଭାଙ୍ଗି ପଡ଼ିଥିଲେ।
ତେବେ ଏ ଖବର ସାଂସଦ ସମ୍ବିତ ପାତ୍ରଙ୍କ ନିକଟରେ ପହଞ୍ଚିବା କ୍ଷଣି ସେ ତତ୍ କ୍ଷଣାତ ସହଯୋଗର ହାତ ବଢାଇଥିଲେ। ଉତ୍ତରପ୍ରଦଶ ଯିବା ପାଇଁ ଉଡାଜାହାଜ ଟିକେଟ ଚନ୍ଦନଙ୍କ ନିକଟକୁ ପଠାଇଥିଲେ। ଶନିବାର ସନ୍ଧ୍ୟାରେ ସେ ଭୁବନେଶ୍ୱରରୁ ବିମାନ ଯୋଗେ ଉତ୍ତରପ୍ରଦେଶ ଯାଇଛନ୍ତି। ପୁରୀର ଯୁବ ସମାଜସେବୀ ଆଦିତ୍ୟ ନାରାୟଣ ବାରିକ ମଧ୍ୟ ଚନ୍ଦନଙ୍କ ସ୍ଥିତି ଜାଣି ତାଙ୍କୁ ୩୦୦୦ ଟଙ୍କାର ଆର୍ଥିକ ସହଯୋଗ ପ୍ରଦାନ କରିଛନ୍ତି।
