ନୂଆଦିଲ୍ଲୀ,୦୪/୦୪: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରସ୍ତାବିତ ଗସ୍ତକୁ ନେଇ ଆକ୍ସନ ମୋଡ଼ରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ । ଗତକାଲି ବାରାଣସୀରେ ବିକାଶମୂଳକ କାର୍ଯ୍ୟର କରିଛନ୍ତି ସମୀକ୍ଷା। ସର୍କିଟ ହାଉସ ଅଡିଟୋରିୟମରେ ଅଧିକାରୀ ଏବଂ ଜନପ୍ରତିନିଧିଙ୍କ ସହ ଏକ ବୈଠକରେ ମୁଖ୍ୟମନ୍ତ୍ରୀ କହିଛନ୍ତି ଯେ, ପ୍ରଧାନମନ୍ତ୍ରୀଙ୍କ ଦ୍ୱାରା ଉଦ୍ଘାଟନ ଏବଂ ଶିଳାନ୍ୟାସ ହେବାକୁ ଥିବା ପ୍ରକଳ୍ପଗୁଡ଼ିକର ପ୍ରସ୍ତୁତି ସମୟ ମଧ୍ୟରେ ସମାପ୍ତ ହେବା ଉଚିତ।
ସେହିପରି ନମୋ ଘାଟର କିଛି ସ୍ଥାନରେ ଜମି ଧସିବା ଘଟଣାରେ ମୁଖ୍ୟମନ୍ତ୍ରୀ ଯୋଗୀ ଅସନ୍ତୋଷ ପ୍ରକାଶ କରିଛନ୍ତି । ଏଥିସହ ଅଧିକାରୀମାନଙ୍କୁ ଏହାର ଗୁଣବତ୍ତା ଯାଞ୍ଚ କରି ଯଥାଶୀଘ୍ର ମରାମତି କରିବାକୁ ନିର୍ଦ୍ଦେଶ ଦେଇଛନ୍ତି। ବରୁଣା ନଦୀ ସମ୍ମୁଖର ସୌନ୍ଦର୍ଯ୍ୟକରଣ କାର୍ଯ୍ୟକୁ ତ୍ୱରାନ୍ୱିତ କରିବା ପାଇଁ ଏକ ଠୋସ୍ କାର୍ଯ୍ୟ ଯୋଜନା ପ୍ରସ୍ତୁତ କରିବାକୁ ମଧ୍ୟ ସେ ନିର୍ଦ୍ଦେଶ ଦେଇଥିଲେ। ତେବେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ରାଜା ତାଲାବର ମେହେନ୍ଦିଗଞ୍ଜରେ ପ୍ରଧାନମନ୍ତ୍ରୀଙ୍କ ପ୍ରସ୍ତାବିତ ସଭାସ୍ଥଳ ଯାଞ୍ଚ କରିଛନ୍ତି। ସେ ଅଧିକାରୀମାନଙ୍କୁ କହିଛନ୍ତି ଯେ, ସଭାକୁ ଆସୁଥିବା ଲୋକମାନେ ଯେପରି କୌଣସି ଅସୁବିଧାର ସମ୍ମୁଖୀନ ନ ହୁଅନ୍ତି, ସେଥିପାଇଁ ପାନୀୟ ଜଳ, ଛାଇ, ମୋବାଇଲ୍ ଶୌଚାଳୟ ଏବଂ ସୁରକ୍ଷା ପାଇଁ ଉପଯୁକ୍ତ ବ୍ୟବସ୍ଥା କରାଯିବା ଉଚିତ।
ବୈଠକରେ ଜଳ ଜୀବନ ମିଶନ ଅଧୀନରେ ବାରାଣସୀର ୨୧୧ଟି ଗ୍ରାମ ପଞ୍ଚାୟତରେ ହର ଘର ନାଳ ଯୋଜନା ବିଷୟରେ ସୂଚନା ଦେଇଥିଲେ। ମୁଖ୍ୟମନ୍ତ୍ରୀ ଏହି ଯୋଜନାକୁ ଶୀଘ୍ର ସମାପ୍ତ କରିବାକୁ କହିଛନ୍ତି। ତେବେ ବୈଠକରେ ପୋଲିସ କମିଶନର ମୋହିତ ଅଗ୍ରୱାଲ ସୁରକ୍ଷା ବ୍ୟବସ୍ଥା ବିଷୟରେ ସୂଚନା ଦେଇଥିଲେ ଏବଂ ପାଟ୍ରୋଲିଂ ଏବଂ ଅପରାଧ ନିୟନ୍ତ୍ରଣ ବୃଦ୍ଧି ପାଇଁ ନିର୍ଦ୍ଦେଶ ଦେଇଥିଲେ । ଚେନ୍ ସ୍ନାଚିଙ୍ଗ୍, ଡକାୟତି ଏବଂ ମହିଳା ବିରୋଧୀ ଅପରାଧ ରୋକିବା ପାଇଁ ପା ପାଟ୍ରୋଲିଂ ବୃଦ୍ଧି କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ।
