ନୂଆଦିଲ୍ଲୀ,୦୨/୦୪: ଆପଣ ବିଳମ୍ବରେ ସୋସିଆଲ ମିଡିଆ ସ୍କ୍ରୋଲ୍ କଲେ କି? ତେବେ ନୂଆ କ୍ରେଜ୍କୁ ମିସ୍ କରିଦେଲେ । କ୍ରେଜ୍ର ନାଁ ‘ଗିବଲି-ଷ୍ଟାଇଲ୍ ଚିତ୍ର’। ଏକ ବିଚିତ୍ର ଅନ୍ଲାଇନ୍ ଟ୍ରେଣ୍ଡ୍ ରୂପେ ଆରମ୍ଭ ହୋଇଥିବା ଗିବଲି ଚାହୁଁ ଚାହୁଁ ପୂର୍ଣ୍ଣ ବିକଶିତ ସୋସିଆଲ ମିଡିଆ ଘଟଣା ହୋଇଛି । ସେଲିବ୍ରିଟି ଓ ଇନ୍ଫ୍ଲୁଏନ୍ସରଙ୍କଠୁ ଆରମ୍ଭ କରି ସାଧାରଣ ଲୋକ, ସମସ୍ତେ ଏଥିରେ ଲମ୍ଫ ଦେଉଛନ୍ତି । ସମସ୍ତେ ଗର୍ବର ସହିତ ନିଜର ନୂଆ ଆନିମେଟେଡ୍ ଅବତାର ପୋଷ୍ଟ୍ କରୁଛନ୍ତି ଏବଂ କ୍ୟାପ୍ସନ ଲେଖୁଛନ୍ତି ‘ମୁଁ ଗିବଲି ଟ୍ରେଣ୍ଡ୍ ଫଲୋ କରୁଛି ।’ ଏହି ଟ୍ରେଣ୍ଡ୍ ପ୍ରେମରେ ସମସ୍ତେ ପଡ଼ିଛନ୍ତି । କିନ୍ତୁ ଗିବଲିକୁ ନେଇ ଯଦି ଆପଣ ଦ୍ୱନ୍ଦ୍ୱରେ ଅଛନ୍ତି, ତେବେ ଏହି ଖବର ଆପଣଙ୍କ ପାଇଁ । ଏହି ନିର୍ଦ୍ଦିଷ୍ଟ ଷ୍ଟାଇଲ୍ରେ ଏମିତି କ’ଣ ଅଛି, ଯାହାକୁ ନେଇ ଇଣ୍ଟର୍ନେଟ୍ ପାଗଳ? ଚାଟ୍ଜିପିଟିର ଏହି ନୂଆ ଫିଚର୍ ଏତେ ସହଜ ଯେ ସମସ୍ତେ ଏଥିପ୍ରତି ଆକର୍ଷିତ ହେଉଛନ୍ତି ।
ଗିବଲି ପୋଟ୍ରେଟ୍ ବା ଚିତ୍ର ହେଉଛି ଏକ ସ୍ୱତନ୍ତ୍ର ଲୁକ୍ । ‘ଷ୍ଟୁଡିଓ ଗିବଲି’ର ବିଶ୍ୱପ୍ରସିଦ୍ଧ ଆନିମେସନ୍ ଷ୍ଟାଇଲ୍ର ଅନୁଭବକୁ ହାସଲ କରିବାର ଏହା ସହଜ ଉପାୟ । ଷ୍ଟୁଡିଓ ଗିବଲି ଏକ କିମ୍ବଦନ୍ତୀ ଜାପାନିଜ୍ ଆନିମେସନ୍ ଷ୍ଟୁଡିଓ । ‘ସ୍ପିରିଟେଡ୍ ଆୱେ’, ‘ମାଇଁ ନେବର୍ ଟୋଟୋରୋ’ ଓ ‘ହଉଲ୍ସ ମୁଭିଂ କ୍ୟାସଲ୍’ ଭଳି ଦମ୍ଦାର ଫିଲ୍ମ ନିର୍ମାଣ ପାଇଁ ଏହା ବେଶ ଜଣାଶୁଣା । ଫିଲ୍ମରେ ଷ୍ଟୁଡିଓ ଦ୍ୱାରା ହାତ ତିଆରି କଳାକୃତିଗୁଡ଼ିକୁ ଚିହ୍ନିବା ସହଜ । ଚିତ୍ରରେ ଆଖିକୁ ସୁନ୍ଦର ଦିଶିବା ଭଳି ହାଲୁକା ରଙ୍ଗ ଦିଆଯାଏ । ମନମୋହକ ଚରିତ୍ର ଏବଂ ଯୁଦୁକରୀ ଦୃଶ୍ୟସବୁ ସ୍ୱପ୍ନ ଭଳି ମନେହୁଏ । ଗିବଲି ଷ୍ଟାଇଲ୍ ତା’ର ଲୁକ୍ଠୁ ଢେର ଅଧିକ । ଏହା ପୁରୁଣା ସ୍ମୃତିକୁ ନୂଆ ଢଙ୍ଗରେ ଉଜାଗର କରେ ଓ ଆଶ୍ଚର୍ଯ୍ୟକର ଭାବନା ସୃଷ୍ଟି କରେ । ଲୋକ ଓ ପ୍ରକୃତି ସହ ଶକ୍ତିଶାଳୀ ବନ୍ଧନ ମଧ୍ୟ ସୃଷ୍ଟି କରେ । ତେଣୁ ଆପଣଙ୍କ ସୋସିଆଲ ମିଡିଆ ଫିଡ୍ରେ ଯେତେବେଳେ ଏହି ଚିତ୍ରସବୁ ନଜର ଆସେ, ଗିବଲିର ଆନିମେଟେଡ୍ ଦୁନିଆ ମାଧ୍ୟମରେ ସାଧାରଣ ଫଟୋକୁ ଏହା ଯାଦୁକରୀ କଳାକୃତିରେ ରୂପାନ୍ତରିତ କରେ ।
ଚାଟ୍ଜିପିଟିର ସଦ୍ୟ ଅପ୍ଡେଟ୍ ଯୋଗୁ ଗିବଲି ଇଣ୍ଟର୍ନେଟ୍ ଜଗତରେ ଚହଳ ପକାଇଛି । ଓପନ୍ଏଆଇର ଏହା ଏକ ନୂଆ ଟୁଲ୍, ଯାହା ସାହାଯ୍ୟରେ ୟୁଜର୍ ନିଜ ଫଟୋକୁ ଆନିମେସନ୍ ଷ୍ଟାଇଲ୍ ଫଟୋରେ ରୂପାନ୍ତରିତ କରୁଛନ୍ତି । ଏହି ଟୁଲ୍ରେ ଏକ ଫିଚର୍କୁ ଯୋଡ଼ାଯାଇଛି, ଯାହା ସ୍ୱତନ୍ତ୍ର ରୂପେ ଫଟୋଗୁଡ଼ିକୁ ଗିବଲି ଷ୍ଟାଇଲ୍ରେ ରୂପାନ୍ତରିତ କରିବାକୁ ଡିଜାଇନ୍ ହୋଇଛି । ଏହା ଲୋକଙ୍କୁ ସେମାନଙ୍କ ସାଧାରଣ ସେଲ୍ଫି, ପରିବାର ଫଟୋ କିମ୍ବା ଭାଇରାଲ ଚିତ୍ରଗୁଡ଼ିକୁ ଗିବଲି-ପ୍ରେରିତ ମାଷ୍ଟର୍ପିସ୍ ଚିତ୍ରରେ ରୂପାନ୍ତରିତ କରିବାର ସୁଯୋଗ ଦେଇଛି । ଗୋଟିଏ କ୍ଲିକ୍ରେ ଆପଣଙ୍କ ସାଧାରଣ ଫଟୋ ସୁନ୍ଦର ଆନିମେଟେଡ୍ ଛବିରେ ବଦଳି ଯାଉଛି । ଏବେ ଏହା କେବଳ ଆନିମେସନ୍ ଫ୍ୟାନ୍ କିମ୍ବା କଳାକାରଙ୍କ ମଧ୍ୟରେ ସୀମିତ ହୋଇନାହିଁ । ଯେ କେହି ଏହାର ଲାଭ ଉଠାଇ ପାରିବେ । ହାତରେ ଅଙ୍କାଯାଉଥିବା ଆନିମେସନ୍ ପାଇଁ ଗିବଲି ଷ୍ଟାଇଲ୍ ଏତେ ଆକର୍ଷକ ହୋଇଛି । ଅଧିକାଂଶ ଆଧୁନିକ ଫିଲ୍ମରେ ଆମେ ଦେଖୁଥିବା ହାଇଟେକ୍ ଆନିମେସନ୍ ଷ୍ଟାଇଲ୍ଠୁ ଏହା ଭିନ୍ନ । ଗିବଲିର କଳା ଅତ୍ୟନ୍ତ ଚିତ୍ତାକର୍ଷକ । ହାତରେ କଳାକୃତିର ଅନୁଭବକୁ ନକଲ କରିବା କଷ୍ଟକର ।
ଅତ୍ୟନ୍ତ କୋମଳ ଓ ହାଲୁକା ରଙ୍ଗ, ସ୍ପଷ୍ଟଭାବେ ସବିଶେଷ ବର୍ଣ୍ଣନା କରୁଥିବା ପ୍ରଚ୍ଛଦ ଏବଂ ସାଧାରଣ ଚରିତ୍ର ଡିଜାଇନ୍ ଲୋକଙ୍କୁ ସ୍ୱର୍ଗୀୟ ଅନୁଭବ ପ୍ରଦାନ କରୁଛି । ସେଥିପାଇଁ ସବୁ ବୟସର ଲୋକ ଏହାକୁ ପସନ୍ଦ କରୁଛନ୍ତି । ବ୍ୟକ୍ତିଗତ ରୂପାନ୍ତରଣ ଛବିଠୁ ଆରମ୍ଭ କରି ବ୍ରାଣ୍ଡ୍ମାନେ ନିଜସ୍ୱ ଗିବଲି-ଷ୍ଟାଇଲ୍ ବିଜ୍ଞାପନ ଜରିଆରେ ସୃଜନଶୀଳ ହେଉଛନ୍ତି । ଏହି କ୍ରମରେ ଜୋମାଟୋ, ସ୍ୱିଗି ଭଳି କମ୍ପାନି ଏଥିରେ ଲମ୍ଫ ଦେଇଛନ୍ତି । ସେମାନେ ନିଜର ବ୍ରାଣ୍ଡ୍ ଫଟୋକୁ ଜିବଲିଷ୍ଟାଇଲ୍ ଛବିରେ ରୂପାନ୍ତର କରୁଛନ୍ତି ଏବଂ ଆକର୍ଷଣୀୟ କ୍ୟାପ୍ସନ ସହିତ ସେଗୁଡ଼ିକୁ ଶେୟାର କରୁଛନ୍ତି । କଳା ଓ ସୃଜନଶୀଳତାକୁ ସମସ୍ତଙ୍କ ପାଖରେ ପହଞ୍ଚାଇବାରେ ଆର୍ଟିଫିସିଆଲ ଇଣ୍ଟେଲିଜେନ୍ସର ବୃଦ୍ଧି ପାଉଥିବା ଭୂମିକା ଉପରେ ଏହି ଟ୍ରେଣ୍ଡ୍ ଆଲୋକପାତ କରିଛି । ଅତୀତରେ ଏକ କଳାକୃତି ପ୍ରସ୍ତୁତ କରିବା ଗିବଲିର ଅଦ୍ୱିତୀୟ କୌଶଳ ଭଳି ଅନନ୍ୟ ଓ ସମୟସାପେକ୍ଷ ଥିଲା । ଏବେ ଚାଟ୍ଜିପିଟି ଭଳି ଏଆଇ ଟୁଲ୍ ଏହାକୁ ସହଜ କରିଛି । ଆପଣ ଜଣେ କଳାକାର ହେବା ଆବଶ୍ୟକ ନାହିଁ, ଏଆଇ ଟୁଲ୍ ଜରିଆରେ ଆପଣ ନିଜର ଗିବଲି-ପ୍ରେରିତ ଚିତ୍ର ପ୍ରସ୍ତୁତ କରିପାରିବେ ।
