ପାତ୍ରପୁର,୧୫/୫ : ଗଞ୍ଜାମ ଜିଲ୍ଲା ପାତ୍ରପୁର ବ୍ଲକ ଜରଡ଼ା ଥାନା ଅନ୍ତର୍ଗତ ଅଣ୍ଡଅଣ୍ଡା ନିକଟରେ ଏକ ଯାତ୍ରୀବାହୀ ମହିନ୍ଦ୍ରା ମ୍ୟାକ୍ସ ପିକଅପ ଭ୍ୟାନ୍ ଭରସାମ୍ୟ ହରାଇ ଓଲଟିପଡ଼ିଛି । ଫଳରେ ଫଳରେ ଗାଡ଼ିରେ ଥିବା ୩୦ରୁ ଊର୍ଦ୍ଧ୍ବ ଆହତ ହୋଇଛନ୍ତି । ସେମାନଙ୍କ ମଧ୍ୟରୁ ପ୍ରାୟ ୧୦ଜଣଙ୍କ ଅବସ୍ଥା ଗୁରୁତର ରହିଛି । ସମସ୍ତ ଆହତଙ୍କୁ ପାତ୍ରପୁର ଅଗ୍ନିଶମ ବାହିନୀ ଓ ସ୍ଥାନୀୟ ଲୋକଙ୍କ ସହାୟତାରେ ପାତ୍ରପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଅଣାଯାଇଥିଲା । ଆହତଙ୍କ ଆଶୁ ଚିକିତ୍ସା କରାଯିବା ପରେ ଗୁରୁତରଙ୍କୁ ବ୍ରହ୍ମପୁର ବଡ଼ ମେଡ଼ିକାଲ ପଠାଯାଇଛି ।
ସୂଚନା ଅନୁସାରେ ଆସ୍କା ଅଂଚଳର କିଛି ବ୍ୟକ୍ତି ମହେନ୍ଦ୍ରଗିରି ଦର୍ଶନ ପାଇଁ ଗୁରୁବାର ସକାଳୁ ଯାଇଥିଲେ । ସନ୍ଧ୍ୟାରେ ଫେରୁଥିବା ସମୟରେ ଅଣ୍ଡଅଣ୍ଡା ନିକଟରେ ଗାଡ଼ିଟି ଭାରସାମ୍ୟ ହରାଇ ଓଲଟି ପଡିଥିଲା । ଗାଡ଼ିରେ ବସିଥିବା ପ୍ରାୟ ସମସ୍ତଙ୍କୁ ଆଘାତ ଲାଗିଛି । ଆହତଙ୍କ ମଧ୍ୟରେ ୫ଜଣ ଶିଶୁ ରହିଛନ୍ତି । ପାତ୍ରପୁର ମେଡ଼ିକାଲରେ ବହୁ ସ୍ୱେଚ୍ଛାସେବୀ ଉପସ୍ଥିତ ରହି ଦୁର୍ଘଟଣାଗ୍ରସ୍ତଙ୍କୁ ସହଯୋଗ କରୁଛନ୍ତି ।
