ବାସୁଦେବପୁର,୨୮/୦୫: ଗାଁ ଦାଣ୍ଡରେ ଆଣ୍ଠୁଏ ପାଣି । ବନ୍ୟା ପରି ପରିସ୍ଥିତିରେ ଲୋକେ ହନ୍ତସନ୍ତ । ଭଦ୍ରକ ଜିଲ୍ଲା ବାସୁଦେବପୁର ବ୍ଲକ ନରସିଂହପୁର ପଞ୍ଚାୟତ ଚକ ଗାଁରେ ବର୍ଷା ପାଣି ଅବରୋଧକୁ ନେଇ ତୁମୁଳ କାଣ୍ଡ ହୋଇଛି । ଚକ ଗାଁର ସେକ ଇନୁ ଖାନ ନାମକ ବ୍ୟକ୍ତି ନିଜର ପଟ୍ଟା ଜମି ସହିତ କିଛି ସରକାରୀ ଜମିକୁ ମାଟି ପକାଇ ପୋତି ଦେଇଥିଲେ । ଫଳରେ ବର୍ଷା ପାଣି ନିଷ୍କାସିତ ହୋଇପାରୁନଥିବାରୁ ଗାଁ ଦାଣ୍ଡରେ ଆଣ୍ଠୁଏ ପାଣି ଛିଡ଼ା ହୋଇଛି । ଫଳରେ ବନ୍ୟା ପରି ସ୍ଥିତି ଉପୁଜିଛି ।
ଉକ୍ତ ସରକାରୀ ଜମି ଦେଇ ଗାଁର ସମସ୍ତ ପାଣି ନିଷ୍କାସନ ହୋଇଥାଏ । ହେଲେ ଲଗାଣ ଲଘୁଚାପ ଜନିତ ବର୍ଷା ପାଣି ନିଷ୍କାସିତ ହୋଇ ନପାରି ଗାଁରେ ଜମା ହୋଇ ରହିଛି । ଫଳରେ ଗାଁ ଦାଣ୍ଡରେ ଆଣ୍ଠୁଏ ଉଚ୍ଚରେ ପାଣିଛିଡା ହୋଇଛି । ଘରେ ବି ପାଣି ପସିଯାଉଥିବା ଅଭିଯୋଗ ହୋଇଛି । ଖବରପାଇ ସ୍ଥାନୀୟ ସରପଞ୍ଚ ଗୌରାଙ୍ଗ ପଣ୍ଡା ପହଞ୍ଚି ଗ୍ରାମବାସୀଙ୍କ ସହିତ ପାଣି ଅବରୋଧ କରିଥିବା ବ୍ୟକ୍ତିକୁ ଡାକି ପଚରା ଉଚରା କରିଥିଲେ । ଏହି ସମୟରେ ବଚସା ହେବା ସହିତ ଗାଁ ଲୋକ ମାଡପିଟ୍ ଲାଗି ଯାଇଥିଲେ । ଉଭୟ ପକ୍ଷରୁ ଗଣ୍ଡଗୋଳ ହୋଇଥିଲା । ମାରପିଟ୍ରେ କିଛି ଲୋକ ଆହତ ହୋଇଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚିବା ପରେ ଉତ୍ତେଜନା ଶାନ୍ତ ପଡିଥିଲା।
