ଜଗତପୁର,୧୧/୧୦: ଫିଲ୍ମ ଷ୍ଟାଇଲରେ ବାଇକ୍ରେ ଆସିଲେ । କଳି ଝଗଡ଼ା କଲେ ପରେ ଘରୁ ଯୁବକଙ୍କୁ ଉଠାଇ ନେଲେ ଦୁର୍ବୃତ୍ତ । ସ୍ଥାନୀୟ ଲୋକେ ବିରୋଧ କରି ଅପହରଣକାରୀଙ୍କୁ ଅଟକାଇବାକୁ ଚେଷ୍ଟା କରିଲେ । ଆକ୍ରମଣର ଶିକାର ହୋଇ ଅପହରଣକୁ ଅଟକାଇଲେ । କଟକ ଜିଲ୍ଲା ଜଗତପୁର ଥାନା ନଜରପୁରରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଗୁରୁବାର ରାତି ଅଧରେ କଟକ ମଙ୍ଗଳାବାଗ, ରାଣିହାଟ ଏବଂ ଶଗଡ଼ିଆ ସାହିର କିଛି ଅସାମାଜିକ ଯୁବକଙ୍କ ସହିତ ଏସ୍ସିବି ମେଡିକାଲର ମହିଳା ନର୍ସିଂ ଅଫିସର ମିଶି ନଜରପୁର ଗ୍ରାମର ରଶ୍ମୀ ନାମକ ଜଣେ ଯୁବକକୁ ଅପହରଣ କରିବାକୁ ଉଦ୍ୟମ କରୁଥିଲେ । ଏହି ସମୟରେ ଗ୍ରାମବାସୀଙ୍କ ହାବୁଡ଼ରେ ପଡ଼ି ଅପହରଣ ଯୋଜନା ପଣ୍ଡ ହୋଇଥିଲା । ସମସ୍ତ ଦୁର୍ବୃତ୍ତଙ୍କୁ ଗ୍ରାମବାସୀ ଧରି ପୋଲିସକୁ ଏହି ଘଟଣା ସମ୍ୱନ୍ଧରେ ଖବର ଦେଇଥିଲେ । ଏହାରି ମଧ୍ୟରେ ଅପହରଣକାରୀଙ୍କ ଆକ୍ରମଣରେ କିଛି ଗ୍ରାମବାସୀ ଗୁରୁତର ହୋଇଥିଲେ । ଖବର ପାଇ ଜଗତପୁର ପୋଲିସ ଘଟଣାସ୍ଥଳରେ ପହଞ୍ଚି ଥିଲା । ସେଠାରେ ପହଞ୍ଚି ୧୦ ଜଣ ଅପହରଣକାରୀଙ୍କୁ ଅଟକ ରଖି ଅଧିକ ତଦନ୍ତ କରୁଛି । ଏହା ସହ ଗୁରୁତରଙ୍କୁ କଟକ ବଡ଼ ଡ଼ାକ୍ତରଖାନାକୁ ଚିକିତ୍ସା ପାଇଁ ପଠାଇଛି ପୋଲିସ ।
ସବୁଠାରୁ ବଡ଼କଥା ଏହି ଅପହରଣରେ ଏସ୍ସିବି ମେଡିକାଲର ମହିଳା ନର୍ସିଂ ଅଫିସର ମଧ୍ୟ ସାମିଲ୍ ଥିବା ସୂଚନା ମିଳିଛି । ଘଟଣାସ୍ଥଳରେ ଚାପା ଉତେଜନା ଲାଗିଥିବା ବେଳେ ଜଗତପୁର ଥାନାରେ ପ୍ରଥମ ପକ୍ଷ ଏତଲା ପରେ ଘଟଣାର ତଦନ୍ତ କରୁଛି ପୋଲିସ l
