ନୂଆଦିଲ୍ଲୀ,୦୭/୦୭: ଆଗାମୀ ପ୍ୟାରିସ୍ ଅଲିମ୍ପିକ୍ସକୁ ଆଉ ମାତ୍ର ୧୮ ଦିନ ବାକି ରହିଲା । ଅଲିମ୍ପିକ୍ କ୍ରୀଡ଼ା ମହାକୁମ୍ଭ ଆସନ୍ତା ୨୬ ତାରିଖରୁ ଆରମ୍ଭ ହୋଇ ଅଗଷ୍ଟ ୧୧ ତାରିଖରେ ଶେଷ ହେବ । ମାତ୍ର ୨୪ ତାରିଖରୁ ରଗବୀ-୭ ଏବଂ ଫୁଟବଲ୍ର ଗ୍ରୁପ୍ ପର୍ଯ୍ୟାୟ ମ୍ୟାଚ୍ ଆରମ୍ଭ ହୋଇଯିବ । ଆଜି ଭାରତୀୟ ଦଳର କ୍ରୀଡ଼ାସୂଚୀ ସ୍ପଷ୍ଟ ହୋଇଛି । ଜୁଲାଇ ୨୫ ତାରିଖରୁ ଭାରତ ଅଭିଯାନ ଆରମ୍ଭ କରିବ ଏବଂ ଅନ୍ତିମ ଦିବସ (ଅଗଷ୍ଟ ୧୧)ରେ ମହିଳା ରେସଲର ଋତିକା ହୁଡ଼ା ଶେଷ ଇଭେଣ୍ଟରେ ପ୍ରତିଦ୍ୱନ୍ଦ୍ୱୀତା କରିବେ । ଅଗଷ୍ଟ ୬ ତାରିଖରେ ବହୁ ପ୍ରତୀକ୍ଷିତ ପୁରୁଷ ଜାଭେଲିନ ଥ୍ରୋ ଇଭେଣ୍ଟର ଯୋଗ୍ୟତା ରାଉଣ୍ଡ୍ ରହିଛି । ଏଥିରେ ନୀରଜ ଚୋପ୍ରା ଏବଂ ଓଡ଼ିଶାର କିଶୋର କୁମାର ଜେନା ମୁଖ୍ୟ ଆକର୍ଷଣ ହେବେ ।
ଏଥର ଭାରତରୁ ମୋଟ ୧୧୧ଜଣ ଅଲିମ୍ପିକ୍ସକୁ ଯୋଗ୍ୟତା ଅର୍ଜନ କରିଛନ୍ତି । ଆଥଲେଟିକ୍ସରେ ସର୍ବାଧିକ ୨୮ଜଣ ରହିଥିବାବେଳେ ସୁଟିଂରେ ୨୧ଜଣ ସାମିଲ ରହିଛନ୍ତି । ଜୁଲାଇ ୨୫ ତାରିଖରେ ତୀରନ୍ଦାଜୀ କ୍ରୀଡ଼ାରୁ ଭାରତୀୟଙ୍କ ଅଲିମ୍ପିକ୍ସ ଅଭିଯାନ ଆରମ୍ଭ ହେବ । ୨୭ ତାରିଖ ସୁଟିଂରେ ପଦକ ଇଭେଣ୍ଟ ରହିଛି । ଅର୍ଜୁନ ବାବୁତା, ଏଲାଭେନିଲ ଭାଲାରିଭାନ ଓ ରମିତା ପଦକ ଇଭେଣ୍ଟରେ ଲଢ଼େଇ କରିବେ । ଅଗଷ୍ଟ ୧ ତାରିଖରୁ ଆଥଲେଟିକ୍ ଇଭେଣ୍ଟ ଆରମ୍ଭ ହେବ ।
ଭାରତୀୟ ହକି ଦଳର ଜର୍ସି ଉନ୍ମୋଚିତ: ବେଙ୍ଗାଲୁରୁ ଠାରେ ଥିବା ସାଇ ସେଣ୍ଟରରେ ଆଜି ଭାରତୀୟ ପୁରୁଷ ହକି ଦଳର ଜର୍ସି ଉନ୍ମୋଚନ କରାଯାଇଥିଲା । ଜାତୀୟ ଶିବିର ଶେଷ ହେବା ପରେ ହକି ଦଳ ସ୍ୱିଜରଲାଣ୍ଡ୍ ଗସ୍ତ କରି ପ୍ରଶିକ୍ଷଣ ନେବ । ଏହାପରେ ସ୍ୱିଜରଲାଣ୍ଡ୍ରୁ ନେଦରଲାଣ୍ଡ୍ସ ଯିବ । ସେଠାରେ କିଛି ଅଭ୍ୟାସ ମ୍ୟାଚ୍ ଖେଳି ଅଲିମ୍ପିକ୍ସ ପାଇଁ ପ୍ରସ୍ତୁତି କରିବ । ନେଦରଲାଣ୍ଡ୍ସରୁ ଭାରତୀୟ ହକି ଦଳ ପ୍ୟାରିସ୍ ଅଭିମୁଖେ ଯାତ୍ରା କରିବ।