ନୂଆଦିଲ୍ଲୀ: ପାକିସ୍ତାନର ସରକାରୀ ଏୟାର ଲାଇନ୍ର ହାଲ୍ ବେହାଲ ହୋଇପଡ଼ିଛି । ଯନ୍ତ୍ରାଂଶ ଏବଂ ଅନ୍ୟ ଉପକରଣର ଅଭାବ ଯୋଗୁଁ ଏବେ ପାକିସ୍ତାନ ଇଣ୍ଟରନ୍ୟାସନାଲ୍ ଏୟାର ଲାଇନ୍ସ (ପିଆଇଏ) ବନ୍ଦ ହେବାକୁ ବସିଲାଣି । ମୋଟ ୩୪ ବିମାନରୁ ୧୭ଟି ଏବେ ଉଡ଼ାଣ ଭରିବାକୁ ସକ୍ଷମ ନାହିଁ । ବର୍ତ୍ତମାନ ଏୟାର ଲାଇନ୍ର ୧୨ଟି ୭୭୭ ବୋଇଂ ବିମାନ ମଧ୍ୟରୁ ୭ଟି ବିମାନ ଏୟାରପୋର୍ଟରେ ହିଁ ଛିଡ଼ା ହୋଇଛି । ପିଆଇଏ ପାଖରେ ଥିବା ୧୭ଟି ଏୟାରବସ୍ ଏ ୩୨୦ ବିମାନ ମଧ୍ୟରୁ ୭ଟି କାର୍ଯ୍ୟକ୍ଷମ ଅବସ୍ଥାରେ ନଥିବା ଜଣାପଡ଼ିଛି । ଏପରିକି ପିଆଇଏର ଛୋଟ ବିମାନଗୁଡ଼ିକର ମଧ୍ୟ ଅବସ୍ଥା ସମାନ । ୫ ଛୋଟ ବିମାନ ମଧ୍ୟରୁ କେବଳ ଦୁଇଟି ବିମାନ ଉଡ଼ାଣ ଭରିପାରୁଛି ।
ଉଡ଼ାଣ ଭରିବାକୁ ସକ୍ଷମ ନଥିବା ବିମାନରେ ଇଞ୍ଜିନ, ଲ୍ୟାଣ୍ଡିଂ ଗିୟର, ଏପିୟୁ ଏବଂ ଅନ୍ୟ ଗୁରୁତ୍ବପୂର୍ଣ୍ଣ ଯନ୍ତ୍ରାଂଶ ଅଚଳ ହୋଇପଡ଼ିଛି । ଏୟାର ଲାଇନ୍ କର୍ତ୍ତୃପକ୍ଷଙ୍କ ପାଖରୁ ମିଳିଥିବା ସୂଚନା ଅନୁସାରେ, ଆର୍ଥିକ ଦୂରାବସ୍ଥା ଏବଂ ସମ୍ପର୍କିତ ମନ୍ତ୍ରାଳୟ ପାଖରୁ ଉଚିତ ମଞ୍ଜୁରି ନମଳିବା ଯୋଗୁଁ ପିଆଇଏର ଅବସ୍ଥା ସଙ୍ଗୀନ ହୋଇପଡ଼ିଛି । ରାଷ୍ଟ୍ରୀୟ ଏୟାର ଲାଇନ୍ର ପରିଚାଳନା କ୍ଷମତା ଗୁରୁତର ଭାବରେ ପ୍ରଭାବିତ ହୋଇଛି । ଏଭଳି ସ୍ଥିତିରେ ଦୀର୍ଘ ୪ ବର୍ଷର ପ୍ରତିବନ୍ଧକ ପରେ ଜାନୁଆରୀ ୧୦ରେ ୟୁରୋପ ଉଡ଼ିବାକୁ ପ୍ରସ୍ତୁତ ହେଉଥିବା ପିଆଇଏ ଲାଗି ଏହା ବଡ଼ ଆହ୍ବାନ ପାଲଟିଛି । ଯଦି ସ୍ଥିତି ଏଭଳି ଜାରି ରହେ ତେବେ ୟୁରୋପ ଲାଗି ବିମାନ ଉଡ଼ାଣ ପାଇଁ ଆହୁରି ବିଳମ୍ବ ହୋଇପାରେ ।
ସେପଟେ ପିଆଇଏ ସଂପୂର୍ଣ୍ଣ ଘରୋଇକରଣ ହେବାର ସମ୍ଭାବନା ପ୍ରତି ମଧ୍ୟ ବିପଦ ଘନେଇଛି । ପିଆଇଏର ୬୦ ପ୍ରତିଶତ ଅଂଶଧନ ଘରୋଇ କମ୍ପାନିକୁ ବିକ୍ରି କରିବାକୁ ଯୋଜନା କରୁଛନ୍ତି ପାକିସ୍ତାନ ସରକାର । ସବୁଠୁ ବଡ଼ କଥା ହେଉଛି, ଘରୋଇ ସଂସ୍ଥା ପିଆଇଏରେ ନିବେଶ କରିବାକୁ ଆଗ୍ରହ ପ୍ରକାଶ କରୁନାହାନ୍ତି । ୬୦ ପ୍ରତିଶତ ଅଂଶଧନ ଲାଗି କମ୍ପାନି କେବଳ ୧୦ ବିଲିୟନ୍ ପାକିସ୍ତାନ ଟଙ୍କା ଦେବାକୁ ରାଜି ଥିବା କୁହାଯାଉଛି । ହେଲେ ଏଥିରେ ସରକାର ଖୁସି ନଥିବା ବେଳେ ପୁଣି ଥରେ ନିଲାମ ପାଇଁ ପ୍ରକ୍ରିୟା ଆରମ୍ଭ କରିଛନ୍ତି ।
