ନୂଆଦିଲ୍ଲୀ: ଆତଙ୍କବାଦୀ ମାନେ ପୁଣି ଥରେ ପାକିସ୍ତାନ ଉପରେ ଆକ୍ରମଣ କରିଛନ୍ତି। ପାକିସ୍ତାନର ଅଶାନ୍ତ ବାଲୁଚିସ୍ତାନ ପ୍ରଦେଶରେ ସଶସ୍ତ୍ର ଆତଙ୍କବାଦୀ ମାନେ ଏକ ପୋଲିସ ପୋଷ୍ଟ ଉପରେ ଆକ୍ରମଣ କରିଛନ୍ତି । ଆକ୍ରମଣ କରିବା ପରେ, ଆତଙ୍କବାଦୀ ମାନେ ନିକଟସ୍ଥ ଏକ ସିମେଣ୍ଟ କାରଖାନାର ଯନ୍ତ୍ରପାତି ଏବଂ ଉପକରଣରେ ନିଆଁ ଲଗାଇ ଦେଇଛନ୍ତି । ଏନେଇ ଅଧିକାରୀ ମାନେ ସୂଚନା ଦେଇଛନ୍ତି। ଏହି ଘଟଣା ଗୁରୁବାର ମାସ୍ତୁଙ୍ଗ ସହରରେ ଘଟିଛି ବୋଲି ଅଧିକାରୀ ମାନେ କହିଛନ୍ତି।
ଘଟଣା ସମ୍ପର୍କରେ ଜଣେ ପୋଲିସ ଅଧିକାରୀ କହିଛନ୍ତି ଯେ, ସୁରକ୍ଷା କର୍ମୀମାନେ ପୋଲିସ ପୋଷ୍ଟରେ ଡ୍ୟୁଟି ବଦଳ କରୁଥିବା ସମୟରେ ଏହି ଆକ୍ରମଣ ହୋଇଛି। ସଶସ୍ତ୍ର ଆତଙ୍କବାଦୀ ମାନେ ପୋଲିସ ଠାରୁ ବନ୍ଧୁକ, ଗୁଳିଗୋଳା, ୱାୟାରଲେସ୍ ସେଟ୍, ମୋଟର ସାଇକେଲ ଛଡ଼ାଇ ନେଇଛନ୍ତି ଏବଂ ସିମେଣ୍ଟ କାରଖାନାରେ ଥିବା ଯନ୍ତ୍ରପାତିରେ ନିଆଁ ଲଗାଇ ଦେଇଛନ୍ତି । ତେବେ ସୁରକ୍ଷା କର୍ମୀମାନେ ଘଟଣାସ୍ଥଳରେ ପହଞ୍ଚିବା ପୂର୍ବରୁ ଆତଙ୍କବାଦୀ ମାନେ ପଳାଇ ଯାଇଥିଲେ।
ତେବେ ଏହି ଆକ୍ରମଣରେ କୌଣସି କ୍ଷତି ହୋଇନାହିଁ ବୋଲି ସୂତ୍ରରୁ ଜଣାପଡ଼ିଛି। ରିପୋର୍ଟ ଅନୁସାରେ, ଆତଙ୍କବାଦୀ ମାନେ ଖସିଯିବା ପୂର୍ବରୁ ଏକ ବ୍ୟାଙ୍କ ଲୁଟ କରିଥିଲେ ଏବଂ ଏକ ପୋଲିସ ଷ୍ଟେସନ ଜାଳି ଦେଇଥିଲେ।
