ନୂଆଦିଲ୍ଲୀ: କାନାଡ଼ା ରାଜନୀତିରେ ଘଡିକେ ଘୋଡା ଛୁଟୁଛି। କେତେବେଳେ ବିରୋଧିଙ୍କ ହଟ୍ଟଗୋଳ ତ କେତେବେଳେ ଶାସକ ଦଳରେ ଥିବା ନେତାଙ୍କ ଅପ୍ରିତୀକର ବୟାନ କାନାଡ଼ା ରାଜନୀତିକୁ ଉଷ୍ମ କରୁଛି। ୯ ବର୍ଷ ପ୍ରଧାନମନ୍ତ୍ରୀ ପଦରେ ରହିବା ପରେ ଜାନୁଆରୀ ୬ ତାରିଖ ଦିନ ଜଷ୍ଟିନ ଟ୍ରୁଡୋ ନିଜ ପଦରୁ ଇସ୍ତଫା ପ୍ରଦାନ କରିଥିଲେ। ଏହି ପରିପ୍ରେକ୍ଷିରେ କାନାଡ଼ାର ଲିବେରାଲ ଦଳ ନିଜ ଦଳର ମୁଖିଆ ତଥା ଦେଶର ପରବର୍ତ୍ତୀ ପ୍ରଧାନମନ୍ତ୍ରୀଙ୍କୁ ମାର୍ଚ୍ଚ ୯ ରେ ବାଛିବ ବୋଲି ଘୋଷଣା କରିଛି। 

“ଏକ ମଜବୁତ ଓ ସୁରକ୍ଷା ପ୍ରକ୍ରିୟା ମାଧ୍ୟମରେ କାନାଡ଼ାର ଲିବରାଲ ପାର୍ଟି ନୂଆ ମୁଖିଆଙ୍କୁ ଚୟନ କରିବାକୁ ଯାଉଛି। ତେବେ ୨୦୨୫ରେ ହେବାକୁ ଥିବା ନିର୍ବାଚନରେ ଲଢି ଜିତିବା ପାଇଁ ଦଳ ପ୍ରସ୍ତୁତ” ବୋଲି ଲିବରାଲ ଦଳ ଏକ ଷ୍ଟେଟମେଣ୍ଟ ଜାରି କରିଛି। ଦଳର ଜାତୀୟ ପରିଷଦ ଏନେଇ ବିଭିନ୍ନ ବୈଠକ କରିବାପରେ ଏହି ତାରିଖ ଘୋଷଣା କରିଛନ୍ତି। ତେବେ ସଂଭାବିତ ପାର୍ଥୀ ମାନଙ୍କୁ ଦଳରେ ଯୋଗ ଦେବାପାଇଁ ୩,୫୦,୦୦୦ କାନାଡ଼ୀୟ ଡଲାର ଦେୟ ରାଶି ଦେବାକୁ ପଡିବ ବୋଲି ଘୋଷଣା କରାଯାଇଛି। ଏହା ପୂର୍ବରୁ ଦଳରେ ଯୋଗ ଦେବା ପାଇଁ ଦେୟ ରାଶିର ପରିମାଣ ୭୫,୦୦୦ କାନାଡ଼ୀୟ ଡଲାର ରହିଥିଲା। 

କାନାଡ଼ା ନାଗରିକ ମାନଙ୍କ ଭୋଟିଂ ଏଲିଜିବିଲିଟିରେ ପରିବର୍ତ୍ତନ ଆଣିଛି ଲିବରାଲ ଦଳ। ଏଣିକି ୧୪ ବର୍ଷ ବୟଷ୍କ କାନାଡ଼ୀୟ ନାଗରିକ ମାନେ ମଧ୍ୟ ଭୋଟଦାନ କରିପାରିବେ। ମୂଳ କାନାଡ଼ୀୟ ନାଗରିକ ମାନଙ୍କ ଛଡା ଅନ୍ୟ କେହି ଏହି ନିର୍ବାଚନରେ ଭାଗ ନେଇ ପାରିବେ ନାହିଁ ବୋଲି ଘୋଷଣା କରିଛି ଲିବରାଲ ଦଳ। ତେବେ ଏହି ନିର୍ବାଚନ ଦୈଡରେ ଦୁଇ ମୂଳ ଭାରତୀୟ ମଧ୍ୟ ସାମିଲ ହୋଇଛନ୍ତି। ଏହି ଦୁଇ ପାର୍ଥୀଙ୍କର ନାମ ହେଉଛି ଚନ୍ଦ୍ର ଆର୍ଯ୍ୟା ଓ ଅନୀତା ଆନନ୍ଦ।

ଟ୍ରୁଡୋ ନିଜ ପଦରୁ ଇସ୍ତଫା ଦେଇଥିଲେ ମଧ୍ୟ ପରବର୍ତ୍ତୀ ପ୍ରଧାନମନ୍ତ୍ରୀଙ୍କ ନାଁ ନ ଆସିବା ଯାଏ ସେ ପ୍ରଧାନମନ୍ତ୍ରୀ ପଦ ସମ୍ଭାଳିବେ ବୋଲି ଜଣାପଡିଛି। କାନାଡ଼ାରେ ହେବାକୁ ଥିବା ଆସନ୍ତା ନିର୍ବାଚନ ଚଳିତ ବର୍ଷ ଅକ୍ଟୋବର 20ରେ ହେବ ବୋଲି ଘୋଷଣା କରାଯାଇଛି। ତେବେ ଆସନ୍ତା ନିର୍ବାଚନରେ ବିରୋଧି କନଜରଭେଟିବ ଦଳ ଜିତିବାର ସମ୍ଭାବନା ଅଧିକ ରହିଛି ବୋଲି ଏକ ସର୍ଭେ-ପୋଲରୁ ଜଣାପଡିଛି।