ନୂଆଦିଲ୍ଲୀ: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ଏକ ବଡ଼ ଝଟକା ଲାଗିଛି। ଏଠାରେ ଏକ ଆତଙ୍କବାଦ ବିରୋଧୀ କୋର୍ଟ ସୋମବାର ଇମ୍ରାନ ଖାନଙ୍କ ଦଳର ୭୫ ଜଣ ନେତା ଏବଂ କର୍ମୀଙ୍କୁ ୩ ରୁ ୧୦ ବର୍ଷ ପର୍ଯ୍ୟନ୍ତ ଜେଲଦଣ୍ଡ ଶୁଣାଇଛନ୍ତି। ୯ ମଇ ୨୦୨୩ ଦଙ୍ଗା ସମୟରେ ଶାସକ ପିଏମଏଲ-ଏନର ଜଣେ ବରିଷ୍ଠ ନେତାଙ୍କ ଘର ଉପରେ ଆକ୍ରମଣ କରିବା ଘଟଣାରେ ଏମାନେ ଦୋଷୀ ସାବ୍ୟସ୍ତ ହୋଇଛନ୍ତି।
ଅଦାଲତଙ୍କ ଜଣେ ଅଧିକାରୀ ପିଟିଆଇ-ଭାଷାକୁ କହିଛନ୍ତି ଯେ,"ଫୈସଲାବାଦର ଆତଙ୍କବାଦ ବିରୋଧୀ କୋର୍ଟ (ଏଟିସି) ପାକିସ୍ତାନ ମୁସଲିମ ଲିଗ-ନୱାଜ (ପିଏମଏଲ-ଏନ) ପଞ୍ଜାବ ସଭାପତି ରାଣା ସନାଉଲ୍ଲାଙ୍କ ଘର ଉପରେ ଆକ୍ରମଣ ମାମଲାରେ ଏହି ରାୟ ଶୁଣାଇଛନ୍ତି। ପାକିସ୍ତାନ ତେହେରିକ୍-ଏ-ଇନସାଫ ଦଳର ୫୯ ଜଣ ନେତା ଏବଂ କର୍ମୀଙ୍କୁ ୧୦ ବର୍ଷ ଏବଂ ଅନ୍ୟ ୧୬ ଜଣଙ୍କୁ ତିନି ବର୍ଷ ଲେଖାଏଁ ଜେଲଦଣ୍ଡ ଶୁଣାଇଛନ୍ତି। ସେହି ସମୟରେ, ୩୪ ଜଣଙ୍କୁ ନିର୍ଦ୍ଦୋଷରେ ଖଲାସ କରାଯାଇଛି । ଅଧିକାରୀ କହିଛନ୍ତି ଯେ ଏହି ମାମଲାରେ ମୋଟ ୧୦୯ ଜଣ ଅଭିଯୁକ୍ତ ଥିଲେ, ଯେଉଁଥିରୁ କୋର୍ଟ ୭୫ ଜଣଙ୍କୁ ଦଣ୍ଡ ଦେଇଛନ୍ତି।
ସୂଚନାଥାଉକି, ଇମ୍ରାନ ଖାନଙ୍କ ସମର୍ଥକ ମାନେ ତାଙ୍କ ଗିରଫଦାରୀ ବିରୁଦ୍ଧରେ ୯ ମେ ୨୦୨୩ ରେ ହିଂସାତ୍ମକ ପ୍ରତିବାଦ କରିଥିଲେ ଏବଂ ଅନେକ ସାମରିକ ଏବଂ ସରକାରୀ କୋଠାରେ ଭଙ୍ଗାରୁଜା କରିଥିଲେ। ଅଧିକାଂଶ ହିଂସାକାଣ୍ଡ ପଞ୍ଜାବ ଏବଂ ଖାଇବର ପଖତୁନଖଓ୍ବା ପ୍ରଦେଶରେ ଘଟିଥିଲା। ପିଟିଆଇ ଏହି ରାୟକୁ ଦୃଢ଼ ନିନ୍ଦା କରି କହିଛି ଯେ ଏହି ରାୟ ମିଥ୍ୟା ମାମଲା ଏବଂ ମିଥ୍ୟା ସାକ୍ଷୀଙ୍କ ବୟାନ ଉପରେ ଆଧାରିତ।
