ନୂଆଦିଲ୍ଲୀ,୦୨/୦୫: ଆତଙ୍କୀଙ୍କ ସୁରକ୍ଷାକୁ ସ୍ୱୀକାର କରିଛି ପାକିସ୍ତାନ । ଆତଙ୍କବାଦୀଙ୍କୁ ପାଳିବା ଗୁପ୍ତ କଥା ନୁହେଁ । ପାକିସ୍ତାନରେ ଆତଙ୍କବାଦୀଙ୍କ ଇତିହାସ ବହୁ ପୁରୁଣା । ଏହା କହି ପାକିସ୍ତାନର ମୁଖା ଖୋଲିଛନ୍ତି ପାକିସ୍ତାନ ପୂର୍ବତନ ବୈଦେଶିକ ମନ୍ତ୍ରୀ ବିଲାୱାଲ ଭୁଟ୍ଟୋ । ଏମିତି କହି ସେ ପାକିସ୍ତାନର ଦୋଷକୁ ଦୁନିଆ ସାମ୍ନାକୁ ନେଇ ଆସିଛନ୍ତି ।
ପାକିସ୍ତାନ ପୂର୍ବତନ ବୈଦେଶିକ ମନ୍ତ୍ରୀ ବିଲାୱାଲ ଭୁଟ୍ଟୋ ଗତ କିଛି ଦିନ ହେବ ଭାରତ ବିରୋଧରେ ବୟାନ ଦେଇ ଚର୍ଚ୍ଚାକୁ ଆସିଥିଲେ । ସିନ୍ଧୁ ଜଳ ଚୁକ୍ତିନାମା ରଦ୍ଦ ହେବା ପରେ ପାଣି ନଦେଲେ ରକ୍ତ ବୋହିବ ବୋଲି କହିଥିଲେ । ତାଙ୍କର ଏହି ଟିପ୍ପଣୀକୁ ନେଇ ଚର୍ଚ୍ଚା ହୋଇଥିଲା । ଏବେ ଆଉ ଏକ ଟିପ୍ପଣୀକୁ ନେଇ ଚର୍ଚ୍ଚାକୁ ଆସିଛନ୍ତି ବିଲାୱାଲ । ସେ କହିଛନ୍ତି, ''ପାକିସ୍ତାନ ଆତଙ୍କବାଦର ସମର୍ଥନ କରି ଆସୁଛି । ଆମେ ପାଖାପାଖି ତିନି ଦଶକ ଯାଏ ଆମେରିକା ଏବଂ ପଶ୍ଚିମ ଦେଶ ପାଇଁ ଏହି କାମ କରୁଛୁ । ଆମେ ଆତଙ୍କବାଦୀଙ୍କୁ ପାଳିବା ଏବଂ ସେମାନଙ୍କୁ ଟ୍ରେନିଂ ଦେଇଛୁ । ବ୍ରିଟେନ ପାଇଁ ମଧ୍ୟ ଏମିତି କାମ କରିଛୁ ।''
ବିଲାୱାଲ ଭୁଟ୍ଟୋ ସ୍କାଏ ନ୍ୟୁଜକୁ ପ୍ରତିକ୍ରିୟା ଦେଇ ଆହୁରି କହିଛନ୍ତି, ରକ୍ଷାମନ୍ତ୍ରୀଙ୍କ ବୟାନରୁ ମୋତେ ଲାଗୁ ନାହିଁ ଆତଙ୍କୀଙ୍କୁ ପାଳିବା କିଛି ଗୁପ୍ତ କଥା । ପାକିସ୍ତାନର ଇତିହାସରେ ଏହା ରହିଛି । ଏହାର ପରିଣାମ ମଧ୍ୟ ଆମକୁ ଭୋଗିବାକୁ ପଡିଛି। ଏଥିରୁ ଆମକୁ କିଛି ଶିକ୍ଷା ବି ମିଳିଛି । ଏହି ସମସ୍ୟାରୁ ମୁକୁଳିବାକୁ କିଛି ଅନ୍ତର୍ଜାତୀୟ ସୁଧାର ବି ଆଣିଛୁ । ଏହା ସତ କି ପାକିସ୍ତାନରେ ଏହି କ୍ରୁରତା ଇତିହାସ ରହିଛି ଯାହାକୁ ଅଣଦେଖା କରାଯାଇପାରିବ ନାହିଁ । ମାତ୍ର ଏବେ ଆମେ ଏହାଠୁ ଆଗକୁ ବଢିଛୁ ।''
