ନୂଆଦିଲ୍ଲୀ: ଭାରତ ପଟୁ ସମ୍ଭାବ୍ୟ ଆକ୍ରମଣ ଭୟରେ ଥରହର ପାକିସ୍ତାନ । ଯୁଦ୍ଧ ଆଶାଙ୍କାରେ ପାକିସ୍ତାନ ସବୁ ସ୍ତରରେ ପ୍ରସ୍ତୁତି ଜୋରଦାର କରିଛି । ଖୈବର ପଖତନୁଖ୍ବାରେ ବିମାନ ଆକ୍ରମଣ ସମୟରେ ବାଜିବାକୁ ଥିବା ସାଇରନ୍ ସ୍ଥାପନ ପାଖରୁ ଆରମ୍ଭ କରି ସୀମାବର୍ତ୍ତୀ ଅଞ୍ଚଳରେ ବଙ୍କର ନିର୍ମାଣ କରୁଛି ପାକିସ୍ତାନ । ଏବେ ପାକିସ୍ତାନ ସରକାର ପିଓକେ (ପାକିସ୍ତାନ ଅଧୀକୃତ କାଶ୍ମୀର) ପାଇଁ ନୂଆ ନିର୍ଦ୍ଦେଶ ଜାରି କରିଛନ୍ତି । ପିଓକେର ଲୋକମାନଙ୍କୁ ଖାଦ୍ୟ ଏବଂ ପାନୀୟ ମହଜୁଦ ରଖିବାକୁ ପାକିସ୍ତାନ ସରକାର ନିର୍ଦ୍ଦେଶ ଦେଇଥିବା ଜଣାପଡ଼ିଛି । ଫଳରେ ଯୁଦ୍ଧ ହେଲେ ସେଠାକାର ଲୋକମାନଙ୍କୁ କୌଣସି ଅସୁବିଧା ହେବ ନାହିଁ ।
ଜମ୍ମୁକାଶ୍ମରର ପହଲଗାମରେ ଆକ୍ରମଣ ପରେ ଆତଙ୍କୀଙ୍କ ଭୂସ୍ବର୍ଗ ପାକିସ୍ତାନରେ ଏବେ କୋକୁଆ ଭୟ ଲାଗି ରହିଛି । ଭାରତ ନିଶ୍ଚିତ ଭାବରେ ଏହି ଆକ୍ରମଣର ପ୍ରତିଶୋଧ ନେବ ବୋଲି ବିଶ୍ବାସ କରୁଛି ପାକିସ୍ତାନ । କୂଟନୈତିକ ଏବଂ ରଣନୈତକ ସ୍ତରରେ ବିଭିନ୍ନ ନିଷ୍ପତ୍ତି ନେଇ ଭାରତ ପଡ଼ୋଶୀ ପାକିସ୍ତାନକୁ ନୟାନ୍ତ କରିଥିବା ବେଳେ ଏବେ ଯୁଦ୍ଧ ଆଶଙ୍କାରେ ନିଦ୍ରାହୀନତାର ଶିକାର ହୋଇଛନ୍ତି ସେଠାକର ଶୀର୍ଷ ଅଧିକାରୀ ଏବଂ ଶାସନ ମୁଖ୍ୟ ।
ଏଲଓସି ନିକଟରେ ଥିବା ଗାଁଗୁଡ଼ିକୁ ପର୍ଯ୍ୟାପ୍ତ ପରିମାଣରେ ଖାଦ୍ୟ ଓ ପାନୀୟ ମହଜୁଦ ରଖିବାକୁ ପାକିସ୍ତାନ ସରକାର ପରାମର୍ଶ ଦେଇଛନ୍ତି । ଭାରତର ସମ୍ଭାବ୍ୟ ପ୍ରତିଶୋଧ ଭୟରେ ଥିବା ପାକିସ୍ତାନ ପୂର୍ବରୁ ଅନେକ ଥର ଚକମା ଖାଇଛି । ପୂର୍ବରୁ ଭାରତ ପିଓକେ ଏବଂ ବାଲାକୋଟ୍ରେ ସର୍ଜିକାଲ ଷ୍ଟ୍ରାଇକ୍ କରି ଉରି ଏବଂ ପୁଲଓ୍ବାମା ଆକ୍ରମଣର ପ୍ରତିଶୋଧ ନେଇଥିଲା । ସେତେବେଳେ ଆତଙ୍କବାଦୀଙ୍କୁ ଆକ୍ରମଣର ମୂଲ୍ୟ ଦେବାକୁ ପଡ଼ିବ ବୋଲି ମଧ୍ୟ କହିଥିଲେ ପ୍ରଧାନମନ୍ତ୍ରୀ ମୋଦୀ ।
ସେହିଭଳି ପହଲାଗାମରେ ଆତଙ୍କବାଦୀ ଆକ୍ରମଣ ପରେ ଏହାର କଡ଼ା ଜବାବ ଦିଆଯିବ ବୋଲି ମୋଦୀ କହିସାରିଛନ୍ତି । ସେପଟେ ଗୁରୁବାର ଆତଙ୍କବାଦୀଙ୍କୁ ଖୋଜି ଖୋଜି ହତ୍ୟା କରାଯିବ ବୋଲି କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଚେତାବନୀ ଦେଇଛନ୍ତି ।
