ନୂଆଦିଲ୍ଲୀ: ପାକିସ୍ତାନ ଅଧିକୃତ କାଶ୍ମୀର (ପିଓକେ)ରେ ଓ ଭାରତ ସହ ସୀମା ନିକଟବର୍ତ୍ତୀ ଅଞ୍ଚଳର ବାସିନ୍ଦାଙ୍କୁ ଜରୁରୀ କାଳୀନ ଭିତ୍ତିରେ ଖାଦ୍ୟ ଓ ରାସନ ସାମଗ୍ରୀ ସଞ୍ଚୟ କରିବାକୁ ପାକିସ୍ତାନ ସରକାରଙ୍କ ତରଫରୁ ନିର୍ଦ୍ଦେଶ ଦିଆଯାଇଛି। ଜମ୍ମୁ ଓ କାଶ୍ମୀରର ପହଲଗାମରେ ଘଟିଥିବା ଆତଙ୍କବାଦୀ ଆକ୍ରମଣ ପରେ ଭାରତ ଓ ପାକିସ୍ତାନ ମଧ୍ୟରେ ବୃଦ୍ଧି ପାଉଥିବା ଉତ୍ତେଜନାର ପରିପ୍ରେକ୍ଷୀରେ ଏହି ନିର୍ଦ୍ଦେଶ ଜାରି କରାଯାଇଛି। ଏହି ନିର୍ଦ୍ଦେଶ ପାଇବା ପରେ ପିଓକେ ଅଞ୍ଚଳରେ ରହୁଥିବା ଲୋକମାନଙ୍କ ମଧ୍ୟରେ ଆବଶ୍ୟକିୟ ସାମଗ୍ରୀ ସଂଗ୍ରହ ପାଇଁ ଏକ ପ୍ରକାର ପ୍ରତିଯୋଗିତା ଲାଗିଯାଇଛି।
ସୂଚନା ମୁତାବକ, ପାକିସ୍ତାନ ଅଧିକୃତ କାଶ୍ମୀରରେ ଲାଇନ୍ ଅଫ୍ କଣ୍ଟ୍ରୋଲ (ଏଲଓସି) ନିକଟବର୍ତ୍ତୀ ଅଞ୍ଚଳର ବାସିନ୍ଦାଙ୍କୁ ଦୁଇ ମାସ ପାଇଁ ଖାଦ୍ୟ ସାମଗ୍ରୀ ସଞ୍ଚୟ କରିବାକୁ କୁହାଯାଇଛି। ଏହି ନିର୍ଦ୍ଦେଶ ପାକିସ୍ତାନ ସରକାରଙ୍କ ପକ୍ଷରୁ ଜାରି କରା ଯାଇଛି। ଭାରତର ସମ୍ଭାବ୍ୟ ପ୍ରତିଶୋଧମୂଳକ କାର୍ଯ୍ୟାନୁଷ୍ଠାନର ଆଶଙ୍କାକୁ ନେଇ ପାକିସ୍ତାନ ଏହି ନିର୍ଦ୍ଦେଶ ଦେଇଥିବା ଜଣାପଡିଛି। ସୀମାରେ ଲଗାତାର ଭାବେ ୮ ଦିନ ଧରି ପାକିସ୍ତାନ ପକ୍ଷରୁ ଅସ୍ତ୍ରବିରତି ଉଲ୍ଲଙ୍ଘନ ହେଇଚାଲିଛି। ଏହାର ଜବାବରେ ଭାରତୀୟ ସେନା ମଧ୍ୟ ଉପଯୁକ୍ତ ଜବାବ ଦେଉଛି। ଏହା ସହିତ, ଯୁଦ୍ଧ ଭୟରେ ପାକିସ୍ତାନ ନିଜର କିଛି ଏୟାରସ୍ପେସକୁ ଅସ୍ଥାୟୀ ରୁପେ ବନ୍ଦ କରିଛି ଏବଂ ସୁରକ୍ଷା ଉପରେ ଅଧିକ ଜୋର ଦେଉଛି।
ପାକିସ୍ତାନ ସରକାରଙ୍କ ଦ୍ୱାରା ଏହି ନିର୍ଦ୍ଦେଶ ଜାରି ହେବା ପରେ ପିଓକେ ଅଞ୍ଚଳରେ ଆତଙ୍କ ଓ ଅନିଶ୍ଚିତତା ସୃଷ୍ଟି ହୋଇଛି। ଚାକୋଠି ଭଳି ସୀମା ନିକଟବର୍ତ୍ତୀ ଅଞ୍ଚଳରେ ବାସିନ୍ଦାମାନେ ନିଜର ସୁରକ୍ଷା ପାଇଁ ପୁରାତନ ଭୂଗର୍ଭ ସ୍ଥିତ ବଙ୍କର ସଫା କରୁଛନ୍ତି ଓ ଏହାକୁ ବାସୋପଯୋଗି ବନାଉଛନ୍ତି। ଏହା ସହିତ, ପାକିସ୍ତାନରେ ଆର୍ଥିକ ସଙ୍କଟ ଆହୁରି ଗମ୍ଭୀର ହେବାର ଆଶଙ୍କା ରହିଛି। କାରଣ ଭାରତ ସହ ବାଣିଜ୍ୟ ବନ୍ଦ ହେବା ଏବଂ ଇଣ୍ଡସ ଜଳ ଚୁକ୍ତିନାମା ସ୍ଥଗିତ ହେବା ପରେ ଦେଶର କୃଷି ଓ ଅର୍ଥନୀତି ଉପରେ ଗଭୀର ପ୍ରଭାବ ପକାଇପାରେ।
ପାହାଲଗାମ ଆକ୍ରମଣ ପରେ ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନା ଚରମ ସ୍ତରରେ ପହଞ୍ଚିଛି। ପିଓକେରେ ଖାଦ୍ୟ ସଞ୍ଚୟ ନିର୍ଦ୍ଦେଶ ଏକ ସମ୍ଭାବ୍ୟ ସଂଘର୍ଷର ଆଶଙ୍କାକୁ ପ୍ରତିଫଳିତ କରୁଛି। ଆନ୍ତର୍ଜାତୀୟ ସମୁଦାୟ ଏହି ପରିସ୍ଥିତି ଉପରେ ନଜର ରଖିବା ସହ ଉଭୟ ଦେଶକୁ ସଂକ୍ଷମ ରକ୍ଷା କରିବାକୁ ନିର୍ଦ୍ଦେଶ ଦେଇଛନ୍ତି।
