ନୂଆଦିଲ୍ଲୀ, ୨।୧୨: ଷ୍ଟାଡିୟମ୍ରେ ମ୍ୟାଚ୍ ଦେଖିବାକୁ ଖଚାଖଚ ଭିଡ଼ ଜମିଥିଲା । ଠିକ୍ ଏତିକି ବେଳେ ଆରମ୍ଭ ହୋଇଥିଲା ରକ୍ତାକ୍ତ ସଂଘର୍ଷ । ପିଟାପିଟି ହୋଇଥିଲେ ଗ୍ୟାଲେରୀରେ ବସିଥିବା ଦର୍ଶକ । ହିଂସାକାଣ୍ଡ ଏତେ ଉଗ୍ର ରୂପ ନେଇଥିଲା ଯେ, ୧୦୦ରୁ ଅଧିକ ଲୋକ ପ୍ରାଣ ହରାଇଥିଲେ । ଏଭଳି ଘଟଣା ଦେଖିବାକୁ ମିଳିଛି ପଶ୍ଚିମ ଆଫ୍ରିକୀୟ ଦେଶ ଗିନିରେ ।
ଗିନି ଜେରେକୋରରେ ରବିବାର ଏକ ଫୁଟବଲ୍ ମ୍ୟାଚ ଚାଲିଥିଲା । ମ୍ୟାଚ୍ ବେଳେ ରେଫରୀଙ୍କ ବିବାଦୀୟ ନିଷ୍ପତ୍ତି ଉପରେ ଆରମ୍ଭ ହୋଇଥିଲା ଯୁକ୍ତତର୍କ । ଫଳରେ ଗ୍ୟାଲେରୀରେ ବସିଥିବା ଦର୍ଶକଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା । ଯାହା ପରେ ଉତ୍ତ୍ୟକ୍ତ ଲୋକ ଅଚାନକ ପଡ଼ିଆ ଭିତରକୁ ପଶି ଆସିଥିଲେ । ଦେଖୁ ଦେଖୁ କିଛି ସମୟ ମଧ୍ୟରେ ଅଣାୟତ୍ତ ହୋଇଥିଲା ସ୍ଥିତି । ଆରମ୍ଭ ହୋଇ ଥିଲା ହିଂସାତ୍ମକ ସଂଘର୍ଷ । ଷ୍ଟାଡିୟମ୍ରେ ଥିବା ଦର୍ଶକ ପରସ୍ପର ସହ ପିଟାପଟି ହୋଇଥିଲେ । ଏହି ରକ୍ତାକ୍ତ ସଙ୍ଘର୍ଷ ୧୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । ଏହି ପୂରା ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
ତେବେ ଏହି ଭିଡିଓଟିର ସତ୍ୟାସତ୍ୟ ସ୍ପଷ୍ଟ ଜଣାପଡ଼ିନାହିଁ । ଫୁଟବଲ ପଡ଼ିଆରେ ଶତାଧିକ ଲୋକେ ଏଣେ ତେଣେ ଦୌଡିବାର ଦେଖିବାକୁ ମିଳିଛି । ଏଥିସହ ରାସ୍ତା ଉପରେ କୁଢ଼ କୁଢ଼ ମୃତଦେହ ପଡ଼ିଥିବା ବେଳେ ଲୋକେ ପରସ୍ପରକୁ ମାଡ଼ ମାରୁଥିବା ଭିଡିଓରେ ଦେଖିବାକୁ ମିଳିଛି । କେବଳ ସେତିକି ନୁହେଁ ବିକ୍ଷୋଭକାରୀମାନେ ଭଙ୍ଗାରୁଜା କରି ଏନଜେରେକୋର ପୁଲିସ ଷ୍ଟେସନରେ ନିଆଁ ମଧ୍ୟ ଲଗାଇ ଦେଇଛନ୍ତି । ନିଆଁ ଲାଗିବା ଫଳରେ ବ୍ୟାପକ କ୍ଷୟକ୍ଷତି ହୋଇଛି । ହସ୍ପିଟାଲରେ ଶହଶହ ମୃତଦେହ ପଡ଼ିରହିଛି । ଏପରିକି ଜେରେକୋର ହସ୍ପିଟାଲର ଶବଗୃହରେ ମୃତଦେହ ରଖିବାକୁ ଜାଗାର ଅଭାବ । ସ୍ଥାନୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ଏହି ମ୍ୟାଚ୍ ଗିନିର ଜୁଣ୍ଟା ନେତା ମାମାଦି ଡୋମ୍ବୁୟାଙ୍କ ସମ୍ମାନାର୍ଥେ ଆୟୋଜିତ ଏକ ଟୁର୍ନାମେଣ୍ଟର ଅଂଶ ଥିଲା । ଯିଏ ୨୦୨୧ରେ ଆକ୍ରମଣ ପୂର୍ବକ କ୍ଷମତା ଦଖଲ କରି ନିଜକୁ ରାଷ୍ଟ୍ରପତି ଭାବରେ ଘୋଷଣା କରିଥିଲେ ।
