ନୂଆଦିଲ୍ଲୀ/ଭୁବନେଶ୍ୱର, ୨୨/୧୧ : ରାଷ୍ଟ୍ରୀୟ ରାଜଧାନୀ ଦିଲ୍ଲୀର ଜବାହରଲାଲ ନେହେରୁ ଷ୍ଟାଡିୟମରେ ‘ଓଡ଼ିଆ ସମାଜ’ ପକ୍ଷରୁ ଆୟୋଜିତ ‘ଓଡ଼ିଶା ପର୍ବ -୨୦୨୪’ର ଉଦଘାଟନୀ ସମାରୋହରେ ଯୋଗଦେଇ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓଡ଼ିଶାର ପରିଚୟକୁ ବିଶ୍ୱବିଦିତ କରାଇବା ପାଇଁ ଆହ୍ୱାନ କରିଛନ୍ତି । ମାନନୀୟ ରାଷ୍ଟ୍ରପତି ଶ୍ରୀମତୀ ଦ୍ରୌପଦୀ ମୁର୍ମୁଙ୍କ ଗରିମାମୟ ଉପସ୍ଥିତି ତଥା ତାଙ୍କ କରକମଳରେ ଉଦଘାଟିତ ଏହି ସମାରୋହରେ ସେ କହିଛନ୍ତି ଯେ ନୂଆଦିଲ୍ଲୀ ସମେତ ସମଗ୍ର ଭାରତବର୍ଷ ଏବଂ ଦେଶ ବାହାରେ ଓଡ଼ିଶାର ପର୍ବପର୍ବାଣୀ ଏକ ବ୍ୟାପକ ରୂପ ନେଉଛି । ଦିଲ୍ଲୀ ସହ ଅନେକ ସ୍ଥାନରେ ମହାପ୍ରଭୁ ଶ୍ରୀଜଗନ୍ନାଥଙ୍କ ରଥଯାତ୍ରା ପାଳନ ହେଉଛି । ଓଡ଼ିଶାର ଅନନ୍ୟ ଗଣପର୍ବ ‘ନୂଆଁଖାଇ’ ଭଳି ଆମର ପର୍ବ ପର୍ବାଣୀକୁ ପ୍ରବାସୀ ଓଡ଼ିଆମାନେ ବହୁତ ଆନନ୍ଦର ସହ ପାଳନ କରୁଛନ୍ତି । ବୈଶ୍ୱିକ ସ୍ତରରେ ଓଡ଼ିଆମାନେ ନିଜର ସ୍ୱତନ୍ତ୍ର ପରିଚୟ ତିଆରି କରୁଛନ୍ତି । ଓଡିଆଙ୍କ ଆଧିପତ୍ୟ ବୃଦ୍ଧି ପାଉଛି, ଯାହା ଦ୍ୱାରା ଓଡ଼ିଆତ୍ୱ ଧୀରେ ଧୀରେ ଜାଗ୍ରତ ହେଉଛି । 

ଓଡ଼ିଆ କଳା ଏବଂ ସଂସ୍କୃତିର ପ୍ରଚାର ଓ ସୁରକ୍ଷା ପାଇଁ ଆୟୋଜିତ ‘ଓଡ଼ିଶା ପର୍ବ’ ଦିଲ୍ଲୀରେ ଓଡ଼ିଶାର ଭାବାବେଗକୁ ପ୍ରତିଫଳିତ କରିବାର ଏକ ଉତ୍କୃଷ୍ଟ ମଞ୍ଚ । ଚଳିତବର୍ଷ ଏହି ବର୍ଣ୍ଣାଢ୍ୟ ସମାରୋହରେ ପ୍ରଦର୍ଶିତ ପାରମ୍ପରିକ ଆରିସା ପିଠା, ଝାଲ ମୁଢି, ଅନ୍ୟାନ୍ୟ ଖାଦ୍ୟପେୟ ଏବଂ ପରିବେଷଣ ହେଉଥିବା ସମଧୁର ଓଡ଼ିଆ ସଙ୍ଗୀତ, ଓଡ଼ିଶୀ ନୃତ୍ୟ ଏବଂ ସାଂସ୍କୃତିକ କାର୍ଯ୍ୟକ୍ରମ ସମସ୍ତଙ୍କୁ ଆକୃଷ୍ଟ କରୁଛି । ଓଡ଼ିଆ ପର୍ବ ଆନନ୍ଦ ଉଲ୍ଲାସର ବତାବରଣ ତିଆରି କରୁ । ଓଡ଼ିଶା ପର୍ବ ଓଡ଼ିଆଙ୍କ ସମୃଦ୍ଧ ଓ ସ୍ୱତନ୍ତ୍ର ପରିଚୟକୁ ବିଶ୍ୱବିଦିତ କରାଇବାରେ ବଡ଼ ଭୂମିକା ଗ୍ରହଣ କରିବ ବୋଲି ଶ୍ରୀ ପ୍ରଧାନ ଦୃଢ ଆଶାବ୍ୟକ୍ତ କରିଛନ୍ତି । 

ଆମ ସମାଜ ଗୋଟିଏ ଉତ୍ସବମୁଖର ସମାଜ । ଓଡ଼ିଶାର ରାଜଧାନୀ ଭୁବନେଶ୍ୱରରେ ପ୍ରବାସୀ ଭାରତୀୟ ଦିବସ ସମାରୋହର ଆୟୋଜନ ପାଇଁ ପ୍ରଧାନମନ୍ତ୍ରୀ କଳ୍ପନା କରିଛନ୍ତି । ଏଥିପାଇଁ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ । ଆମେ ସମସ୍ତେ ମିଶି ଆମର ପ୍ରବାସୀ ଓଡ଼ିଆମାନଙ୍କୁ ଓ ଅନ୍ୟ ରାଜ୍ୟର ପଡୋଶୀମାନଙ୍କୁ ଓଡ଼ିଶାକୁ ଆସିବା ପାଇଁ ନିମନ୍ତ୍ରଣ ଦେବା । ଓଡ଼ିଶାର କୋଣାର୍କ ମନ୍ଦିର, ହୀରାକୁଦ ଡ୍ୟାମର ଗୌରବମୟ କାହାଣୀ, ଶିମିଳିପାଳ ଅଭୟାରଣ୍ୟ, ଦେବ୍ରୀଗଡ଼ ଅଭୟାରଣ୍ୟ ଓ ଭିତରକନିକାର ପ୍ରାକୃତିକ ସୌନ୍ଦର୍ଯ୍ୟ ତଥା ଓଡ଼ିଶାର ଭବ୍ୟତାର ପ୍ରସାର କରିବା । ଓଡ଼ିଶାର ପରିଚୟକୁ ଆଗେଇ ନେବାରେ  ସମସ୍ତେ ଏକାଠି ହୋଇ କାମ କରିବା । ତେବେ ଯାଇ ଆମ ଓଡ଼ିଶାର ଅର୍ଥନୀତି ବିକଶିତ ହେବ, ଓଡ଼ିଶାର ପରିଚୟ ବଢିବ ବୋଲି ସେ କହିଛନ୍ତି । 

ଓଡ଼ିଶା ପର୍ବ- ୨୦୨୪ରେ ଯୋଗଦେଇ ସମବେତ ଦର୍ଶକ ଓ ବ୍ୟକ୍ତିବିଶେଷମାନଙ୍କୁ ପ୍ରେରିତ କରିଥିବାରୁ ମାନ୍ୟବର ରାଷ୍ଟ୍ରପତି ଏବଂ ଓଡ଼ିଶା ପର୍ବ ମାଧ୍ୟମରେ ଓଡ଼ିଶାର କଳା,  ସଂସ୍କୃତି, ପରମ୍ପରା, ସଙ୍ଗୀତ, ନୃତ୍ୟ, ସାହିତ୍ୟ, ଓଡ଼ିଆ ଖାଦ୍ୟପେୟ ତଥା ଆମର ଗୌରବମୟ ଇତିହାସକୁ ବିଶ୍ୱ ଦରବାରରେ ଉପସ୍ଥାପନ କରୁଥିବାରୁ ଓଡ଼ିଆ ସମାଜକୁ ଧନ୍ୟବାଦ ଜଣାଇଛନ୍ତି ଶ୍ରୀ ପ୍ରଧାନ । ଏହି ଉଦଘାଟନୀ ସମାରୋହରେ ଓଡ଼ିଶାର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ, କଟକ ଲୋକସଭା ସାଂସଦ ଶ୍ରୀ ଭର୍ତ୍ତୃହରି ମହତାବ, ଅନେକ ରାଜନେତା, ଲେଖକ, କଳାକାର, ଇତିହାସକାର, ବୁଦ୍ଧିଜୀବୀ ଓ ବ୍ୟକ୍ତିବିଶେଷମାନେ ଯୋଗ ଦେଇଥିଲେ ।