ଭୁବନେଶ୍ୱର/ନୂଆଦିଲ୍ଲୀ,୦୨/୧୧: କେନ୍ଦ୍ର ସରକାର ଚଳିତ ବର୍ଷ ଅକ୍ଟୋବର ମାସରେ ସାମଗ୍ରୀ  ଓ ସେବା ଟିକସ (ଜିଏସ୍‌ଟି) ବାବଦକୁ ୧.୮୭ ଲକ୍ଷ  କୋଟି ଟଙ୍କା ଆଦାୟ କରିଛନ୍ତି । ବାର୍ଷିକ ଭିତ୍ତିରେ  ଏଥିରେ ୯% ଅଭିବୃଦ୍ଧି ହୋଇଛି । ସମାନ ସମୟରେ  ଓଡ଼ିଶାରେ ଜିଏସ୍‌ଟି ଆଦାୟ ୧୦% ବୃଦ୍ଧି ହୋଇ  ୪୫୯୨ କୋଟି ଟଙ୍କା ଛୁଇଁଛି । ଅର୍ଥ ମନ୍ତ୍ରଣାଳୟ  ପକ୍ଷରୁ ଜାରି ରିପୋର୍ଟରୁ ଏହା ଜଣାପଡ଼ିଛି ।  

ଘରୋଇ ବଜାରରେ ବିକ୍ରି ବୃଦ୍ଧି ଏବଂ  ଅନୁପାଳନରେ ଉନ୍ନତି ଯୋଗୁ ଟିକସ ଆଦାୟ  ବଢ଼ିଛି । ଅକ୍ଟୋବରର ସଂଗୃହିତ ମୋଟ ଜିଏସ୍‌ଟି ମଧ୍ୟରେ ୩୩,୮୨୧ କୋଟିର କେନ୍ଦ୍ର ଜିଏସ୍‌ଟି,  ୪୧,୮୬୪ କୋଟିର ରାଜ୍ୟ ଜିଏସ୍‌ଟି ଏବଂ ୯୯,୧୧୧  କୋଟିର ସମନ୍ୱିତ ଜିଏସ୍‌ଟି ରହିଛି । ଏହି ମାସରେ ୧୨,୫୫୦ କୋଟିର କ୍ଷତିପୂରଣ ସେସ୍‌ ମଧ୍ୟ ଆଦାୟ  ହୋଇଛି । 

ଘରୋଇ ବଜାରରେ ନେଣଦେଣରୁ ଟିକସ  ୧୦.୬% ବୃଦ୍ଧି ହୋଇ ୧.୪୨ ଲକ୍ଷ କୋଟି ଟଙ୍କା  ଛୁଇଁଛି । ସେହିଭଳି ଆମଦାନିରୁ ପ୍ରତ୍ୟକ୍ଷ ଟିକସ  ୪% ବଢ଼ି ୪୫,୦୯୬ କୋଟି ଟଙ୍କା ରହିଛି ।  ସରକାର ଏହି ମାସରେ ୧୯,୩୦୬ କୋଟିର  ରିଫଣ୍ଡ ଜାରି କରିଛନ୍ତି । ଯାହା ୧୮.୨% ଅଭିବୃଦ୍ଧି । 

ଗୋଟିଏ ବର୍ଷ ତଳେ ଅକ୍ଟୋବରରେ କେନ୍ଦ୍ର  ସରକାରଙ୍କ ଜିଏସ୍‌ଟି ଆଦାୟ ୧.୭୨ ଲକ୍ଷ କୋଟି  ଟଙ୍କା ରହିଥିଲା । ତେବେ ମୋଟ ଟିକସ ସଂଗ୍ରହ  ଦୃଷ୍ଟିକୋଣରୁ ଚଳିତ ବର୍ଷ ଅକ୍ଟୋବରରେ ଦ୍ୱିତୀୟ  ସର୍ବାଧିକ ଆଦାୟ ହୋଇଛି । ଏହା ପୂର୍ବରୁ ଏପ୍ରିଲ ୨୦୨୪ରେ ୨.୧୦ ଲକ୍ଷ କୋଟି ଏବଂ ଏପ୍ରିଲ  ୨୦୨୩ରେ ୧.୮୭ ଲକ୍ଷ କୋଟିର ଜିଏସ୍‌ଟି  ଆଦାୟ ହୋଇଥିଲା । 

ଚଳିତବର୍ଷ ସେପ୍ଟେମ୍ବରରେ  ସରକାର ୧.୭୩ ଲକ୍ଷ କୋଟିର ଜିଏସ୍‌ଟି ଆଦାୟ  କରିଥିଲେ । ରିଫଣ୍ଡ ପରେ ନେଟ୍‌ ୧.୬୮ ଲକ୍ଷ  କୋଟିର ଜିଏସ୍‌ଟି ରାଜକୋଷକୁ ଆସିଛି । ଗତ  ବର୍ଷ ଅକ୍ଟୋବର ତୁଳନାରେ ଏହା ୮% ଅଧିକ ।  ଲଗାତର ୩ ମାସ ଧରି ପରୋକ୍ଷ ଟିକସ ସଂଗ୍ରହ ଅଭିବୃଦ୍ଧିରେ ଏହା ତୃତୀୟ ମାସ । ସେପ୍ଟେମ୍ବର  ମାସରେ ମୋଟ ଜିଏସ୍‌ଟି ଆଦାୟ ୬.୫% ବୃଦ୍ଧି  ହୋଇଥିଲା । ପ୍ରଥମ ତ୍ରୈମାସରେ ହାରାହାରି ୧.୮୬  ଲକ୍ଷ କୋଟି ଜିଏସ୍‌ଟି ରାଜକୋଷକୁ ଆସିଥିବା  ବେଳେ ଦ୍ୱିତୀୟ ତ୍ରୈମାସରେ ଏହା ୧.୭୭ ଲକ୍ଷ  କୋଟି ଟଙ୍କାକୁ ଖସିଛି। 

ଅକ୍ଟୋବର ଯାଏ ଲଗାତାର  ୮ ମାସ ଧରି ପରୋକ୍ଷ ଟିକସ ଆଦାୟ ୧.୭ ଲକ୍ଷ  କୋଟି ଟଙ୍କା ଟପୁଛି । ୨୦୨୪-୨୫ର ପ୍ରଥମ ତ୍ରୈମାସରେ ୧୦.୮୭ ଲକ୍ଷ କୋଟିର ଜିଏସ୍‌ଟି  ରାଜକୋଷକୁ ଆସିଥିଲା । ଏହା ଗତ ଆର୍ôଥକ ବର୍ଷ ପ୍ରଥମ ତ୍ରୈମାସ  ତୁଳନାରେ ୯.୫% ଅଧିକ । ଜିଏସ୍‌ଟି ଆଦାୟରେ  ଲଗାତର ଉନ୍ନତି ଅର୍ଥନୀତିର ଉନ୍ନତ ସ୍ଥିତିକୁ  ଦେଖାଇଥାଏ । କେପିଏମ୍‌ଜିର ଜାତୀୟ ମୁଖ୍ୟ ଅଭିଷେକ ଜୈନ କୁହନ୍ତି, ସର୍ବାଧିକ ଜିଏସ୍‌ଟି  ସଂଗ୍ରହ ଅର୍ଥବ୍ୟବସ୍ଥାର ଦୃଢ଼ତାକୁ ଦେଖାଇଥାଏ ।  

ଡେଲୋଏଟ ଇଣ୍ଡିଆର ପାର୍ଟନର ଏମ୍‌ଏସ୍‌ ମଣି  କହିଛନ୍ତି, ପାର୍ବଣ ଋତୁ ଏବଂ ଅନୁପାଳନରେ ଉନ୍ନତି  ଯୋଗୁ ଏହାର ଭଲ ପ୍ରଭାବ ଟିକସ ଆଦାୟ ଉପରେ  ରହିଛି । ବଡ଼ ରାଜ୍ୟଗୁଡିକର ଜିଏସ୍‌ଟି ଆଦାୟ ୯%  ବୃଦ୍ଧି ହୋଇଛି । ଛୋଟ ରାଜ୍ୟ ଗୁଡିକର ହାରାହାରି  ଟିକସ ଆଦାୟ କମିଛି । କେନ୍ଦ୍ର ସରକାର ୨୦୧୭  ଜୁଲାଇରେ ଦେଶରେ ଜିଏସ୍‌ଟି ଲାଗୁ କରିଥିଲେ ।  ଏଥିରେ କେନ୍ଦ୍ର ଏବଂ ରାଜ୍ୟ ସରକାରଙ୍କ ୧୭ ଟିକସ  ଏବଂ ୧୩ ଉପଟିକସକୁ ବିଲୀନ କରାଯାଇଥିଲା ।  ଜିଏସ୍‌ଟିର ୭ ବର୍ଷ ପୂର୍ତ୍ତି ଉପଲକ୍ଷେ କେନ୍ଦ୍ର ସରକାର  ଏହାର ଉପଲବ୍ଧତାକୁ ନେଇ ଏକ ପୋଷ୍ଟ ଜାରି  କରିଥିଲେ । ଜିଏସ୍‌ଟିରେ ଏବେ ୫, ୧୨, ୧୮  ଏବଂ ୨୮ ଭଳି ୪ଟି ସ୍ଲାବ ରହିଛି ।