ନବରଙ୍ଗପୁର,୧୦/୦୮: ବଞ୍ଚିବାକୁ ସଂଘର୍ଷ କରି ଦୀର୍ଘ ୧୬ ଦିନ ପରେ ଶେଷରେ ଆଖି ବୁଜିଛନ୍ତି ରାଇଘର ବ୍ଲକ ଅଞ୍ଚଳର ନର୍ସିଂଛାତ୍ରୀ । ଶନିବାର ଅପରାହ୍ଣରେ ଭୁବନେଶ୍ୱର ଏମସ୍ରେ ତାଙ୍କ ମୃତ୍ୟୁ ହୋଇଥିବା ଡାକ୍ତରଖାନା କର୍ତ୍ତୃପକ୍ଷ ସ୍ପଷ୍ଟ କରିଛନ୍ତି । ରବିବାର ମୃତଦେହ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରାଯିବ ବୋଲି ଜଣାପଡ଼ିଛି । ଆପତ୍ତିଜନକ ଫଟୋ ଭାଇରାଲ୍ ଯୋଗୁ ଛାତ୍ରୀ ଜଣଙ୍କ କୀଟନାଶକ ପିଇ ଦେଇଥିଲେ ।
ସୂଚନାଥାଉ କି, ଏକତରଫା ପ୍ରେମ କରୁଥିବା ଜଣେ ଯୁବକଙ୍କ ଶାରୀରିକ ଏବଂ ମାନସିକ ନିର୍ଯାତନାର ଶିକାର ହୋଇଥିଲେ ନର୍ସିଂ ପଢ଼ୁଥିବା ଛାତ୍ରୀ ଜଣଙ୍କ । ଆପତ୍ତିଜନକ ଫଟୋ ପଟୋ ଭାଇରାଲ୍ କରିଥିଲେ ଯୁବକ ଜଣଙ୍କ । ଏହାକୁ ନେଇ ଗତ ଜୁଲାଇ ୨୩ରେ ସେ ବିଷ ପିଇ ଆତ୍ମହତ୍ୟା ଉଦ୍ୟମ କରିଥିଲେ । ଗୁରୁତର ଅବସ୍ଥାରେ ତାଙ୍କୁ ପ୍ରଥମେ ରାୟପୁର ଏବଂ ପରେ ଭୁବନେଶ୍ୱର ଏମସ୍କୁ ସ୍ଥାନାନ୍ତର କରାଯାଇଥିଲା । କୀଟନାଶକ ପ୍ରଭାବରେ ତାଙ୍କ ଶରୀର ଏକାଧିକ ଅଙ୍ଗ ଅଚଳ ହୋଇଯାଇଥିଲା । ଆତ୍ମହତ୍ୟା ଉଦ୍ୟମ ପରେ ଛାତ୍ରୀଙ୍କ ପରିବାର ଲୋକ ଥାନାର ଦ୍ୱାରସ୍ଥ ହୋଇଥିଲେ । ଅଭିଯୁକ୍ତ ପ୍ରେମିକ ସତ୍ୟଜିତ ସର୍କାରକୁ ପୁଲିସ ନୟାଗଡ଼ର ଦଶପଲ୍ଲାରୁ ଉଠାଇ ଆଣିଥିଲା। ମାମଲାର ଅନ୍ୟତମ ଅଭିଯୁକ୍ତ ତଥା ଛାତ୍ରୀଙ୍କ ସହ ଫଟୋ ଉଠାଇଥିବା ଉଦ୍ଧବ ଗଡ଼ନାୟକକୁ ଜୟପୁରରୁ ଗିରଫ କରାଯାଇଥିଲା । ଡାକ୍ତରଙ୍କ ଶତଚେଷ୍ଟା ଛାତ୍ରୀଙ୍କୁ ବଞ୍ଚାଇ ପାରି ନ ଥିଲା ।
