ନୂଆଦିଲ୍ଲୀ,୩୦/୦୬: ନ୍ୟାସ୍‌ନାଲ ଥର୍ମାଲ ପାୱାର୍‌ କର୍ପୋରେଶନ ଅର୍ଥାତ୍‌ ଏନ୍‌ଟିପିସି ଲିମିଟେଡ୍‌କୁ କମ୍ପାନି ବୋର୍ଡ  ୧୨,୦୦୦ କୋଟି ଟଙ୍କା ସଂଗ୍ରହ କରିବା ପାଇଁ ମଞ୍ଜୁରି ଦେଇଛି । କମ୍ପାନି ଏହି  ପାଣ୍ଠିକୁ ବଣ୍ଡ୍‌ସ ଏବଂ ନନ୍‌ କନ୍‌ଭର୍ଟିବଲ  ଡିବେଞ୍ଚର(ଏନ୍‌ସିଡି) ଜାରି କରି ଉଠାଇବ । କମ୍ପାନି ପକ୍ଷରୁ ଷ୍ଟକ୍‌ ଏକ୍ସଚେଞ୍ଜ ଫାଇଲିଂରେ ଏହି ସୂଚନା ଦିଆଯାଇଛି ।  

ଏନ୍‌ଟିପିସି ପ୍ରକାଶ କରିଛି ଯେ, କମ୍ପାନି ବୋର୍ଡ ଶନିବାର ଏହାର ବୈଠକରେ ଅଂଶୀଦାରମାନଙ୍କ ମଞ୍ଜୁରି ଆଧାରରେ ପାଣ୍ଠି ସଂଗ୍ରହ ପ୍ରସ୍ତାବ ଉପରେ ମୋହର ମାରିଛି । କମ୍ପାନି ଏହି ପାଣ୍ଠିକୁ ସିକ୍ୟୋର୍‌ଡ/  ଅନ୍‌ସିକ୍ୟୋର୍‌ଡ, ଟିକସଭୁକ୍ତ/ ଟିକସମୁକ୍ତ,  କ୍ୟୁମୁଲେଟିଭ୍‌/ନନ୍‌ କ୍ୟୁମୁଲେଟିଭ୍‌ ଏବଂ  ନନ୍‌ କନ୍‌ଭର୍ଟିବଲ ଡିବେଞ୍ଚରକୁ ଏକ କିମ୍ବା  ଅଧିକ ସିରିଜ୍‌ରେ ଜାରି କରି ସଂଗ୍ରହ କରିବ ।  

ଶୁକ୍ରବାର ଏନ୍‌ଟିପିସିର ସେୟାର  ୦.୬୨% ବଢ଼ି ୩୭୯.୫୦ ଟଙ୍କାରେ ବନ୍ଦ  ହୋଇଛି । ଗତ ବର୍ଷକରେ ଏହା ୧୦୦.୬୩%  ରିଟର୍ଣ୍ଣ ଦେଇଛି । ଗତ ୬ ମାସରେ କମ୍ପାନିର  ସେୟାର ମୂଲ୍ୟ ୨୧.୯୭% ବୃଦ୍ଧି ପାଇଛି ।  କମ୍ପାନିର ବଜାର ପୁଞ୍ଜି ୩.୫୬ ଲକ୍ଷ କୋଟି  ଟଙ୍କାରେ ପହଞ୍ଚିଛି । ଏନ୍‌ଟିପିସି ଭାରତର  ଆଗ ଧାଡ଼ିର ବିଦ୍ୟୁତ୍‌ ଉତ୍ପାଦନକାରୀ  କମ୍ପାନିଗୁଡ଼ିକ ମଧ୍ୟରେ ଅନ୍ୟତମ ।  

୨୦୨୩-୨୪ ଆର୍ଥିକବର୍ଷର ଚତୁର୍ଥ  ତ୍ରୟମାସରେ ଏନ୍‌ଟିପିସିର ଲାଭ ବାର୍ଷିକ  ଆଧାରରେ ୩୩.୨୨% ବଢ଼ି ୬୪୯୦.୦୫  କୋଟି ଟଙ୍କା ରହିଥିଲା । ପୂର୍ବ ବର୍ଷ ସମାନ ସମୟରେ କମ୍ପାନିର ସାମଗ୍ରିକ ନେଟ୍‌  ଲାଭ ୪,୮୭୧.୫୫ କୋଟି ଟଙ୍କା ଥିଲା ।