ନୂଆଦିଲ୍ଲୀ,୧୫/୧୦: ନ୍ୟାଶନାଲ ଫାର୍ମା ସିଟିକାଲ ପ୍ରାଇସିଂ ଅଥରିଟି (ଏନ୍ପିପିଏ) ୮ ଔଷଧର ଅଧିକତମ ମୂଲ୍ୟରେ ପରିବର୍ତ୍ତନ ସହ ବୃଦ୍ଧି କରିଛନ୍ତି । ନୂତନ ଅଧିକତମ ମୂଲ୍ୟ ବା ସିଲିଂ ପ୍ରାଇସ ନିର୍ଦ୍ଧାରଣ ଲାଗି ବିଭିନ୍ନ କମ୍ପାନି ଏନ୍ପିପିଏକୁ ନିବେଦନ କରିଥିଲେ । ଏହି ମେଡିସିନ ଗୁଡିକ ଆଜମା, ଟିବି, ଗ୍ଲୋକୁମା, ଥାଲେସିମିଆ ଭଳି କ୍ଷେତ୍ରରେ ବ୍ୟବହାର ହୋଇଥାଏ ।
ବର୍ତ୍ତମାନର ସିଲିଂ ମୁଲ୍ୟ ଠାରୁ ମେଡିସିନର ମୂଲ୍ୟ ୫୦% ବୃଦ୍ଧି ନେଇ ମଞ୍ଜୁରୀ ମିଳିଛି । ଏ ନେଇ ଏକ ଜରୁରୀ ବୈଠକ ଚଳିତ ମାସ ୮ରେ ଅନୁଷ୍ଠିତ ହୋଇଥିଲା । କଞ୍ଚାମାଲ ଏବଂ ଅନ୍ୟ ଆନୁଷଙ୍ଗିକ ଖର୍ଚ୍ଚ ବୃଦ୍ଧି ଜନୀତ ଚାପ ଯୋଗୁ ଏଭଳି ମେଡିସିନଗୁଡିକର ଦର ବୃଦ୍ଧି ପାଇଁ କମ୍ପାନିଗୁଡିକ ନିବେଦନ କରିଥିଲେ ।
ଏହି ମେଡିସନ ଗୁଡିକ ମଧ୍ୟରେ ହୃଦରୋଗ ପାଇଁ ବ୍ୟବହୃତ ଅଟ୍ରୋପାଇନ ଇଞ୍ଜେକ୍ସନ ୦.୬ ମିଲିଗ୍ରାମ, ଟିବି ପାଇଁ ବ୍ୟବହୃତ ଷ୍ଟେପ୍ଟ୍ରୋମିସିନ ଇଞ୍ଜେକ୍ସନ ପାଉଡର ୭୫୦ ମିଲି ଗ୍ରାମ, ୧୦୦୦ ମିଲିଗ୍ରାମ, ଆଜ୍ମା ମେଡିସିନ ସାଲବୁଟାମୋଲ ଟାବଲେଟ ୨ ମିଲିଗ୍ରାମ, ୪ ମିଲିଗ୍ରାମ ଟାବଲେଟ ଏବଂ ରେସ୍ପିରେଟର ସଲ୍ୟୁଶନ ୫ ମିଲିଗ୍ରାମ ସଲ୍ୟୁଶନ ରହିଛି ।
ଅନ୍ୟ ମେଡିସିନ ମଧ୍ୟରେ ପିଲୋକାର୍ପାଇନ ୨% ଡ୍ରପ, ସେଫାଡ୍ରୋକ୍ସିଲ ଟ୍ୟାବଲେଟ ୫୦୦ ମିଲିଗ୍ରାମ, ଥାଲେସେମିଆ ଲାଗି ବ୍ୟବହୃତ ଡେଫେରୋକ୍ସାମାଇନ ୫୦୦ ମିଲିଗ୍ରାମ ଏବଂ ଲିମିଥୟ ଟାବଲେଟ ୩୦୦ ମିଲିଗ୍ରାମ ରହିଛି । ଏନ୍ପିପିଏ ପକ୍ଷରୁ କୁହାଯାଇଛି ଯେ, ସୁଲଭ ମୂଲ୍ୟରେ ଲୋକଙ୍କୁ ଅତ୍ୟାବଶ୍ୟକ ମେଡିସିନ ଯୋଗାଣ ନିଶ୍ଚିତ କରିବା ଏବଂ ମେଡିସିନ ଗୁଡିକର ଉପଲବ୍ଧ କରାଇବା ଦିଗରେ ପଦକ୍ଷେପ ନିଆଯାଇଛି ।
ଦର ନିୟନ୍ତ୍ରଣ ନ କଲେ ମେଡିସନ ଗୁଡିକ ବଜାରରେ ମିଳିବା କଷ୍ଟକର ହୋଇପଡିବ । ମେଡିସିନ ଉତ୍ପାଦନରେ ବ୍ୟବହୃତ ଏପିଆଇ, ବିନିମୟ ହାର ଭଳି ବିଭିନ୍ନ ଦିଗକୁ ନେଇ କମ୍ପାନି ଗୁଡିକ ସିଲିଂ ମୂଲ୍ୟରେ ପରିବର୍ତ୍ତନ କରିବାକୁ ନିବେଦନ କରିଥିଲେ । ବିଭିନ୍ନ ଦିଗକୁ ବିଚାର କରିବା ପରେ ଏଭଳି ନିଷ୍ପତ୍ତି ନିଆଯାଇଛି।