ନୂଆଦିଲ୍ଲୀ, ୨୭।୧୨: ଆର୍ଥିକ ବର୍ଷ ୨୦୨୫- ୨୬ରେ କେନ୍ଦ୍ର ସରକାର ବିତ୍ତୀୟ ନିଅଣ୍ଟକୁ ୪.୫%କୁ ହ୍ରାସ କରିବା ଲାଗି ଲକ୍ଷ୍ୟ ରଖିଛନ୍ତି । ବ୍ୟବସ୍ଥିତ ଖର୍ଚ୍ଚ, ସାମାଜିକ ସୁରକ୍ଷା କାର୍ଯ୍ୟକ୍ରମକୁ ଦୃଢ଼ କରିବା ଉପରେ ଫୋକସ କରାଯାଇଥିବା ଅର୍ଥ ମନ୍ତ୍ରଣାଳୟ ପକ୍ଷରୁ କୁହାଯାଇଛି । ଫେବ୍ରୁଆରୀ ପହିଲାରେ ସାଧାରଣ ବଜେଟ୍ ଉପସ୍ଥାପନ କରିବେ ଅର୍ଥମନ୍ତ୍ରୀ ନିର୍ମଳା ସୀତରମଣ । ଏଥର ମଧ୍ୟ ଭିତ୍ତିଭୂମି ପ୍ରକଳ୍ପଗୁଡ଼ିକୁ ସରକାର ପ୍ରାଥମିକତା ଦେବେ ବୋଲି କୁହାଯାଇଛି । ପୁଞ୍ଜି ଖର୍ଚ୍ଚରେ ଆଖିଦୃଶିଆ ବୃଦ୍ଧି ହୋଇପାରେ ।
ସେହିଭଳି ଗରିବଙ୍କ ଲାଗି ସାମାଜିକ କଲ୍ୟାଣକାରୀ ଯୋଜନାଗୁଡ଼ିକରେ ମଧ୍ୟ ସରକାର ବ୍ୟୟବରାଦ ବଢ଼ାଇପାରନ୍ତି । ତେବେ ବିଭିନ୍ନ ଖର୍ଚ୍ଚ ସତ୍ତେ୍ୱ ମଧ୍ୟ ବିତ୍ତୀୟ ସ୍ଥିତି ଯେଭଳି ନ ବିଗିଡ଼େ ତାକୁ ମଧ୍ୟ ସରକାର ଧ୍ୟାନରେ ରଖିବେ । ଅର୍ଥ ମନ୍ତ୍ରଣାଳୟ ନିକଟରେ ଟିକସ ସଂଗ୍ରହ ଏବଂ ଖର୍ଚ୍ଚ ସ୍ଥିତିକୁ ନିକଟରେ ତର୍ଜମା କରିଥିଲା । ସରକାରୀ ଖର୍ଚ୍ଚର ପାରଦର୍ଶିତାକୁ ମଧ୍ୟ ବିଚାର କରାଯିବ । ଏଭଳି ପଦକ୍ଷେପ ଦ୍ୱାରା ଦେଶର ଆର୍ôଥକ ପରିଦୃଶ୍ୟ ଉପରେ ମୋଟାମୋଟି ଭାବେ ଭଲ ପ୍ରଭାବ ପଡ଼ିବ ବୋଲି କହିଛି ମନ୍ତ୍ରଣାଳୟ । ୟୁରୋପ ଏବଂ ମଧ୍ୟପ୍ରାଚ୍ୟରେ ଉପୁଜିଥିବା ସଙ୍କଟ ଭାରତୀୟ ଅର୍ଥନୀତି ପାଇଁ ଆହ୍ୱାନ ଆଣିବାର ଆଶଙ୍କା ରହିଛି । ଏହି ସ୍ଥିତି ସମ୍ପୂର୍ଣ୍ଣ ଭାବେ ସ୍ୱାଭାବିକ ହୋଇନି । ସରକାର ଅଭିବୃଦ୍ଧି ଏବଂ ଆର୍ଥିକ ସ୍ଥିରତାକୁ ବିଚାର କରିଛନ୍ତି । ମୋଟ ୪୮.୨୧ ଲକ୍ଷ କୋଟିର ଖର୍ଚ୍ଚ ମଧ୍ୟରେ ରାଜସ୍ୱ ଏବଂ ପୁଞ୍ଜି ଆକାଉଣ୍ଟ ବର୍ଗ ଯଥାକ୍ରମେ ୩୭.୦୯ ଲକ୍ଷ କୋଟି ଏବଂ ୧୧.୧୧ ଲକ୍ଷ କୋଟି ଟଙ୍କା ରହିଛି । ଚଳିତ ଆର୍ôଥକ ବର୍ଷ ପ୍ରଥମ ୬ ମାସରେ ୨୧.୧୧ ଲକ୍ଷ କୋଟି ଟଙ୍କା ଖର୍ଚ୍ଚ ହୋଇଛି । ଯାହା ବଜେଟ ଲକ୍ଷ୍ୟର ୪୩.୮% । ବିତ୍ତିୟ ନିଅଣ୍ଟ ୧୬.୧୩ ଲକ୍ଷ କୋଟି ଟଙ୍କା ରହିବାକୁ ଥିବା ବେଳେ ଏହା ଜିଡିପିର ୪.୯% ।
