ଜଳେଶ୍ୱର, ୨୮/୧୦: ମାଙ୍କଡ଼ ଆତଙ୍କରେ ଅତିଷ୍ଠ ହେଲେଣି ବାଲେଶ୍ବର ଜିଲ୍ଲା ସିଂଲା ଥାନା ଅନ୍ତର୍ଗତ ରଘୁନାଥପୁର ପଞ୍ଚାୟତର ଲୋକେ । ଗତ କିଛି ଦିନ ଧରି ୫୦ ରୁ ଉର୍ଦ୍ଧ୍ୱ ମାଙ୍କଡ ଗାଁ ଭିତରେ ପଶି ଗ୍ରାମବାସୀଙ୍କୁ ଗୋଡାଇ ଗୋଡାଇ ଆକ୍ରମଣ କରୁଛନ୍ତି । ମାଙ୍କଡ ଆକ୍ରମଣରେ ୧୫ ରୁ ଉର୍ଦ୍ଧ୍ୱ ଲୋକ ଗୁରୁତର ହୋଇ ବିଭିନ୍ନ ମେଡିକାଲରେ ଚିକିତ୍ସାଧିନ ଅଛନ୍ତି । ଯାହା ଫଳରେ ଲୋକେ ଭୟରେ ଘରୁ ବାହାରକୁ ବାହାରୁ ନାହାନ୍ତି । ରଘୁନାଥପୁର ପଞ୍ଚାୟତର ସାନଅସ୍ତୀ, କୁଙ୍କୁଡ଼ି, ମଠକଙ୍କୁଡ଼ି ଓ ପାଳସାହି ଆଦି ଗ୍ରାମରେ ୫୦ ରୁ ଅଧିକ ମାଙ୍କଡ଼ ଏହିଭଳି ଭାବରେ ଉତ୍ପାତ ହେଉଛନ୍ତି ।
ମାଙ୍କଡ ଭୟରେ ଲୋକମାନେ କାମ କରିବାକୁ ଯାଇ ପାରୁ ନଥିବାବେଳେ ପିଲା ମାନେ ପାଠ ପଢିବା ପାଇଁ ମଧ୍ଯ ଘରୁ ବାହାରକୁ ଯାଇ ପାରୁ ନାହାନ୍ତି । ଯଦି କୌଣସି ଜରୁରୀ କାମ କିମ୍ବା ହାଟ ବଜାରକୁ ଯିବାକୁ ପଡୁଛି, ତାହାଲେ ହାତରେ ଠେଙ୍ଗା ଏବଂ ଲାଠି ଧରି ଗ୍ରାମବାସୀମାନେ ମିଳିମିଶି ବାହାରୁଛନ୍ତି ।
ଗ୍ରାମବାସୀଙ୍କ କହିବା ଅନୁସାରେ, ମାଙ୍କଡ ପଲ ଭିତରେ କିଛି ପାଗଳ ମାଙ୍କଡ଼ ଅଛନ୍ତି । ସେମାନେ ଗୋଡାଇ ଗୋଡାଇ ଲୋକଙ୍କୁ କାମୁଡୁଛନ୍ତି । ମାଙ୍କଡ଼ କାମୁଡାରେ କିଛି ଗ୍ରାମବାସୀ ଗୁରୁତର ହୋଇ ବାଲେଶ୍ବର ଜିଲ୍ଲା ମୁଖ୍ଯ ଚିକିତ୍ସାଳୟ ସମେତ କଟକ ଏବଂ ଭୁବନେଶ୍ବରରେ ଚିକିତ୍ସାଧୀନ ଅଛନ୍ତି । ଗ୍ରାମବାସୀମାନେ ବନବିଭାଗକୁ ଜଣାଇବା ପରେ ବନବିଭାଗ ଟିମ ଗାଁରେ ପହଞ୍ଚି ମାଙ୍କଡଙ୍କୁ ଧରିବା ପାଇଁ ଉଦ୍ଯମ ଜାରି ରଖିଛନ୍ତି । ତେବେ ଗ୍ରାମବାସୀଙ୍କ ସୁରକ୍ଷା ଦୃଷ୍ଟିରୁ ମାଙ୍କଡ ପଲକୁ ତୁରନ୍ତ କାବୁ କରି ଅନ୍ଯତ୍ର ଛାଡିବା ପାଇଁ ଗ୍ରାମବାସୀ ବନବିଭାଗ ନିକଟରେ ଦାବି କରିଛନ୍ତି ।
