ନୂଆଦିଲ୍ଲୀ: ଭାରତର ଆଉ ୫ ଭାଷାକୁ ଶାସ୍ତ୍ରୀୟ ଭାଷାର ମାନ୍ୟତା ମିଳିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଗୁରୁବାର କେନ୍ଦ୍ର କ୍ୟାବିନେଟରେ ଏହି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି। ମରାଠୀ ଓ ବଙ୍ଗଳା ଭାଷା ସମେତ ୫ଟି ଭାଷାକୁ ଶାସ୍ତ୍ରୀୟ ଭାଷାର ମାନ୍ୟତା ଦେଇଛନ୍ତି କେନ୍ଦ୍ର ସରକାର । କେନ୍ଦ୍ର କ୍ୟାବିନେଟ୍ ଦ୍ୱାରା ଶାସ୍ତ୍ରୀୟ ଭାଷାର ମାନ୍ୟତା ପାଇଥିବା ପାଞ୍ଚଟି ଭାଷା ହେଉଛି ବଙ୍ଗାଳା, ମରାଠୀ, ପାଲି, ପ୍ରକ୍ରିତ ଏବଂ ଆସାମୀ ।
କେନ୍ଦ୍ର କ୍ୟାବିନେଟ ବୈଠକ ପରେ ଏନେଇ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ ସୂଚନା ଦେଇଛନ୍ତି । ସେ କହିଛନ୍ତି ଯେ, ପ୍ରଧାନମନ୍ତ୍ରୀ ମୋଦୀ ସର୍ବଦା ଭାରତୀୟ ଭାଷା ଉପରେ ଧ୍ୟାନ ଦେଇଆସିଛନ୍ତି । ଆଜି ୫ଟି ଭାଷା ମରାଠୀ, ପାଲି, ପ୍ରକ୍ରିତ, ଆସାମୀ ଏବଂ ବଙ୍ଗଳାକୁ ଶାସ୍ତ୍ରୀୟ ଭାଷା ଭାବରେ ମାନ୍ୟତା ମିଳିଛି ।
ସେପଟେ ଏହି ଘୋଷଣା ପରେ ପ୍ରଧାନମନ୍ତ୍ରୀ ମୋଦୀ ଏକ୍ସରେ ଲେଖିଛନ୍ତି, ‘ଆମ ସରକାର ଭାରତର ବଳିଷ୍ଠ ଇତିହାସ ଏବଂ ସଂସ୍କୃତିକୁ ନେଇ ଗର୍ବ କରିଆସିଛି । ଆଞ୍ଚଳିକ ଭାଷାର ଲୋକପ୍ରିୟତା ବଢ଼ାଇବା ଲାଗି ଆମର ସଂକଳ୍ପକୁ ସରକାର ଗୁରୁତ୍ବ ଦେଉଛନ୍ତି । ମୁଁ ବହୁତ ଖୁସି ଯେ କ୍ୟାବିନେଟ ଆସାମୀ, ବଙ୍ଗଳା, ମରାଠୀ, ପାଲି ଏବଂ ପ୍ରକ୍ରିତକୁ ଶାସ୍ତ୍ରୀୟ ଭାଷାର ମାନ୍ୟତା ଦେବାକୁ ନିଷ୍ପତ୍ତି ନେଇଛି । ସବୁ ଭାଷା ବହୁତ ସୁନ୍ଦର । ଏହି ସବୁ ଭାଷା ଆମର ବିବିଧତାକୁ ବୁଝାଉଛି ।ସମସ୍ତଙ୍କୁ ଶୁଭେଚ୍ଛା । ’
କେନ୍ଦ୍ର କ୍ୟାବିନେଟର ଏହି ନିଷ୍ପତ୍ତିକୁ ନେଇ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ବଶର୍ମା ପ୍ରଧାନମନ୍ତ୍ରୀ ମୋଦୀଙ୍କୁ ଧନ୍ୟବାଦ ଜଣାଇଛନ୍ତି । ସୂଚନାଯୋଗ୍ୟ, ଏବେ ସୁଦ୍ଧା ୧୧ ଟି ଆଞ୍ଚଳିକ ଭାଷାକୁ ଶାସ୍ତ୍ରୀୟ ଭାଷାର ମାନ୍ୟତା ମିଳିଛି । ଏହା ପୂର୍ବରୁ ତାମିଲ, ସଂସ୍କୃତ, ଓଡ଼ିଆ, ତେଲୁଗୁ, କନ୍ନଡ, ଏବଂ ମାଲାୟାଲାମ ଭାଷା ଏହି ତାଲିକାରେ ସାମିଲ ହୋଇସାରିଛି ।