ନୂଆଦିଲ୍ଲୀ: ବୈବାହିକ ଦୁଷ୍କର୍ମ (ମ୍ୟାରିଟାଲ୍ ରେପ୍)କୁ ଅପରାଧ ଶ୍ରେଣୀଭୁକ୍ତ ନକରିବାକୁ ସୁପ୍ରିମକୋର୍ଟଙ୍କୁ କହିଛନ୍ତି କେନ୍ଦ୍ର ସରକାର । ବୈବାହିକ ଦୁଷ୍କର୍ମକୁ ଅପରାଧିକରଣ କରିବାକୁ ନେଇ ଆବେଦନକୁ କେନ୍ଦ୍ର ସରକାର ବିରୋଧ କରିଛନ୍ତି । କେନ୍ଦ୍ର ସରକାର ଗୁରୁବାର ସୁପ୍ରିମକୋର୍ଟରେ କହିଛନ୍ତି ଯେ, ଯଦି ସ୍ୱାମୀ ଦ୍ୱାରା ନିଜ ପତ୍ନୀ ସହ ଯୌନ ସମ୍ପର୍କ ସ୍ଥାପନକୁ ଦୁଷ୍କର୍ମ ରୂପେ ଦଣ୍ଡନୀୟ ଅପରାଧ ବୋଲି ଘୋଷଣା କରାଯାଏ, ତେବେ ଦାମ୍ପତ୍ୟ ଜୀବନ ଉପରେ ଏହାର କୁପ୍ରଭାବ ପଡ଼ିପାରେ । କେନ୍ଦ୍ର ସରକାର ବୈବାହିକ ଦୁଷ୍କର୍ମକୁ ଅପରାଧ ଘୋଷଣା କରିବା ଲାଗି ଦାଖଲ କରାଯାଇଥିବା ଆବେଦନକୁ ବିରୋଧ କରି ସୁପ୍ରିମକୋର୍ଟରେ ସତ୍ୟପାଠ ଦାଖଲ କରିଛନ୍ତି ।
ସରକାରଙ୍କ ପକ୍ଷରୁ କୁହାଯାଇଛି ଯେ, ବୈବାହିକ ଦୁଷ୍କର୍ମ ସହ ଜଡ଼ିତ ମାମଲାରେ ଦେଶରେ ଦୂରଗାମୀ ସାମାଜିକ ଏବଂ ଆଇନଗତ ପ୍ରଭାବ ରହିବ । ତେଣୁ ଏହି ପ୍ରସଙ୍ଗକୁ କେବଳ ଆଇନ ଦୃଷ୍ଟିରୁ ଦେଖିବା ପରିବର୍ତ୍ତେ ଏକ ବ୍ୟାପକ ଦୃଷ୍ଟିକୋଣର ଆବଶ୍ୟକତା ରହିଛି । ବୈବାହିକ ଦୁଷ୍କର୍ମ କେବଳ ଆଇନଗତ ନୁହେଁ ବରଂ ଏକ ସାମାଜିକ ପ୍ରସଙ୍ଗ । କୌଣସି ନିଷ୍ପତ୍ତିରେ ପହଞ୍ଚିବା ପୂର୍ବରୁ ବ୍ୟାପକ ପରାମର୍ଶର ଆବଶ୍ୟକତା ରହିଛି । ବର୍ତ୍ତମାନ ଆଇନରେ ମହିଳାଙ୍କ ପାଇଁ ପର୍ଯ୍ୟାପ୍ତ ପ୍ରାବଧାନ ରହିଛି । ବିବାହ ପାରସ୍ପାରିକ ଦାୟିତ୍ୱର ଏକ ସଂସ୍ଥା ଅଟେ ।
ସରକାର କହିଛନ୍ତି ଯେ, ବୈବାହିକ ଦୁଷ୍କର୍ମକୁ ଅପରାଧ ଘୋଷଣା କରିବା ସୁପ୍ରିମକୋର୍ଟଙ୍କ ଅଧିକାର କ୍ଷେତ୍ରରେ ନାହିଁ । କେନ୍ଦ୍ର ସରକାର ସୁପ୍ରିମକୋର୍ଟରେ ଯୁକ୍ତି ରଖିଛନ୍ତି ଯେ, ବିବାହରେ ଦୁଷ୍କର୍ମ ପାଇଁ କଠୋର ଦଣ୍ଡ ପ୍ରାବଧାନ ଲାଗୁ କରିବା ଦ୍ୱାରା ବିବାହ ନାମକ ସଂସ୍ଥା ଉପରେ ଗଭୀର ସାମାଜିକ ଏବଂ ଆଇନଗତ ପ୍ରଭାବ ପଡ଼ିପାରେ । ତେବେ ସରକାର ସ୍ୱୀକାର କରିଛନ୍ତି ଯେ ସ୍ୱାମୀ ପାଖରେ ନିଜ ସ୍ତ୍ରୀଙ୍କ ସହମତିର ଉଲ୍ଲଂଘନ କରିବାର କୌଣସି ମୌଳିକ ଅଧିକାର ନାହିଁ । ଯଦି ଅଜଣା ବ୍ୟକ୍ତି ସହ ଜଡ଼ିତ ଦୁଷ୍କର୍ମର ଦଣ୍ଡନୀୟ ପ୍ରାବଧାନ ଏବଂ ଆଇନକୁ ସ୍ୱାମୀ ବିରୋଧରେ ଲାଗୁ କରାଯାଏ ତେବେ ଏହି ଆଇନ ପ୍ରୟୋଗ ବୈବାହିକ ଏବଂ ସାମାଜିକ ଢାଞ୍ଚାକୁ ଧ୍ବସ୍ତ କରିଦେବ ବୋଲି ସୁପ୍ରିମକୋର୍ଟରେ କହିଛନ୍ତି କେନ୍ଦ୍ର ସରକାର ।
ଭାରତୀୟ ଦଣ୍ଡ ସଂହିତା (ଆଇପିସି)ର ଧାରା ୩୭୫ର ବ୍ୟତିକ୍ରମ ୨ର ବୈଧତାକୁ ଚ୍ୟାଲେଞ୍ଜ କରାଯାଇଥିବା ଆବେଦନର ଜବାବରେ ସରକାର ଏହି ସତ୍ୟପାଠ ଦାଖଲ କରିଛନ୍ତି । ଧାରା ୩୭୫ର ବ୍ୟତିକ୍ରମ-୨ ଅନୁସାରେ, ଯଦି ପତ୍ନୀ ନାବାଳିକା ନୁହେଁ, ତେବେ ସ୍ୱାମୀ ଦ୍ୱାରା ଯୌନ ସମ୍ପର୍କକୁ ଦୁଷ୍କର୍ମ ଧରାଯିବ ନାହିଁ । ନୂଆ ଆଇନରେ ବି ଧାରା ୬୩ର ବ୍ୟତିକ୍ରମରେ ଏହା ସ୍ପଷ୍ଟ କରାଯାଇଛି ଯେ, ସ୍ତ୍ରୀ ସହ ସ୍ୱାମୀର ଯୌନ ସମ୍ପର୍କ ଦୁଷ୍କର୍ମ ନୁହେଁ । ସରକାର ସତ୍ୟପାଠରେ କହିଛନ୍ତି ଯେ ଯଦି ଏହି ବ୍ୟତିକ୍ରମକୁ ଅସାମ୍ୱିଧାନିକ କହି ରଦ୍ଦ କରାଯାଏ, ତେବେ ବୈବାହିକ ସମ୍ପର୍କ ଉପରେ ପ୍ରତିକୂଳ ପ୍ରଭାବ ପଡ଼ିବ ।