ମାଲକାନଗିରି, ୦୬/୧୨ : ସିଆରପିଏଫ୍ କ୍ୟାମ୍ପ ଉପରେ ମାଓ ହମ୍ଲା। ଛତିଶଗଡ ବିଜାପୁର ଜିଲ୍ଲାର ପାମେଡ ଥାନା ଅର୍ନ୍ତଗତ ଜେଡିପାଲି ଠାରେ ନୂତନ ଭାବେ ସ୍ଥାପନ ହୋଇଥିବା ସିଆରପିଏଫ୍ କ୍ୟାମ୍ପ ଉପରେ ମାଓବାଦୀମାନେ ଆକ୍ରମଣ କରିଛନ୍ତି। ଯବାନଙ୍କ ସାମ୍ନା କରିନପାରି ମାଓବାଦୀମାନେ ଛତ୍ରଭଙ୍ଗ ଦେଇଛନ୍ତି।
ସୂଚନାନୁଯାୟୀ, ଗୁରୁବାର ରାତିରେ ଶତାଧିକ ମାଓବାଦୀ ସିଆରପିଏଫ୍ କ୍ୟାମ୍ପ ନିକଟରେ ପହଞ୍ଚି ରକେଟ ବୋମା, ବିୟର ବୋତଲ ବୋମା, ଫିଙ୍ଗିବା ସହିତ ଆଖିବୁଜା ଗୁଳିମାଡ଼ କରିଥିଲେ। ସୁରକ୍ଷାବାହିନୀ ପକ୍ଷରୁ ଏହାର ପ୍ରତିଜବାବ ଦିଆଯାଇଥିଲା। ଯବାନଙ୍କ ଗୁଳି ବର୍ଷଣର ସାମ୍ନା କରି ନପାରି ମାଓବାଦୀମାନେ ଛତ୍ରଭଙ୍ଗ ଦେଇଥିଲେ। ପୂର୍ବରୁ ମଧ୍ୟ ମାଓବାଦୀମାନେ ଏହି କ୍ୟାମ୍ପ ଉପରେ ହମ୍ଲା କରିଥିଲେ। ତେବେ ମାଓବାଦୀଙ୍କ ଗୁଳିମାଡ଼ରେ କିଛି ଯବାନ ଆହତ ହୋଇଛନ୍ତି। ସେମାନଙ୍କୁ ନିକଟସ୍ଥ ସ୍ୱାସ୍ଥ୍ୟ କେନ୍ଦ୍ରକୁ ନିଆଯାଇ ଚିକିତ୍ସା କରାଯାଉଛି। ଆହତ ଯବାନଙ୍କ ସ୍ଵାସ୍ଥ୍ୟାବସ୍ଥା ସ୍ଥିର ରହିଛି।
