ପୁଣେ : ପୁଣେର ପିମ୍ପରୀ-ଚିଞ୍ଚୱଡରେ ଦୀପାବଳି ଅବସରରେ ଏକ ଦୁଃଖଦ ଘଟଣା ଘଟିଛି। ଏଠାରେ ରାସ୍ତାରେ ବାଣ ଫୁଟାଉ ଥିବା ୩୫ ବର୍ଷିୟ ଜଣେ ଯୁବକଙ୍କୁ ଦ୍ରୁତ ଗତିରେ ଆସୁଥିବା କାର୍ ଧକ୍କା ଦେଇ ଥିଲା। ଫଳରେ ଯୁବକଙ୍କ ମୃତ୍ୟୁ ହୋଇଥିଲା। ଏହି ଘଟଣା ସିସିଟିଭିରେ କଏଦ ହୋଇଛି। ଦୀପାବଳି ଅବସରରେ ସୋହମ ପଟେଲ ନିଜ ପରିବାର ସହ ରାଭେତରେ ଫେଲିସିଟି ସୋସାଇଟିର ସାମ୍ନାରେ ବାଣ ଫୁଟାଉ ଥିଲେ। ସେତେବେଳେ ରାସ୍ତାରେ ଯାଉ ଥିବା ଏକ ଦ୍ରୁତ ଗତିର କାର ସୋହମ ପଟେଲଙ୍କୁ ଜୋରରେ ଧକ୍କା ମାରିଥିଲା। ଫଳରେ ସେ ଗୁରୁତର ଭାବେ ଆହତ ହୋଇ ଥିଲେ ଏବଂ ଏହାପରେ ତାଙ୍କର ମୃତ୍ୟୁ ହୋଇ ଯାଇଥିଲା।
ଦୀପାବଳି ଦିନ ଘଟଣାରେ ପଟେଲ ପରିବାର ଉପରେ ଦୁଃଖର ପାହାଡ଼ ଭାଙ୍ଗି ପଡ଼ି ଥିଲା। କିନ୍ତୁ ୪୮ ଘଣ୍ଟା ପରେ ମଧ୍ୟ ପୋଲିସ ଚାଳକଙ୍କୁ ଧରି ପାରି ନାହିଁ। ହେଲେ ରାଭେତ ପୋଲିସ ଚାଳକଙ୍କ ବିରୋଧରେ ମାମଲା ରୁଜୁ କରି ସାରିଛି। ଏହି ଘଟଣା ଶୁକ୍ରବାର ରାତି ପାଖାପାଖି ସମୟ ୯ଟାରେ ହୋଇ ଥିବା କୁହାଯାଉଛି।
ଭାଇରାଲ ଭିଡ଼ିଓରେ ଦେଖିବାକୁ ପାଇବେ କି , ସୋସାଇଟି ବାହାରେ ଅନେକ ଲୋକ ବାଣ ଫୁଟାଉଛନ୍ତି। ଏହି ସମୟରେ ସୋହମ ପଟେଲ ମଧ୍ୟ ନିଜ ପରିବାର ସହ ସୋସାଇଟି ବାହାରେ ବାଣ ଫୁଟାଇବାକୁ ଯାଉଛନ୍ତି। ଭିଡ଼ିଓରେ ଦେଖିବାକୁ ମିଳୁଛି ଯେ ସୋହମ ଲାଲ କୁର୍ତ୍ତା ପିନ୍ଧି ଥିବାର ନଜର ଆସୁଛନ୍ତି। ବାଣଫୁଟାଇବା ବେଳେ ସେ ରାସ୍ତା ପାର୍ଶ୍ୱରେ ଠିଆ ହୋଇ ଥିଲେ। ଏହି ସମୟରେ ଦ୍ରୁତ ଗତିରେ ଆସୁ ଥିବା କଳା ରଙ୍ଗର ଏକ କାର ତାଙ୍କୁ ଧକ୍କା ଦେଇ ଚାଲି ଯାଇଥିଲା।
