ନୂଆଦିଲ୍ଲୀ ୦୭/୧୨: ଦୀର୍ଘ ୨୫ ବର୍ଷ ପରେ ଭାରତ ଫେରିଛନ୍ତି ୯୦ ଦଶକର ଚର୍ଚ୍ଚିତ ବଲିଉଡ୍ ନାୟିକା ମମତା କୁଲକର୍ଣ୍ଣୀ । ଏକ ଖାସ୍ କାରଣ ପାଇଁ ସେ ଭାରତ ଆସିଛନ୍ତି । ନିକଟରେ ଏକ ସାକ୍ଷାତକାରରେ ୨୦୦୦ କୋଟି ଡ୍ରଗ୍ସ ମାମଲା ବିଷୟରେ ସେ ମୁହଁ ଖୋଲିଛନ୍ତି । ୨୦୧୪ ମସିହାରେ ମମତାଙ୍କ ନାଁ ସ୍ୱାମୀ ଭିକ୍କି ଗୋସ୍ୱାମୀଙ୍କ ସହ ଡ୍ରଗ୍ସ ମାମଲାରେ ସାମିଲ ହେବା ନେଇ ଚର୍ଚ୍ଚାକୁ ଆସିଥିଲା । ଏବେ ମମତା ସାକ୍ଷାତକାରରେ ସ୍ପଷ୍ଟ କରିଛନ୍ତି, ଭିକି ତାଙ୍କ ସ୍ୱାମୀ ନୁହଁନ୍ତି । ଏଥିସହ ସେ ଡ୍ରଗ୍ସ ମାମଲାର ପ୍ରକୃତ ସତ ମଧ୍ୟ କହିଛନ୍ତି ।
ତାଙ୍କ କହିବା ଅନୁସାରେ, ୨୦୧୪ ମସିହାରେ ସେ ଏକ ବୈଠକରେ ସାମିଲ ହୋଇଥିଲେ । କିନ୍ତୁ ଭିକି କାହାକୁ ଭେଟୁଛନ୍ତି, ତାହା ସେ ଜାଣିନଥିଲେ । ମମତା କହିଛନ୍ତି ‘ମୁଁ ଭିକିଙ୍କୁ ଜାଣିଥିଲି । ୨୦୧୪ ମସିହାରେ ପୁଲିସ ଏ ମାମଲା ଉଠାଇବା ପରେ ମୁଁ ତାଙ୍କୁ ଭେଟିବାକୁ କେନିଆ ଯାଇଥିଲି । କିନ୍ତୁ ସେ କାହାକୁ ଭେଟୁଥିଲେ, ମୁଁ ଜାଣିନଥିଲି । ମୋର ତାଙ୍କ କାରବାରରେ କୌଣସି ସମ୍ପର୍କ ନ ଥିଲା । ଏବେ କୋର୍ଟ ମୋତେ ସବୁ ଅଭିଯୋଗରୁ ମୁକ୍ତ କରିଛନ୍ତି ।
‘କରନ ଅର୍ଜୁନ’, ‘ସବ୍ସେ ବଡ଼ା ଖିଲାଡ଼ି’ ଓ ‘ବାଜି’ ଭଳି ଫିଲ୍ମରେ ମମତା କାମ କରିଥିଲେ । ୨୦୦୦ ମସିହାରେ ସେ କେବଳ ଫିଲ୍ମ କ୍ୟାରିଅର୍ ନୁହେଁ, ବରଂ ଦେଶ ମଧ୍ୟ ଛାଡ଼ିଥିଲେ । ୨୦୦୦ କୋଟିର ଡ୍ରଗ୍ସ ମାମଲାରେ ସମ୍ପୃକ୍ତି ନେଇ ତାଙ୍କ ନାଁରେ ମାମଲା ରୁଜୁ ହୋଇଥିଲା । ଏ ବର୍ଷ ମମତାଙ୍କୁ ଏ ମାମଲାରୁ ମୁକ୍ତ କରାଯାଇଛି । ଏବେ ସେ ଭାରତ ଫେରିଛନ୍ତି । ଏକ ସୋସିଆଲ ମିଡିଆ ପୋଷ୍ଟ୍ ମାଧ୍ୟମରେ ସେ ନିଜ ଲେଉଟାଣି ଘୋଷଣା କରିଛନ୍ତି । ତେବେ କୌଣସି ଫିଲ୍ମ ପ୍ରୋଜେକ୍ଟ ପାଇଁ ସେ ଭାରତ ଆସିନାହାନ୍ତି । ୨୦୨୫- ମହାକୁମ୍ଭରେ ସାମିଲ ହେବାକୁ ଦେଶକୁ ଫେରିଥିବା ସେ କହିଛନ୍ତି ।
