ଭୁବନେଶ୍ଵର, ୩୧/୦୮ : ମାଲେଗାଓଁ ବିସ୍ଫୋରଣ ମାମଲା। ପ୍ରମାଣ ଅଭାବରୁ ସମସ୍ତ ଅଭିଯୁକ୍ତ ନିର୍ଦ୍ଦୋଷରେ ଖଲାସ। ସ୍ଵତନ୍ତ୍ର ଏନଆଇଏ କୋର୍ଟଙ୍କ ନିଷ୍ପତ୍ତି। ଏହି ମାମଲାରେ ପ୍ରଜ୍ଞା ସିଂ ଠାକୁର ଓ ପ୍ରସାଦ ପୁରୋହିତଙ୍କ ସମେତ ୭ ଜଣ ଅଭିଯୁକ୍ତ ଥିଲେ। ଆତଙ୍କବାଦ ବିରୋଧୀ ଆଇନ ଓ ଅସ୍ତ୍ରଶସ୍ତ୍ର ଆଇନ ମାମଲାରେ ସମସ୍ତ ଅଭିଯୁକ୍ତ ଦୋଷମୁକ୍ତ ହୋଇଛନ୍ତି।
ସୂଚନାନୁଯାୟୀ, ୨୦୦୮ ସେପ୍ଟେମ୍ଵର ୨୯ ତାରିଖ। ମୁମ୍ଵାଇଠୁ ପ୍ରାୟ ୨୦୦ କିମି ଦୂର ମାଲେଗାଓଁ ସହରର ଏକ ମସଜିଦ୍ ନିକଟରେ ବିସ୍ଫୋଟକ ଲଦା ହୋଇଥିବା ଏକ ମୋଟର ସାଇକେଲ୍ରେ ହଠାତ୍ ଭୟଙ୍କର ବିସ୍ଫୋରଣ ହୋଇଥିଲା। ଏହି ବିସ୍ଫୋରଣରେ ୬ ଜଣଙ୍କର ମୃତ୍ୟୁ ହୋଇଥିବା ବେଳେ ୧୦୦ ରୁ ଅଧିକ ଆହତ ହୋଇଥିଲେ। ଏହି ମାମଲାର ପ୍ରାରମ୍ଭିକ ତଦନ୍ତ ମହାରାଷ୍ଟ୍ର ଏଟିଏସ୍ ଦ୍ୱାରା କରାଯାଇଥିଲା। ପରେ ୨୦୧୧ ମସିହାରେ ଏନଆଇଏକୁ ହସ୍ତାନ୍ତର କରାଯାଇଥିଲା । ପ୍ରାୟ ୫ ବର୍ଷର ତଦନ୍ତ ପରେ, ଏନଆଇଏ ୨୦୧୬ରେ ଏକ ଚାର୍ଜସିଟ୍ ଦାଖଲ କରିଥିଲା।୧୭ ବର୍ଷ ପରେ ଏହି ମାମଲାର ରାୟ ପ୍ରକାଶ ପାଇଛି। ମୁମ୍ଵାଇର ସ୍ଵତନ୍ତ୍ର ଏନଆଇଏ କୋର୍ଟ ଏହି ମାମଲାରେ ଶୁଣାଣି କରି ୭ ଅଭିଯୁକ୍ତଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି । ଏହା ସହ ପୀଡିତଙ୍କ ପରିବାରକୁ ୨ ଲକ୍ଷ ଟଙ୍କା ଏବଂ ଆହତଙ୍କ ପରିବାରକୁ ୫୦ ହଜାର ଟଙ୍କା କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଛନ୍ତି।
କୋର୍ଟଙ୍କ ରାୟ ପରେ ବିଜେପି ସାଂସଦ ପ୍ରଜ୍ଞା ସିଂ ଠାକୁର, ଲେଫ୍ଟନାଣ୍ଟ କର୍ଣ୍ଣେଲ ପ୍ରସାଦ ପୁରୋହିତ, ଅବସରପ୍ରାପ୍ତ ମେଜର ରମେଶ ଉପାଧ୍ୟାୟ, ସୁଧାକର ଚତୁର୍ବେଦି, ଅଜୟ ରାହିରକର, ସୁଧାକର ଧର ଦ୍ୱିବେଦୀ ଏବଂ ସମୀର କୁଲକର୍ଣ୍ଣିଙ୍କୁ ବଡ଼ ଆଶ୍ୱସ୍ତି ମିଳିଛି। କୋର୍ଟ କହିଛନ୍ତି ଯେ 'ଆତଙ୍କବାଦର କୌଣସି ରଙ୍ଗ କିମ୍ବା ଧର୍ମ ନାହିଁ କିମ୍ଵା କୌଣସି ଧର୍ମ ଆତଙ୍କବାଦ ପାଇଁ ଓକିଲାତି କରେ ନାହିଁ'। ଏହା ସମାଜ ବିରୋଧରେ ଏକ ଧର୍ତ୍ତବ୍ୟ ଅପରାଧ। ହେଲେ ଆଇନ ଅନୁଯାୟୀ ସଜା ଦେବା ପାଇଁ କେବଳ ନୈତିକ ଆଧାର ନୁହେଁ ବଳିଷ୍ଠ ପ୍ରମାଣ ଥିବା ଆବଶ୍ୟକ। ଅଭିଯୁକ୍ତଙ୍କ ବିରୋଧରେ କୌଣସି ଠୋସ୍ ପ୍ରମାଣ ନାହିଁ। ବାଇକ୍ରେ ବୋମା ଥିବା ନେଇ ସରକାରୀ ଓକିଲ ପ୍ରମାଣ କରିବାରେ ବିଫଳ ହୋଇଛନ୍ତି। କେବଳ ସନ୍ଦେହ କରି ଦଣ୍ଡ ଦିଆଯାଏ ନାହିଁ। ପୁଲିସ ଚାହିଁଲେ ୱାଣ୍ଟେଡ୍ ଅଭିଯୁକ୍ତଙ୍କ ବିରୋଧରେ ଅଲଗା ଚାର୍ଜସିଟ୍ ଦାଖଲ କରିପାରିବ।
