ଭୁବନେଶ୍ୱର,୦୧/୦୮: ଫିଲ୍ମ ଫ୍ରାଇଡେ ରିଲିଜ ପରଦାକୁ ଆସିବ ଓଡ଼ିଆ ଚଳଚ୍ଚିତ୍ର ‘ଛି ରେ ନନୀ' । ଏଥର ଛୋଟ ପରଦା ନୁହେଁ, ବରଂ ବଡ଼ ପରଦାରେ ‘ଛି ରେ ନନୀ' କ୍ରେଜ୍ ଦେଖିବାକୁ ମିଳିବ । ଏକାସାଙ୍ଗରେ ରାଜ୍ୟର ୫୦ଟି ପ୍ରେକ୍ଷାଳୟରେ ମୁକ୍ତିଲାଭ କରୁଥିବା ବେଳେ ଭୁବନେଶ୍ୱରରେ ପୂରା ୟୁନିଟ୍ ସହ କଳାକାରଙ୍କ ଗହଣରେ ଗ୍ରାଣ୍ଡ୍ ପ୍ରିମିୟର୍ ଶୋ’ ହେବ ।
ବହୁଦିନ ପରେ ସଙ୍ଗୀତ ଭିତ୍ତିକ ପ୍ରେମ କାହାଣୀକୁ ନେଇ ସିଦ୍ଧାର୍ଥ ମ୍ୟୁଜିକ୍ ଓ ସୁଶାନ୍ତ ମଣିଙ୍କ ନିର୍ଦ୍ଦେଶନାର ଫିଲ୍ମ ଆସୁଛି । ଏଥିରେ ଗ୍ରାମ୍ୟ ବାସ୍ତବତା ଓ ହୃଦୟ ବିଦାରକ ନାଟକୀୟତାକୁ ଏକ ବଳିଷ୍ଠ କାହାଣୀ ତଥା ସାହସିକ ଚିତ୍ରଣ ମାଧ୍ୟମରେ ଭିନ୍ନ କରିବାର ପ୍ରୟାସ କରିଛନ୍ତି ନିର୍ଦ୍ଦେଶକ ସୁଶାନ୍ତ ମଣି । ପୂର୍ବରୁ ଏହାର ଗୀତ ଗୁଡ଼ିକ ଯଥେଷ୍ଟ ଲୋକପ୍ରିୟ ହୋଇଥିବାରୁ ଚଳଚ୍ଚିତ୍ର ଦେଖିବା ପାଇଁ ପ୍ରବଳ ଭିଡ଼ ହେବ ବୋଲି ପ୍ରଯୋଜନା ସଂସ୍ଥା ଆଶା ରଖିଛି । ଦର୍ଶକଙ୍କୁ ଅନେକ ସଫଳ ସିନେମା ଭେଟି ଦେଇଥିବା ଅନୁଭବୀ ପ୍ରଯୋଜକ ସୀତାରାମ ଅଗ୍ରୱାଲ ଓ ନମିତା ଅଗ୍ରୱାଲଙ୍କ ପ୍ରଯୋଜିତ ଏହି ଚଳଚ୍ଚିତ୍ର ଏକ ନିଆରା ତଥା ନିରୀହ ପ୍ରେମ କାହାଣୀକୁ ନେଇ ସମୃଦ୍ଧ ହୋଇଛି । ସେ ସିନେମାକୁ ନେଇ ବହୁ କିଛି ଆଶା ରଖିବା ସହ ‘ଛିରେ ନନୀ ଛି..' ଗୀତ ଯେମିତି ହିଟ୍ ହୋଇଥିଲା ସିନେମା ଆଉ ଦି’ ପାଦ ଆଗକୁ ଯାଇ ସୁପରହିଟ୍ ହେବ ବୋଲି କହିଛନ୍ତି ।
ଏଥିରେ ଦର୍ଶକ ନାୟକ ଶୈଳେନ୍ଦ୍ର ଓ ନାୟିକା ଶିବାନୀଙ୍କୁ ପ୍ରଥମ କରି ଭିନ୍ନ ଭୂମିକାରେ ଦେଖିବାକୁ ପାଇବେ । ଅଭିନେତା ଦୀପନ୍ୱିତ ଦାଶମହାପାତ୍ର ମଧ୍ୟ ଦମ୍ଦାର୍ ଭୂମିକାରେ ଅବତୀର୍ଣ୍ଣ ହୋଇଛନ୍ତି । ଅନ୍ୟାନ୍ୟ ଭୂମିକାରେ ଚୌଧୁରୀ ଜୟପ୍ରକାଶ ଦାସ, ଧରିତ୍ରୀ ଖଣ୍ଡୁଆଳ, ସୁମନ୍ତ ମଣି, ଭକ୍ତି ରଞ୍ଜନ ଓ ଆଦ୍ୟାଶା ପ୍ରମୁଖ ଅଭିନୟ କରିଛନ୍ତି । କାର୍ଯ୍ୟନିର୍ବାହୀ ପ୍ରଯୋଜକର ଗୁରୁ ଦାୟିତ୍ୱ ତୁଲାଇଛନ୍ତି ଯୁବ ନିର୍ମାତା ଯୋଡ଼ି ସିଦ୍ଧାର୍ଥ ଓ ତମନ୍ନା ଅଗ୍ରୱାଲ । ସଂଳାପ ଲେଖିଛନ୍ତି ସୁଶାନ୍ତ ମଣି ଓ ହିରେନ କୁମାର । ‘ଛିରେ ନନୀ'ର ଗୀତିକାର ଓ ସଙ୍ଗୀତକାର ହେଉଛନ୍ତି ସ୍ୱର୍ଗତ ସତ୍ୟ ଅଧିକାରୀ । ଡିଓପିରେ ଅଛନ୍ତି କୁହୁ ମଲ୍ଲ । କୋରିଓଗ୍ରାଫି କରିଛନ୍ତି ସୁମନ୍ତ ମଣି । ରିଲିଜ୍ ପୂର୍ବରୁ ନାୟକ ଶୈଳେନ୍ଦ୍ର ଓ ନାୟିକା ଶିବାନୀଙ୍କ ସହ ଅନ୍ୟମାନେ ପୁରୀ ଯାଇ ଶ୍ରୀମନ୍ଦିରରେ ଶ୍ରୀଜଗନ୍ନାଥଙ୍କୁ ନିମନ୍ତ୍ରଣ କରିବା ସହ ସଫଳତା ନେଇ ପ୍ରାର୍ଥନା କରିଛନ୍ତି।
