ମୁମ୍ବାଇ,୦୧/୦୮: ଆମିର ଖାନଙ୍କ ବହୁ ପ୍ରତିକ୍ଷୀତ ଫିଲ୍ମ 'ସୀତାରେ ଜମିନ ପର' ନିକଟରେ ୟୁଟ୍ୟୁବରେ ରିଲିଜ ହୋଇଥିଲା । ହେଲେ ଫିଲ୍ମ ରିଲିଜର କିଛି ଦିନ ପରେ ୟୁଜର ଅସୁବିଧାର ସାମ୍ନା କରିଛନ୍ତି । ଏଣିକି ଆପଲ୍ ଡିଭାଇସ୍ ୟୁଜରମାନେ ୧୭୯ ଟଙ୍କା ଦେଇ ଏହାକୁ ଦେଖିପାରିବେ। ଯାହାକୁ ନେଇ ଅଭିନେତା ଆମିର ଖାନ ଫ୍ୟାନ୍ସଙ୍କୁ କ୍ଷମା ମାଗିବା ସହ ସ୍ପଷ୍ଟ କରିଛନ୍ତି ଯେ ସମସ୍ୟା ଏକ ତ୍ରୁଟି ଯୋଗୁଁ ହେଉଛି । ତାଙ୍କ ଟିମ୍ ଏହାକୁ ଯଥାଶୀଘ୍ର ସମାଧାନ କରିବାକୁ କାମ କରୁଛନ୍ତି।
ଯଦିଓ ଆମିର ଖାନ ସୋସିଆଲ ମିଡିଆରେ ନାହାନ୍ତି, କିନ୍ତୁ ତାଙ୍କ ପ୍ରଯୋଜନା ସଂସ୍ଥା, ଆମିର ଖାନ ପ୍ରଡକ୍ସନ୍ସ ଅଫିସିଆଲ୍ ଟ୍ୱିଟର ଆକାଉଣ୍ଟ ଏହି ପ୍ରସଙ୍ଗରେ ସ୍ପଷ୍ଟୀକରଣ ଦେଇଛି। ସେ ଲେଖିଛନ୍ତି, "ଆମେ ବର୍ତ୍ତମାନ ଜାଣିବାକୁ ପାଇଲୁ ଯେ ଆମର ଫିଲ୍ମ 'ସିତାରେ ଜମିନ୍ ପର'ର ରେଟ୍ ଆପଲ୍ ଡିଭାଇସରେ ୧୭୯ ଟଙ୍କା ଦେଖାଯାଉଛି। ଆମେ ଯଥାଶୀଘ୍ର ଏହି ସମସ୍ୟାର ସମାଧାନ କରିବାକୁ ଚେଷ୍ଟା କରୁଛୁ। ଆପଣଙ୍କ ଧର୍ଯ୍ୟ ଏବଂ ବୁଝାମଣା ପାଇଁ ଧନ୍ୟବାଦ।" ଅଭିନେତା-ପ୍ରଯୋଜକ ଫିଲ୍ମ ଦେଖିବାର ବୃଦ୍ଧି ପାଉଥିବା ମୂଲ୍ୟ ଉପରେ ଚିନ୍ତା ପ୍ରକାଶ କରିଛନ୍ତି ଏବଂ ତାଙ୍କର ୟୁଟ୍ୟୁବ୍ ଚ୍ୟାନେଲ୍ ମାଧ୍ୟମରେ ଜନସାଧାରଣଙ୍କ ପାଇଁ ଚଳଚ୍ଚିତ୍ର ଉପଲବ୍ଧ କରାଇବାର ଦୃଷ୍ଟିକୋଣ ସେୟାର କରିଛନ୍ତି।
ଆଧୁନିକ ମଲ୍ଟିପ୍ଲେକ୍ସଗୁଡ଼ିକୁ ବିଳାସପୂର୍ଣ୍ଣ ହୋଟେଲ ସହିତ ତୁଳନା କରି ଆମିର କହିଛନ୍ତି, "ମଲ୍ଟିପ୍ଲେକ୍ସଗୁଡ଼ିକ ୨୦୦୫-୦୬ ରେ ଆରମ୍ଭ ହୋଇଥିଲା। ଏଥିରେ ବହୁତ ନିବେଶ ହୋଇଥିଲା, ତେଣୁ ଟିକେଟ୍ ଏବଂ ଖାଦ୍ୟର ମୂଲ୍ୟ ମଧ୍ୟ ବୃଦ୍ଧି ପାଇଥିଲା। ଯେପରି ଆପଣ ଏକ ପଞ୍ଚତାରକା ହୋଟେଲକୁ ଯାଆନ୍ତି, ଯାହା ଅନ୍ୟତ୍ର ଆପଣଙ୍କୁ ଯାହା ବହୁତ କମ୍ ମୂଲ୍ୟରେ ମିଳେ,କିନ୍ତୁ ସେଠାରେ ବହୁତ ମୂଲ୍ୟ ପଡ଼ିଯାଏ କାରଣ ସେଠାରେ ଅଧିକ ସୁବିଧା ଏବଂ ଏକ ୫ତାରକା ପରିବେଶ ଅଛି।" ସେ ଆହୁରି କହିଛନ୍ତି, "ସେହିପରି, ମଲ୍ଟିପ୍ଲେକ୍ସଗୁଡ଼ିକ ଏବେ ବହୁତ ଉଚ୍ଚକୋଟୀର ହୋଇଗଲାଣି। ଆମିର ଖାନ ପ୍ରଡକ୍ସନ୍ସ ବ୍ୟାନରରେ ନିର୍ମିତ, ସିତାରେ ଜମିନ୍ ପରରେ ଆମିର ଖାନ ଏବଂ ଜେନେଲିଆ ଦେଶମୁଖଙ୍କ ସହିତ ୧୦ ଜଣ ତାରକା ମୁଖ୍ୟ ଭୂମିକାରେ ଅଭିନୟ କରିଛନ୍ତି। ଫିଲ୍ମର ଗୀତଗୁଡ଼ିକ ଅମିତାଭ ଭଟ୍ଟାଚାର୍ଯ୍ୟ ଲେଖିଛନ୍ତି ଏବଂ ମ୍ୟୁଜିକ ଦେଇଛନ୍ତି ଶଙ୍କର-ଏହସାନ-ଲୟ। ଚିତ୍ରନାଟ୍ୟ ଲେଖିଛନ୍ତି ଦିବ୍ୟା ନିଧି ଶର୍ମା। ଫିଲ୍ମଟି ଆମିର ଖାନ ଏବଂ ଅପର୍ଣ୍ଣା ପୁରୋହିତଙ୍କ ଦ୍ୱାରା ପ୍ରଯୋଜିତ ଏବଂ ରବି ଭାଗଚଣ୍ଡକା ଏହାର ପ୍ରଯୋଜକ।
