ନୂଆଦିଲ୍ଲୀ ୨୧/୦୧: ଚଳିତ ମାସ ୧୩ ତାରିଖରୁ ଆରମ୍ଭ ହୋଇଥିବା ମହାକୁମ୍ଭ ଆସନ୍ତା ଫେବ୍ରୁଆରୀ ୨୬ ତାରିଖରେ ଶେଷ ହେବ । ତୀର୍ଥରାଜ ପ୍ରୟାଗରାଜର ଏହି ଐତିହାସିକ ସଙ୍ଗମ ଦେଶରେ ଅସ୍ଥାୟୀ ନିଯୁକ୍ତି ଓ ଆର୍ଥିକ ବୃଦ୍ଧିର ପାୱାର୍ହାଉସ୍ ହୋଇଛି । ୪୫ ଦିନର ମହାକୁମ୍ଭ ଅବଧିରେ ବିଭିନ୍ନ କ୍ଷେତ୍ରରେ ୧୨ ଲକ୍ଷ ଅସ୍ଥାୟୀ ନିଯୁକ୍ତି ସୃଷ୍ଟି ହେବ ବୋଲି ଆକଳନ କରାଯାଇଛି । ଏହା ଯୋଗୁ ବିଭିନ୍ନ କ୍ଷେତ୍ରରେ କାର୍ଯ୍ୟରତ ୮ ଲକ୍ଷରୁ ଅଧିକ ଲୋକ ଉପକୃତ ହେବେ ।
ଏହି ଐତିହାସିକ ଆୟୋଜନ କେବଳ ପ୍ରୟାଗରାଜରେ ଅର୍ଥନୀତିକୁ ବଳ ଦେବ ତାହା ନୁହେଁ, ପଡ଼ୋଶୀ କ୍ଷେତ୍ରମାନଙ୍କୁ ମଧ୍ୟ ଆର୍ଥିକ ସଶକ୍ତ କରିବ । ପର୍ଯ୍ୟଟନ, ପରିବହନ ଓ ଲଜିଷ୍ଟିକ୍, ସ୍ୱାସ୍ଥ୍ୟସେବା, ଆଇଟି ଓ ଖୁଚୁରା ବ୍ୟବସାୟରୁ ଲକ୍ଷାଧିକ ଲୋକ ବ୍ୟାପକ ଉପକୃତ ହେବାର ଆଶା ରହିଛି ।
ବିଶ୍ୱସ୍ତରୀୟ ଟେକ୍ନୋଲୋଜି ଓ ଡିଜିଟାଲ ଟ୍ୟାଲେଣ୍ଟ୍ ସଲ୍ୟୁସନ୍ ପ୍ରୋଭାଇଡର୍ ଏନ୍ଏଲ୍ବି ସର୍ଭିସେସ୍ ଏହି ରିପୋର୍ଟ ଦେଇଛି । ରିପୋର୍ଟ ଅନୁସାରେ, ଗଭୀର ଆଧ୍ୟାତ୍ମିକ ମହତ୍ୱ ରଖୁଥିବା ମହାକୁମ୍ଭରେ ଏହି ପବିତ୍ର ସମାଗମ ଆର୍ଥିକ ଗତିବିଧିର ପ୍ରମୁଖ ସ୍ରୋତ ହୋଇଛି । ୟୁପି ସରକାର ମହାକୁମ୍ଭରେ ୪୦ କୋଟି ଶ୍ରଦ୍ଧାଳୁଙ୍କ ଆଗମନ ଆକଳନ କରିଛନ୍ତି, ଯାହା ଇତିହାସର ସର୍ବବୃହତ ଆଧ୍ୟାତ୍ମିକ ଓ ଧାର୍ମିକ ସମାଗମର ରୂପ ନେଇଛି ।
କନ୍ଫେଡେରେସନ୍ ଅଫ୍ ଅଲ୍ ଇଣ୍ଡିଆ ଟ୍ରେଡର୍ସ (ସିଏଆଇଟି) ଅନୁସାରେ, ଏହି ଆୟୋଜନରୁ ଆର୍ଥିକ ଗତିବିଧିରେ ୨ ଲକ୍ଷ କୋଟି ଆୟ ହେବାର ଆଶା କରାଯାଉଛି । ବିଭିନ୍ନ କ୍ଷେତ୍ରରେ ଏହା ଅଭୂତପୂର୍ବ ନିଯୁକ୍ତି ଅବସର ସୃଷ୍ଟି କରିବ । ଏନ୍ଏଲ୍ବି ସର୍ଭିସେସ୍ର ସିଇଓ ସଚିନ ଅଲୁଗ୍ କହିଛନ୍ତି, ଢାଞ୍ଚାଗତ ବିକାଶ, କାର୍ଯ୍ୟକ୍ରମ ପ୍ରବନ୍ଧନ, ନିରାପତ୍ତା ସେବା, ସ୍ଥାନୀୟ ବ୍ୟବସାୟ, ପର୍ଯ୍ୟଟନ, ମନୋରଞ୍ଜନ ଓ ଉଦ୍ୟାନକୃଷି ଜରିଆରେ ଆର୍ଥିକ ବୃଦ୍ଧିର ପ୍ରଭାବ ବିସ୍ତାର ହୋଇଥାଏ । ଏହା ଉଭୟ ପାରମ୍ପରିକ ଓ ଆଧୁନିକ ବ୍ୟବସାୟ କ୍ଷେତ୍ରର ବିକାଶକୁ ପ୍ରୋତ୍ସାହିତ କରେ ।
ଏ ସମସ୍ତ କ୍ଷେତ୍ରରେ ଅସ୍ଥାୟୀ ନିଯୁକ୍ତିରେ ବୃଦ୍ଧି ଉଭୟ ଔପଚାରିକ ଓ ଅନୌପଚାରିକ ନିଯୁକ୍ତି କ୍ଷେତ୍ରକୁ ବଳ ଦେଉଛି । ପର୍ଯ୍ୟଟନ ଓ ଆତିଥ୍ୟ ଉଦ୍ୟୋଗରେ ହୋଟେଲ କର୍ମଚାରୀ, ଟୁର୍ ଗାଇଡ୍, କୁଲି, ଭ୍ରମଣ ପରାମର୍ଶଦାତା ଓ ସଂଯୋଜକଙ୍କ ଭୂମିକା ଯଥେଷ୍ଟ ବୃଦ୍ଧି ପାଇବ ବୋଲି ଆଶା କରାଯାଉଛି । ବହୁ ସଂଖ୍ୟକ ଆଗନ୍ତୁକଙ୍କ ପ୍ରବନ୍ଧନ ନିମନ୍ତେ ୪.୫ ଲକ୍ଷ କର୍ମଚାରଙ୍କୁ ନିଯୁକ୍ତି ମିଳିବ ବୋଲି ଅଲୁଗ୍ କହିଛନ୍ତି ।
ସେହିପରି ପରିବହନ ଓ ଲଜିଷ୍ଟିକ୍ କ୍ଷେତ୍ର ଗାଡ଼ି ଚାଳକ, ଯୋଗାଣ ଶୃଙ୍ଖଳା ପ୍ରବନ୍ଧକ, କୋରିଅର କର୍ମୀ ଓ ଅନ୍ୟ ସହଯୋଗୀ କର୍ମଚାରୀଙ୍କ ପାଇଁ ୩ ଲକ୍ଷ ନିଯୁକ୍ତି ସୃଷ୍ଟି ହେବାର ଆକଳନ କରାଯାଇଛି । ମହାକୁମ୍ଭ ସମୟରେ ଅସ୍ଥାୟୀ ମେଡିକାଲ କ୍ୟାମ୍ପ୍ରେ ଫ୍ରିଲାନ୍ସ ନର୍ସ, ପାରାମେଡିକାଲ କର୍ମଚାରୀ ଓ ଏ ସମ୍ପର୍କୀୟ ସ୍ୱାସ୍ଥ୍ୟସେବା ଅଧିକାରୀଙ୍କୁ ନିଯୁକ୍ତି ପ୍ରଦାନ କରିବ । ଏଥିରୁ ୧.୫ ଲକ୍ଷ ନିଯୁକ୍ତି ସୃଷ୍ଟି ହେବ ।
ଆଇଟି ଓ ଟେକ୍ନୋଲୋଜି କ୍ଷେତ୍ରର ଚାହିଦା ବଢ଼ୁଛି । ଭର୍ଚୁଆଲ କୁମ୍ଭ ଦର୍ଶନ ଆପ୍ର ପ୍ରବନ୍ଧନ, କାର୍ଯ୍ୟକ୍ରମ ସମୟରେ (ରିୟଲ ଟାଇମ୍) ସବୁ ଖବର ପ୍ରଦାନ ଏବଂ ବାଧା-ରହିତ ଡିଜିଟାଲ ସେବା ନିମନ୍ତେ ସାଇବର୍ ସିକ୍ୟୁରିଟି ପାଇଁ ୨ ଲକ୍ଷ କର୍ମଚାରୀଙ୍କ ଆବଶ୍ୟକତା ରହିଛି । ଶ୍ରଦ୍ଧାଳୁଙ୍କ ଆବଶ୍ୟକତା ପୂରଣ ଲାଗି ଖୁଚୁରା ବ୍ୟବସାୟ କ୍ଷେତ୍ରରେ ହାରାହାରି ୧ ଲକ୍ଷ ନିଯୁକ୍ତି ସୃଷ୍ଟି ହେବାର ଆଶା କରାଯାଉଛି । ଏମାନେ କୁମ୍ଭ ମେଳାରେ ସ୍ଥାନୀୟ ଉତ୍ପାଦ, ଧାର୍ମିକ ସାମଗ୍ରୀ ଓ ଆବଶ୍ୟକ ଉପକରଣ ଜରିଆରେ ଶ୍ରଦ୍ଧାଳୁଙ୍କୁ ସେବା ଦେଉଛନ୍ତି । ସୂଚନାଯୋଗ୍ୟ, ବିଶ୍ୱର ସର୍ବବୃହତ ଧାର୍ମିକ ଆୟୋଜନ ମହାକୁମ୍ଭରେ ଅଦ୍ୟାବଧି ୮.୫ କୋଟି ଶ୍ରଦ୍ଧାଳୁ ବୁଡ଼ ପକାଇଛନ୍ତି ।
