ଭୁବନେଶ୍ୱର,୧୨/୧୦: ଧରାବତରଣ କରିଛନ୍ତି ମା ଦୁର୍ଗା । ଶୁକ୍ରବାର ମା’ଙ୍କ ମହାଷ୍ଟମୀ ପୂଜାର୍ଚ୍ଚନା ସମ୍ପର୍ଣ୍ଣ ହୋଇଛି । ଶନିବାର ମହାନବମୀ ପୂଜା । ଏଥିପାଇଁ ଚଳଚଞ୍ଚଳ ହୋଇଉଠିଛି ରାଜଧାନୀ । ଶନିବାର ଶକ୍ତିପୀଠରେ ବିଜୟା ଦଶମୀ ପୂଜା ଚାଲିଥିବାବେଳେ ପୂଜା ମଣ୍ଡପରେ ଚାଲିଛି ମହାନବମୀ ପୂଜା । ହୋମ, ଯଜ୍ଞ ଏବଂ ଚଣ୍ଡୀପାଠରେ କମ୍ପୁଛି ପରିବେଶ । ମା’ଙ୍କ ଆରଧନା କରିବାକୁ ପୂଜା ମଣ୍ଡପରେ ଲାଗି ରହିଛି ଭକ୍ତଙ୍କ ଭିଡ ।

ପୂଜା ପାଇଁ ଭୁବନେଶ୍ୱର ସମେତ ରାଜ୍ୟର ବିଭିନ୍ନ ପୂଜାମଣ୍ଡପରେ ବ୍ୟାପକ ଆୟୋଜନ ହୋଇଛି । ମୃଣ୍ମୟୀ ମୂର୍ତ୍ତି, ତୋରଣ ଓ ସାଜସଜ୍ଜା ବେଶ୍ ସୁନ୍ଦର ଓ ଆକର୍ଷଣୀୟ ହୋଇଛି । ନିଜ ନିଜର ପରିବାର ସହ ପୂଜା ମଣ୍ଡପ ଗୁଡିକ ବୁଲୁଛନ୍ତି ଲୋକେ । ସମସ୍ତ ପୂଜା ମଣ୍ଡପରେ ବ୍ୟାପକ ସୁରକ୍ଷାର ଆୟୋଜନ କରାଯାଇଥିବା ବେଳେ ସର୍ବତ୍ର ପୋଲିସ ମୁତୟନ ରହିଛନ୍ତି । ପୂଜାରେ ଯେମିତି କୌଣସି ବାଧା ସୃଷ୍ଟି ନହେଉ, ସେଥିପ୍ରତି ବିଶେଷ ଧ୍ୟାନ ଦିଆଯାଇଛି । ସମସ୍ତ ପୂଜା ମଣ୍ଡପ ବୁଲି ସେଠାରେ ହେଉଥିବା ସାଂସ୍କୃତିକ କାର୍ଯ୍ୟକ୍ରମର ମଧ୍ୟ ଆନନ୍ଦ ନେଉଛନ୍ତି ଲୋକେ । ରାଜଧାନୀ ଭୁବନେଶ୍ବରର ବିଭିନ୍ନ ପୂଜା ମଣ୍ଡପରେ ଆଖିଝଲସା ତୋରଣ ନିର୍ମାଣ କରାଯାଇଛି ।