ଭୁବନେଶ୍ୱର, ୧୫/୦୧: ଲିଙ୍ଗରାଜ ମନ୍ଦିର ବିବାଦ ପରେ ସେବାୟତଙ୍କୁ କଡ଼ା ଚେତାବନୀ ଦେଲେ ଆଇନମନ୍ତ୍ରୀ । ଆଗାମୀ ଦିନରେ ଏପରି କଲେ କଡ଼ା କାର୍ଯ୍ୟନୁଷ୍ଠାନ ନେବେ ସରକାର । ମନ୍ଦିରକୁ ନେଇ ଯେଉଁମାନେ ରାଜନୀତି ରୋଟି ସେକିବାକୁ ଚାହୁଁଛନ୍ତି ବନ୍ଦ କରନ୍ତୁ । ସ୍ୱତ୍ତ୍ୱଲିପି ନେଇ ଗଠନ ହେବ କମିଶନ । ହାଇକୋର୍ଟ ଅବସରପ୍ରାପ୍ତ ବିଚାରପତିଙ୍କୁ ନେଇ ଗଠନ ହେବ କମିଶନ । ଦୁଇ ମାସ ଭିତରେ କମିଶନ ରିପୋର୍ଟ ଦେବେ ଆଉ ଏଇ ରିପୋର୍ଟ ଆଧାରରେ ସ୍ୱତ୍ତ୍ୱଲିପି ଲାଗୁ ହେବ ବୋଲି ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନ କହିଛନ୍ତି ।
ଛୋଟ ଇସୁକୁ ନେଇ ଘଟଣା ଘଟିଛି ଏନେଇ ଆଲୋଚନା ହୋଇଛି । ଏହାକୁ ନେଇ ଟ୍ରଷ୍ଟ ବୋର୍ଡ ପକ୍ଷରୁ ଏକ ଏମରଜେନ୍ସି ବୈଠକ ଡାକିବା ପାଇଁ ନିଷ୍ପତ୍ତି ହୋଇଛି । ଟ୍ରଷ୍ଟ ବୋର୍ଡ ଆଜି ନିଷ୍ପତ୍ତି ନେବ ସେବା ପୂଜା ଆରମ୍ଭ କରନ୍ତୁ । କୌଣସି ସମୟରେ ଏପରି ସେବାୟତ ସେବକାନ୍ତି ବନ୍ଦ କରିବା ଭଳିଆ ଅଯୌଗିକ କାର୍ଯ୍ୟ ନକରନ୍ତୁ । ସ୍ୱତ୍ତ୍ୱଲିପିର କିଛି ସମସ୍ୟା ରହିଛି । ଆଇନଗତ ଦିଗରେ କିଛି ସମସ୍ୟା ଥିଲା । ଏନେଇ ବହୁତ ଶୀଘ୍ର ଅବସରପ୍ରାପ୍ତ ବିଚାରପତିଙ୍କ ଅଧ୍ୟକ୍ଷତାରେ ଏକ ସିଙ୍ଗଲ ମେମ୍ବର କମିଶନ ଗଢ଼ାଯିବ । ସେହି କମିଶନ ବିଭିନ୍ନ ନିଯୋଗ ନିକଟରେ ଥିବା ତଥ୍ୟ ହାସଲ କରିବେ, କଥା ହେବେ ଓ ଆଗରୁ କିଏ କେଉଁ କାର୍ଯ୍ୟ କରୁଥିଲେ ଦେଖିବେ । ଏନେଇ ଦୁଇ ମାସ ଭିତରେ ଏକ ରିପୋର୍ଟ ଦେବେ । ଏହାକୁ ଲାଗୁ କରିବାର ପ୍ରକ୍ରିୟା ଦେବତ୍ତର ବିଭାଗ ପକ୍ଷରୁ ସମ୍ପୂର୍ଣ୍ଣ ଭାବରେ କରାଯିବ । ଯାହା ଫଳରେ ଆଗାମୀ ଦିନରେ ସ୍ୱତ୍ତ୍ୱଲିପି ନେଇ କୌଣସି ଦ୍ଵନ୍ଦ ରହିବ ନାହିଁ । ଯେତେବେଳେ କୌଣସି ସମସ୍ୟା ଆସୁଛି ସେତେବେଳେ ସେବାୟତ ମ୍ୟାନେଜମେଣ୍ଟ କମିଟିକୁ ଜଣାନ୍ତୁ କିନ୍ତୁ ଏହି ଆଳରେ ପ୍ରଭୁ ଲିଙ୍ଗରାଜଙ୍କ ନୀତିକାନ୍ତି ବନ୍ଦ କରିବାକୁ ସରକାର ଗ୍ରହଣ କରିବେ ନାହିଁ । ଏନେଇ ଆଗାମୀ ଦିନରେ ନୀତିକାନ୍ତି ବ୍ୟାଘାତ ଘଟିଲେ ସରକାର କାର୍ଯ୍ୟାନୁଷ୍ଠାନ ନେବେ ବୋଲି କହିଛନ୍ତି ଆଇନମନ୍ତ୍ରୀ ।
ଏହି ବିବାଦକୁ ନେଇ ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କ ଘରେ ଗୁରୁତ୍ୱପୂର୍ଣ୍ଣ ବୈଠକ ଆରମ୍ଭ ହୋଇଛି । ଦୁଇ ଦିନ ଧରି ନିତିକାନ୍ତି ବନ୍ଦ ଦୁର୍ଭାଗ୍ୟଜନକ ବୋଲି କହିଛନ୍ତି ଆଇନମନ୍ତ୍ରୀ । ଆଜି ହିଁ ବାହାରିବ ନିର୍ଜାସ । ବିବାଦ ଭିତରେ ଠାକୁରଙ୍କ ନିତିକାନ୍ତି ବନ୍ଦ ହେବା ଭୁଲ୍ । ଭୁଲ୍ ଦେଖିବା ପରେ କଠୋର କାର୍ଯ୍ୟାନୁଷ୍ଠାନ ନିଆଯିବ ବୋଲି ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନ କହିଛନ୍ତି । ଲିଙ୍ଗରାଜ ମନ୍ଦିର ସମସ୍ୟାକୁ ନେଇ ଆଇନ ମନ୍ତ୍ରୀଙ୍କ ଘରେ ଉଚ୍ଚସ୍ତରୀୟ ବୈଠକ ଡକାଯାଇଛି । ଏହି ବୈଠକରେ ଦେବୋତ୍ତର କମିଶନର, ଖୋର୍ଦ୍ଧା ଜିଲ୍ଲାପାଳ, ଆଇନ ବିଭାଗ ସଚିବ, ସ୍ଥାନୀୟ ବିଧାୟାକ, ଉଭୟ ନିଯୋଗ ପ୍ରତିନିଧି ଉପସ୍ଥିତ ଅଛନ୍ତି ।
