କଟକ ୧୪/୦୧: ସିଲ୍ଭର ସିଟିରେ ଘାତକ ସାଜିଲା ଚାଇନିଜ୍ ମାଞ୍ଜା ସୂତା। ରାଣୀହାଟ ଓ ଶିଖରପୁରରେ ବାଇକ୍ରେ ଯାଉଥିବା ବେଳେ ବେକ ହାତରେ ଲାଗିଲା ଗୁଡ଼ି ସୂତା। ଫଳରେ ଦୁଇ ଜଣ ବାଇକ୍ ଆରୋହୀ ଆହତ ହୋଇଛନ୍ତି। ଜଣଙ୍କର ବେକ, ହାତ କଟିଥିବା ବେଳେ ଅନ୍ୟ ଜଣଙ୍କର ମୁହଁ କଟିଛି । ଦୁଇ ଜଣ ଯୁବକ ମୃତ୍ୟୁ ମୁଖରୁ ଅଳ୍ପକେ ବର୍ତ୍ତି ଯାଇଛନ୍ତି । ଉଭୟ ଆହତଙ୍କୁ ଚିକିତ୍ସା ପାଇଁ କଟକ ଏସସିବି ମେଡ଼ିକାଲକୁ ପଠାଯାଇଛି ।
ଓଡ଼ିଆ ଘରର ଏ ପବିତ୍ର ପର୍ବ ମକର ସଂକ୍ରାନ୍ତି । ଆଉ ଏହି ମକର ସଂକ୍ରାନ୍ତିରେ କଟକରେ ଗୁଡ଼ି ଉଡା ପରମ୍ପରା ଏକ ନିଆରା । କଟକ ଆକାଶରେ ଦେଖିବାକୁ ମିଳେ ରଙ୍ଗବେରଙ୍ଗର ରଙ୍ଗୀନ ଗୁଡ଼ି । ତେବେ ଏହି ଗୁଡ଼ି ଉଡାରେ ବ୍ୟବହୃତ ହେଉଥିବା ପ୍ଲାଷ୍ଟିକ ଚାଇନିଜ ମାଞ୍ଜା ସୂତା ସୃଷ୍ଟି କରୁଛି ବିପଦ । ପୁଲିସର କଟକଣା ସତ୍ତେ୍ୱ କଟକରେ ମାଞ୍ଜା ଓ ଚାଇନିଜ୍ ମାଞ୍ଜା ସୂତା ବ୍ୟବହାର ଓ ବିକ୍ରି ଉପରେ କଟକଣା ଲାଗିପାରୁନି । ଲୁଚାଛପାରେ କାରବାର ହେଉଥିବାରୁ ମାଳମାଳ ଚାଇନା ସୂତାର ଗୁଡ଼ି ଉଡ଼ୁଛି। ଫଳରେ ପ୍ରତିଦିନ ଛୋଟବଡ଼ ଅଘଟଣ ହେଉଛି । ଆଜିକୁ ମିିଶାଇ ୫ ଦିନରେ କଟକ ସହର ଓ ଉପକଣ୍ଠରେ ସୂତାରେ କଟି ୭ ଜଣ ଆହତ ହେଲେଣି ।
ମକର ପୂର୍ବରୁ ସୋମବାର ପୁରୀଘାଟ ଥାନା ପକ୍ଷରୁ ନନ୍ଦୀ ସାହି, ଚୌଧୁରୀ ବଜାର ଓ କାଠଗଡା ସାହିରେ ଗୁଡ଼ି ସୂତା ଦୋକାନ ଉପରେ ଚଢ଼ାଉ କରାଯାଇଥିଲା । ପ୍ରାୟ ୧୫ରୁ ଉର୍ଦ୍ଧ୍ବ ଦୋକାନରେ ଯାଞ୍ଚ କରାଯିବା ସହ ଗୁଡ଼ି ଉଡାରେ ବ୍ୟବହୃତ ବିପଦପୂର୍ଣ୍ଣ ସୂତା ସବୁକୁ ମଧ୍ୟ ଜବତ କରାଯାଇଥିଲା । ଏଥିସହ ଗୁଡ଼ି ଉଡାରେ ଯେଉଁମାନେ ପ୍ଲାଷ୍ଟିକ ମଞ୍ଜ ସୂତା ବ୍ୟବହାର କରିବେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଅତିରିକ୍ତ ଡିସିପି କହିଛନ୍ତି ।
