ମାଲକାନଗିରି,୧୪/୫(ଆପ୍ର): ଜାଲ ଦସ୍ତଖସ୍ତରେ ଜମି ଜାଲିଆତି କରି ନିଜ ସ୍ତ୍ରୀଙ୍କ ନାମରେ କବଲା କରିଥିବା ସବରେଜେଷ୍ଟ୍ରି ଅଫିସର ପୂର୍ବତନ କିରାଣୀଙ୍କୁ ପୁଲିସ ଗିରଫ କରି କୋର୍ଟ ଚାଲାଣ କରିଛି। ଦୀର୍ଘ ୪ବର୍ଷ ପରେ ଅଭିଯୋଗ କାରିଙ୍କୁ ମିଳିଛି ନ୍ୟାୟ। ବିଳମ୍ବ ହେଲେ ମଧ୍ୟ ସତ୍ୟର ହୋଇଛି ଜୟ।
ଖବର ମୁତାବକ, ମାଲକାନଗିରିର ସ୍ଥିତ ରିକ୍ଲେମେସନ୍ କଲୋନିର ସୁବୁଦ୍ଧି ଶେଖର ପାଢ଼ୀ ତାଙ୍କ ପତ୍ନୀ ପତ୍ନୀ ଜସୋବନ୍ତୀ ରଥଙ୍କ ନାମରେ ୨୦୦୪ ମସିହାରେ ଶେଫାଳି ବିଶ୍ୱାସ, ଜୟନ୍ତୀ ବିଶ୍ୱାସ ଓ କଲ୍ୟାଣୀ ବିଶ୍ୱାସଙ୍କ ଠାରୁ ୮ ସେଣ୍ଟ ଜମି କ୍ରୟ କରିଥିଲେ। ଜିଲ୍ଲା ସବ-ରେଜିଷ୍ଟର କାର୍ଯ୍ୟାଳୟରେ ବିକ୍ରୟ ଡିଡ୍ କରି ଶେଫାଳି ବିଶ୍ୱାସ, କଲ୍ୟାଣୀ ବିଶ୍ୱାସ ଏବଂ ଜୟନ୍ତୀ ବିଶ୍ୱାସଙ୍କଠାରୁ ଏକ ଜମି ଖାତା ନଂ-୨୯ ପ୍ଲଟ୍ ନଂ-୧୨ କିଣିଥିଲେ। ତା'ପରେ ଶ୍ରୀମତ ରଥ ଉକ୍ତ ଜମି ସମ୍ପର୍କରେ ଆରଓଆର ପାଇଲେ ଏବଂ ଜମି ରାଜସ୍ୱ ଜମା କରିଥିଲେ। ତେବେ ଗତ ୨୦୨୧ ମସିହାରେ ଜମିର ଖଜଣା ଓ ଜଳ କର ଆରଆଇ ଅଫିସରେ ବାନ୍ଧିବାକୁ ଯାଇ ଜାଣିଥିଲେ ଯେ ସେ ଜମି ଆଉ ତାଙ୍କର ନାହିଁ। କୈଳାଶ ଚନ୍ଦ୍ର ମହାନ୍ତିଙ୍କ ପତ୍ନୀ ଶେଫାଳି ମହାନ୍ତି (ବିଶ୍ୱାସ )ଙ୍କ ନାମରେ କବଲା ହୋଇଛି। ଏହା ଜାଣିବା ପରେ ଆଶ୍ଚର୍ଯ୍ୟ ହୋଇ ତହସିଲ ଓ ସବ ରେଜେଷ୍ଟ୍ରି ଅଫିସ ଓ ଥାନାରେ ଅଭିଯୋଗ କଲେ ହେଲେ ଜମି କଥା ଯୋଗୁଁ କେହି ଗୁରୁତ୍ୱ ଦେଲେ ନାହିଁ।
ପ୍ରକାଶ ଥାଉକି ଅଭିଯୁକ୍ତ କୈଳାସ ଚନ୍ଦ୍ର ମହାନ୍ତି ଵର୍ତମାନ କୁଡୁମୁଲୁଗୁମାର ତହସିଲ କାର୍ଯ୍ୟାଳୟରେ କ୍ଲର୍କ ଭାବରେ କାର୍ଯ୍ୟ କରୁଛନ୍ତି। ଗତ ୨୦୧୫ ମସିହାରେ ସେ ମାଲକାନଗିରିର ସବ-ରେଜିଷ୍ଟ୍ରି କାର୍ଯ୍ୟାଳୟର ବରିଷ୍ଠ କିରାଣୀ ଭାବରେ କାର୍ଯ୍ୟ କରୁଥିଲେ। ସେ ଅଭିଯୁକ୍ତ ଶେଫାଳି ବିଶ୍ୱାସଙ୍କୁ ବିବାହ କରିଛନ୍ତି। ଶ୍ରୀ ମହାନ୍ତି ଜାଲ୍ ଦସ୍ତଖତ କରି ବିକ୍ରୟ ପତ୍ର ପ୍ରସ୍ତୁତ କରିବାରେ ସଫଳ ହୋଇଥିଲେ।
ଏହା ଜାଣିବା ପରେ ଶ୍ରୀ ପାଢି ମାଲକାନଗିରି ବରିଷ୍ଠ ଦେୱାନୀ ବିଚାରପତିଙ୍କ କୋର୍ଟରେ ସି.ଏସ୍. ନଂ- ୩୭/୨୦୨୧ ମାଧ୍ୟମରେ ଦେୱାନୀ ମାମଲା ଦାୟର କରିଥିଲେ। କୋର୍ଟ ଏହି ମାମଲାର ଶୁଣାଣୀ କରି ୦୩.୦୨୩.୨୦୨୨ ରେ ଏହାର ତଦନ୍ତ କରିବାକୁ ଆଦେଶ ପ୍ରଦାନ କରିଥିଲେ। କିନ୍ତୁ ଅଭିଯୁକ୍ତମାନେ କୋର୍ଟଙ୍କ ନିର୍ଦ୍ଦେଶକୁ ଅବମାନନା କରି ବିବାଦୀୟ ଜମିରେ ଘର ନିର୍ମାଣ କରିଥିଲେ। ତେଣୁ ଅଭିଯୋଗକାରୀ ଅଭିଯୁକ୍ତମାନଙ୍କ ବିରୁଦ୍ଧରେ ମାଲକାନଗିରି ପିଏସ୍ କେସ୍ ନମ୍ବର-୨୩୦/୨୦୨୪ ୟୁ/ଏସ୍-୧୮୮/୨୯୪/୫୦୬/୩୪ ଆଇପିସି ଅଧିନରେ ମାମଲା ରୁଜୁ କରିଥିଲେ। ତଦନ୍ତ ସମୟରେ ଅଭିଯୁକ୍ତମାନେ ସଠିକ ପ୍ରମାଣ ପ୍ରଦାନ କରିବାରେ ବିଫଳ ହୋଇଥିଲେ।
ତଦନ୍ତ ସମୟରେ ଅଭିଯୁକ୍ତମାନେ ସୂଚନାଦାତାଙ୍କଠାରୁ ଜମି କ୍ରୟ ସମ୍ବନ୍ଧୀୟ କୌଣସି ଆର୍ଥିକ କାରବାର ପ୍ରଦାନ କରିପାରି ନଥିଲେ। ପରେ ସମସ୍ତ ସାକ୍ଷ ପ୍ରମାଣକୁ ଭିତ୍ତି କରି ଶ୍ରୀ ମହାନ୍ତିଙ୍କୁ ଗିରଫ କରା ଯାଇ କୋର୍ଟ ଚାଲାଣ କରାଯାଇ ଥିବା ମାଲକାନଗିରି ଥାନା ଆଇଆଇସି ରିଗନ କିଣ୍ଡୋ ଆଜି ଗଣ ମାଧ୍ୟମକୁ ସୂଚନା ଦେଇଛନ୍ତି।
