ମାଲକାନଗିରି, ୮।୫(ଆପ୍ର): ମାଲକାନଗିରି ଜିଲ୍ଲା ଖଇରପୁଟ ବ୍ଲକର ବଣ୍ଡା ଘାଟି ଓସେପା ଉପ ନିର୍ଦେଶକ ପ୍ରଦୋଷ କୁମାର ନାୟକ ଗୁରୁବାର ଗସ୍ତ କରିଛନ୍ତି। ଜନଜାତିର ଛାତ୍ର ଛାତ୍ରୀଙ୍କୁ ଶିକ୍ଷା ପ୍ରତି ଆକ୍ରୁଷ୍ଟ କରିବା ସହ ଅଧାରୁ ପାଠ ଛାଡୁ ଥିବା ପିଲାଏ କିଭଳି ଭାବେ ବିଦ୍ୟାଳୟକୁ ଫେରିବେ ଓ ଶିକ୍ଷା ଗ୍ରହଣ କରିବେ ସେ ନେଇ ସମୀକ୍ଷା କରିଥିଲେ।
ବଣ୍ଡାଗୁଡା, ବାଡେଇଗୁଡା, ମୁଦୁଲିପଡା, ଦାନ୍ତୀପଡା ଭଳି ଅଞ୍ଚଳକୁ ଯାଇ ଏହି ଆଦିମ ଜନଜାତିର ଛାତ୍ର ଛାତ୍ରୀଙ୍କ ଅଭିଭାବକ ମାନଙ୍କୁ ଭେଟି ଆଲୋଚନା କରିଥିଲେ। କେଉଁ କାରଣରୁ ଛାତ୍ର ଛାତ୍ରୀ ମାନେ ଅଧାରୁ ପାଠ ପଢା ଛାଡିଛନ୍ତି ସେନେଇ ବୁଝିବା ସହ ଏକ ସ୍ଵତନ୍ତ୍ର ସମୀକ୍ଷା କରିଥିଲେ। ଏହା ସହ ଏନେଇ ସ୍ଥାନୀୟ ଅଧିକାରୀ ଓ ଗ୍ରାମବାସୀଙ୍କ ସହ ଆଲୋଚନା କରି ଆଗାମୀ ଦିନରେ ଯେପରି ୪ବର୍ଷରୁ ୧୫ ବର୍ଷ ଯାଏଁ ସବୁ ପିଲାଏ ବିଦ୍ୟାଳୟକୁ ଯିବେ ଏବଂ ରାଜ୍ୟ ଶିକ୍ଷା ବିଭାଗ ଓ ଜିଲ୍ଲା ପ୍ରଶାସନ ପକ୍ଷରୁ ଛାତ୍ର ଛାତ୍ରୀଙ୍କୁ କିପରି ଉଚିତ ଶିକ୍ଷା ମିଳିବ ସେନେଇ ଆବଶ୍ୟକ ପଦକ୍ଷେପ ଉପରେ ଗୁରୁତ୍ଵ ଦେବାକୁ ନିର୍ଦେଶ ଦେଇଥିଲେ। ଏହି ଗସ୍ତ ସମୟରେ ଖଇରପୁଟ ଏବିଓ ସୀବନୀ ମୁଦୁଲି ଉପସ୍ଥିତ ଥିଲେ।
