: କାର୍ଯ୍ୟରେ ଅବହେଳା କରୁଥିବା ଅଭିଯୋଗରେ କୋଣାର୍କ ଏନଏସି ଅଧିକାରୀଙ୍କୁ ନିଲମ୍ବିତ କଲେ ପୁରୀ ଜିଲ୍ଲାପାଳ । ଦାଇତ୍ଵ ନେଲେ ଗୋପ ବିଡିଓ । ସୂଚନା ଅନୁଯାୟୀ, ନିର୍ବାହୀ ଅଧିକାରୀ ଆକୃତି ଗୋଏଙ୍କା ହେଡ୍ କ୍ୱାର୍ଟରରେ ବାରମ୍ଵାର ଅନୁପସ୍ଥିତ ରହୁଥିଲେ ଏବଂ ବିଳମ୍ବରେ ଆସି ଶୀଘ୍ର ପଳାଉଥିଲେ ବୋଲି ଅଭିଯୋଗ ହେଉଥିଲା । ଅନେକ ସମୟରେ ଶ୍ରୀମତୀ ଗୋଏଙ୍କା ଅଫିସକୁ ମଧ୍ୟାହ୍ନ ୧୨ଟାରେ ଆସି ଅପରାହ୍ନ ୩ଟାରେ ପଳାନ୍ତି ବୋଲି କେତେକ କର୍ମଚାରୀ ଗୋପନୀୟ ଭାବେ ଜିଲ୍ଲାପାଳଙ୍କୁ ତଥ୍ୟ ଦେଇଥିଲେ । ଅନ୍ୟପଟେ ନିର୍ବାହୀ ଅଧିକାରୀ ବାତ୍ୟା ଦାନା ସମୟରେ ମଧ୍ୟ ସରକାରଙ୍କ ନିର୍ଦ୍ଦେଶକୁ ଅବମାନନା କରି ଅନୁପସ୍ଥିତ ରହିଥିବା ଅଧିକାରୀଙ୍କ ପାଖରେ ଅଭିଯୋଗ ହୋଇଥିଲା ।
ସବୁଠୁ ବଡ଼କଥା ହେଉଛି କୋଣାର୍କ ଉତ୍ସବ ସମୟରେ ମଧ୍ୟ କାର୍ଯ୍ୟରେ ଅବହେଳା ଓ ଅନୁପସ୍ଥିତ ରହୁଥିବା ଖବର ପୁରୀ ଜିଲ୍ଲାପାଳଙ୍କ ନିକଟରେ ଅଭିଯୋଗ ପହଞ୍ଚିଥିଲା । କୋଣାର୍କ ଉତ୍ସବରେ ମୀନା ବଜାର ପରିଚାଳନା ଏନଏସି ପକ୍ଷରୁ ବିଭିନ୍ନ ଅବ୍ୟବସ୍ଥା ଦେଖିବାକୁ ମିଳିଥିଲା । ପ୍ଲଟ୍ ବଣ୍ଟନ ନେଇ ସମସ୍ୟା ଓ ରାସ୍ତା ମରାମତି ଓ ମୋରମ ପକାଇବା କାର୍ଯ୍ୟ ଅତ୍ୟନ୍ତ ନିମ୍ନମାନର ସହ ସଫେଇ କାର୍ଯ୍ୟରେ ବିଳମ୍ବ ରହିଥିଲା । ଏଥିସହିତ ଅନେକ ପଦ ଅଧିକାରୀ ମାନେ ଆସୁଥିବା ବେଳେ ନିର୍ବାହୀ ଅଧିକାରୀ ଅନୁପସ୍ଥିତ ରହୁଥିବା ଦେଖିବାକୁ ମିଳିଥିଲା । ଏନେଇ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ୱାଇଁ ଏହାକୁ ଗୁରୁତ୍ଵ ନେଇ କୋଣାର୍କ ନିର୍ବାହୀ ଅଧିକାରୀ ଆକୃତି ଗୋଏଙ୍କାଙ୍କୁ କାର୍ଯ୍ୟରୁ ନିଲମ୍ବିତ କରି ତାଙ୍କ ସ୍ଥାନରେ ଗୋପ ବ୍ଲକରେ ଦକ୍ଷତା ସହ କାର୍ଯ୍ୟ କରୁଥିବା ବିଡିଓ ଛବି ରାଣୀ ସାହୁଙ୍କୁ ଦାୟିତ୍ଵ ଦିଆଯାଇଛି ।
